Read Tayta Diosninchi Isquirbichishan Proverbios 20 Bible Online

Proverbios 20 - Tayta Diosninchi Isquirbichishan bible

Proverbios 20

¹Machacurcorga runacuna alli chölu-tucunmi. Upyacarcärerga quiquin-purami rimanacun. Machashaga manami pipis yarpayninchöchu.

²Ray ollgorga liyunno manchacuypämi. Chayno caycajtaga wañuyta ashillarmi pipis achäquita ashipan.

³Piwanpis mana rimanacoj runaga alli rispitashami. Mana tantiyacoj runami ichanga piwanpis juclla rimanacun.

⁴Murupacuy wichanpis guella runaga manami yapyapacunchu, ni murupacunchu. Chaymi cosëcha wichanpis ashipacushpan imatapis mana tarengachu.

⁵Shongullancho runa yarpashanga jundu yacunömi. Alli yachaj tantiyacoj runami ichanga musyan imano tariytapis.

⁶Quiquillanpitaga pipis alli runa cashantami yarpan. Chaypis ¿piraj tarinman rasunpa yäracuypaj caj runataga?

⁷Allita ruraj runaga allita rurallarmi goyan. Chayno alli runapaga wamrancunapis cushishami goyanga.

⁸Arriglananpaj despächunman jamaycur rayga rasunpa juchayojcunataga ricapärillarmi rejsirin.

⁹Pipis ama ninmanchu: «Nogaga allita rurallarmi cawä. Manami juchataga imaypis rurashcächu» nir.

¹⁰Suwa pësatawan pishi tuputa ishcantami TAYTA DIOS melanäcun.

¹¹Alli mösu cashanta rejsinchi yanapäcoj y rispitösu captinmi.

¹²TAYTA DIOSGA ñawitami camaran imano ricananchïpäpis. Rinritanami camaran imata wiyananchïpäpis.

¹³Puñuyllataga ama aruychu. Puñuyllacho cacorga pobriyanquipämi. Arucuptiqui ruracuptiquega micuyniquipis manami pishengachu.

¹⁴Rantinanpäga «cayga manami allichu» ninmi. Rantircurmi ichanga «allita rantishcä» nir cushicun.

¹⁵Goripitawan aypalla guellaypitapis mas alliga yachayninwan yachaj rimashanmi.

¹⁶Jäpa runata garantiyajtaga asta röpantapis guechuy. Nircorga rinda chararay jagata päganancama.

¹⁷Runapäga capas fiyupa mishquin engañaypa tarishan micuy. Chaypita unayllataga ricacun amuy aguta micushannöllami.

¹⁸Imata rurananpäpis alliga camacan sumaj tapucuriptinrämi. Imano pillyananpäpis sumaj yarpachacurir-rämi guërrata ruran.

¹⁹Washa-rimaga imata willashantapis manami upällallaga cacunchu. Chaymi washa-rimacunawanga ama gotucanquichu.

²⁰Mamanta taytanta amatar ñacachëga maldisyunädumi canga. Chayga fiyupa ñacar cuyapaypämi wañonga.

²¹Mana ñacayllapa rïcuyashanga fäsimi ushacanga. Chauraga llaquishallanami goyanga.

²²Pipis mana allita rurashuptiqui ama yarpaychu ayñita cutichiytaga. TAYTA DIOSLLAMAN yäracuy. Chaura Paymi yanapäshunquipaj.

²³TAYTA DIOSGA chiquinmi suwa pësata. Payga manami munanchu suwa balansatapis.

²⁴TAYTA DIOSMI runa imano cawananpäpis camacächin. Quiquin runaga manami musyanchu imanöpaj distïnun cashantapis.

²⁵Fiyupa mana allimi caycan mana yarpachacuyllapa Tayta Diosta goycunanpaj aunircur cutiricuptenga.

²⁶Yachaj rayga rïguta wayrajnömi fiyucunata acran. Nircur paycunataga rïgupa päjanta gollpojnömi illgarachenga.

²⁷TAYTA DIOSMI espiritunta runaman churasha. Chaynöpami runaga yarpashancuna alli mana alli cashantapis musyan.

²⁸Rasun cajta ruraj captin, cuyapäcoj captin raytaga pipis manami jitarinchu.

²⁹Timpu callpallancho cashpan mösucunaga cushicunmi. Ajchan soguna captinmi auquincunatapis rispitan.

³⁰Mana allita rurajcunapäga yawar-yawar astiyrämi jampi. Castïguwanrämi juchasapacunapis tantiyacun.