Read Tayta Diosninchi Isquirbichishan Proverbios 2 Bible Online

Proverbios 2 - Tayta Diosninchi Isquirbichishan bible

Proverbios 2

¹Ïju, willapashäcunata sumaj wiyacuy. Willapashä mandamintucunatapis umayquiman sumaj churay.

²Yachaj canayquipaj sumaj wiyacuy. Tantiyachishäcunataga ushajpaj umayquiman churay.

³Llapan shonguyquipa llapan callpayquiwan mañacuy yachaj canayquipaj, yarpaysapa canayquipaj.

⁴Chaytaga ashiy pamparaj guellayta, gorita ashejno.

⁵Chayrämi tantiyanquipaj TAYTA DIOSTA imano rispitana cashantapis. Chaynöpami Tayta Diostapis rejsinquipaj.

⁶TAYTA DIOSLLAMI yachaytapis yachachimanchi. Payllami tantiyachimanchïpis, yarpaysapayächimanchïpis.

⁷Juchata mana rurajcunata Payga yanapanmi, imapitapis chapanmi.

⁸Allillata rurar cawajcunataga Tayta Diosmi cuydan. Payman yäracojcunataga imapitapis chapanmi.

⁹Chauraga musyanquipämi alli cajtapis, rasun cajtapis. Tayta Dios munashanno goyaytapis musyanquipämi.

¹⁰Fiyupami yachanquipaj. Yachaj carga cushishami goyanquipaj.

¹¹Tantiyaj cashayquiwan yarpaysapa cashayquega manami ima mana allimanpis chayachishunquipächu.

¹²Chaypitami llutan mana alli ruraycunapitapis chapäshunquipaj. Juchasapa runacunapitapis salbashunquipaj.

¹³Salbashunquipaj alli rurayta cachaycur jucha rurayman cutej runacunapa maquinpita.

¹⁴Washäshunquipaj mana allita rurariycur cushicojcunapita; llutancunata rurariycur cushicuypita fistata rurajcunapita.

¹⁵Chay runacunaga allita ruraycashantami cachaycusha. Llutancunata rurarmi pantacasha carcaycan.

¹⁶Runanta raysunaj warmicunapitapis chapäshunquipämi. Alli shimillanpa parlapäshuptiquipis gamga manami gaticurcunquipächu.

¹⁷Chay warmiga jipash cashanpita-pacha caj majantapis cachaycunmi. Tayta Diosta aunishantapis gongaycunmi.

¹⁸Majanta raysunaj warmiwan cacuyga jucha aparicuymi. Chay warmiwan cacorga juchasapacuna wañur aywashanmanmi aywaycan.

¹⁹Chay warmita gaticurcöga manami allimanga cutinnachu. Manami alli caminupa purinnachu.

²⁰Ïju, gam ichanga alli caminupa puriy. Allillata ruraj runacunano goyay.

²¹Dios munashanno goyajcunami, pipis mana rimasha goyajcunami cay pachacho alli cawanga.

²²Fiyu runacuna, mana yäracuypaj runacuna ichanga jachata achurisha illgajnömi cay pachapita illganga.