Read Tayta Diosninchi Isquirbichishan Proverbios 21 Bible Online

Proverbios 21 - Tayta Diosninchi Isquirbichishan bible

Proverbios 21

¹TAYTA DIOSPA ñaupancho rayga caycan sicyapa yacu aywajnömi. TAYTA DIOSMI munashanpa pushan.

²Runapäga llapan rurashancunapis alli-niräpunmi. Chaypis TAYTA DIOSRÄMI nin alli u mana alli yarpashancuna cashantapis.

³Alli cajta rasun cajllata rurar goyay. Chayno ruraptiquega sacrifisyucunata garashayquipitapis masmi TAYTA DIOS cushicun.

⁴Manacajman churaypis, yachaj-tucuypis, mana allita yarpaypis juchami.

⁵Sumaj yarpachacurcur rurashanga llapanpis allimi llojshin. Mana yarpachacuypa rätu rurarejcunapami ichanga mana alli llojshin.

⁶Llullacuyllapa ima-aycatapis tariyga manami allichu. Chayga caycan cushicachimänallapämi, wañuyta ashiyllami.

⁷Fiyucunaga quiquin mana allita rurashallanwanmi wañonga. Allita rurayta mana munashanpitami ushacanga.

⁸Fiyu runaga juchallatami ruran. Alli runa rurashanmi ichanga llapanpis alli.

⁹Alli jatun wasicho rimanacuyllata pillyallata ashiycaj warmiwan goyänanpa ruquenga chucllallachöpis japallan tiyacuptin mas allimi canman.

¹⁰Fiyu runaga imaypis mana allita rurayllatami yarparaycan. Runa-masinta cuyapaytaga manami yachanchu.

¹¹Shimisapa runa castigasha cashanta ricacur-rämi mana tantiyacoj runa yachacun mana cuntistacoj cananpaj. Tantiyacoj runami ichanga tantiyarcachiptillan yachacun.

¹²Juchaynaj Tayta Diosga fiyu runa imano goyashantapis sumajmi ricaycan. Nircur fiyu runacunataga mana alliman chayachirmi illgächin.

¹³Pobri runa ruwacur mañacuptin mana cäsojtaga quiquintapis ruwacur mañacuptin Tayta Diosga manami cäsongachu.

¹⁴Fiyupa rabyasha caycajtapis alli shongunpa goycushpanga rabyantapis päsacächinmi.

¹⁵Alli cajta rurar alli arreglaptin alli runacunaga cushicunmi. Mana allita ruraj juchayojcunami ichanga mana alliman chayan.

¹⁶Alli cajta ruraycashancho llutanta rurarnaga wañongami.

¹⁷Gustullanta rurajcuna, upyallata arojcuna, perfümicunallapaj arucojcunaga pobriyangami.

¹⁸Llullacuna, fiyu runacunaga alli runacunapa ruquinmi ñacanga.

¹⁹Fiyu y rabyaj warmiwan tiyananpa ruquenga mas allimi canman japallan chunyajcho tiyacuptinpis.

²⁰Yachajcunapa wasinchöga ima-aycanpis juntami. Manami imapis pishinchu. Mana tantiyacojcunami ichanga ima tarishallantapis ushacurcun.

²¹Alli cajta rurajcuna, cuyapäcoj cajcunaga alli cawaytami tarenga, y pï-maypis rispitangami.

²²Yarpaysapa yachaj runaga binsinmi siudächo callpayojcuna tiyaycajtapis. Nircur «chapämäshun» nir yäracushan curralnintapis juchurachinmi.

²³Llutalla imatapis mana parlacoj runaga manami ima llaquicuymanpis chayangachu.

²⁴Ollgojta, alli-tucojtaga «shimisapa» nirmi rejsin. Chayno runaga yachaj-tucojmi.

²⁵Guella runaga imatapis munapayllami munapaycan. Aruypaj guella cashpanmi imatapis mana tarinchu.

²⁶Imay örapis munapaycanllami. Alli runami ichanga charircur-charircur pitapis goycun.

²⁷Tayta Diosga melanäcunmi fiyu runacuna garashan sacrifisyuta. Mas piyur-rämi melanäcunpis yanapänan cashalla sacrifisyuta apapaptenga.

²⁸Alman ranticoj runaga ñacaymanmi chayanga. Alli wiyaj runami ichanga wiyashallanta rimanga.

²⁹Fiyu runaga runacuna ricanallanpämi alli-tucun. Alli runami ichanga rasunpa allillata ruran.

³⁰TAYTA DIOSPA ñaupanchöga runa may-jina yachaj cashanpis yangami. Allita yarpashanpis, ni alli yarpayniyoj cashanpis manacajllami.

³¹Runaga cawalluta sillacun guërraman yaycunanpaj. Chaypis TAYTA DIOSRÄMI camacächin maygan gänananpäpis.