Read Tayta Diosninchi Isquirbichishan Proverbios 24 Bible Online

Proverbios 24 - Tayta Diosninchi Isquirbichishan bible

Proverbios 24

¹Fiyu runacuna rïcuyaptin ama rabyapaychu. Ni paycunawan goturaytapis ama yarpaychu.

²Paycunaga wañuchicuyllapämi yarparcaycan. Mana allicunata rurayllapämi parlanpis.

³Alli yachajpämi wasi ruraypis. Alli tantiyajpämi wasipa simintun pergaypis.

⁴Yachaj cayninwanmi imatapis wasiman shuntan alli cajllata, mas chanin cuestaj cuyayllapaj cajcunallata.

⁵Yachaj runaga masmi bälin callpasapa runapitaga. Yarpaysapa runapis sumaj munayniyojmi.

⁶Guërra gallaycuptenga sumaj yarpachacuycurmi pillyayta gallaycun. Achcaj tantiyachejnincuna captinrämi guërrachöga binsin.

⁷Mana tantiyacoj upaga yachayta manami tarinchu. Chaymi autoridäpa ñaupancho ima rimaytapis mana camäpacunchu.

⁸Pitapis mana alli rurayllata yarpajcunataga pï-maypis rejsin «fiyu runa» nirmi.

⁹Mana tantiyacoj upaga jucha rurayllatami yarpan. Shimisapatapis llapanmi chiquipan.

¹⁰Ñacaycunata mana awantäga manami runachu canqui.

¹¹Mana juchan caycaptin wañuchinanpaj caycajtaga salbay. Wañunanpaj caycajcunatapis salbay.

¹²«Manami musyashcächu» niptiquipis pï imallata rurashanpitapis jusgaj Tayta Diosllami musyanga. Imano caycashayquitapis ricashöga llapan rurashayquitami ricaycäshunqui. Runacunataga rurashanmannömi llapanta cutichenga.

¹³Ïju, abëjapa mishquinta jorgurcur micuy. Masqui yawarcuy. Chayga fiyupa mishquejmi.

¹⁴Yachaj caypis, musyaj caypis abëjapa mishquinnömi cangapaj gampäga. Alli yarpayniyoj sumaj yachaj carga allimi goyanquipaj. Yarpashayquicunapis manami yangallapächu canga.

¹⁵Alli runacunataga ima mana allitapis ama yarpapaychu. Tiyaycashan wasintapis ama amiychu.

¹⁶Mana alliman ganchis cuti chayarpis alli runaga allichömi llojshenga. Fiyu runacunami ichanga mana alliman chayar chayllachöna ushacanga.

¹⁷Chiquishojcuna mana alliman chayashpan ñacaycho caycaptenga ama cushicuychu ni asipaypischu.

¹⁸Chayno runa rurashanga TAYTA DIOSTA manami gustanchu. Cushipaptiquega fiyu runata castigaycashanpita manami castiganganachu.

¹⁹Fiyu runacuna-jananga ama rabyacuychu. Fiyu runacuna charashantapis ama munapaychu.

²⁰Fiyucunaga mana alliman chayar-rämi mayanga. Fiyucunaga achqui upejno illajpitami illaraycanga.

²¹Ïju, TAYTA DIOSTA manchacuy. Raytapis rispitay. Fiyu runacunawanga ama goturpanquichu.

²²Fiyucunaga illajpitami usharaycangapaj. Manami pipis musyanchu Tayta Diospis, ni raypis imano castiganantapis.

²³Caycunapis yachajcuna rimashanmi: Pipis dimanducho captin jucajllata ricapayga manami allichu.

²⁴Juchayoj caycaptin «Manami juchayojchu canqui» niptenga llapan runami rabyanga. Chayno nejtaga juc-lä nasyun runacunapis manacajmanmi churan.

²⁵Juchayojcunata castigaptinmi ichanga alliman churan. Chayno alli arriglajcunapäga llapan runa allimi parlan.

²⁶Imata tapuptinpis allita cutichëga alli amïgumi caycan.

²⁷Rimëruga chacrayquitaraj camariy. Chacra aruyniquicunataraj aruy. Nircur-raj mushoj wasitaga jatarachiy.

²⁸Manacajtaga runa-masiquipaj ama declaraychu. Manacajpitaga ama rasuntano rimanquichu.

²⁹Pï ima mana allita rurashuptiquipis gamga ama yarpaychu ayñita cutichiyta.

³⁰Guella runapa chacranpa aywashcä. Mana yarpachacoj runapa übas chacranpapis purimushcä.

³¹Chaychömi ricashcä chacran jacha juntashalla caycajta, pergancunapis juchusha caycajta.

³²Chaycunata ricaycur umäman churacushcä. Chaymi yarpachacur tantiyacushcä cayno cashanta:

³³Puñucushayquicama, jajtashayquicama, maquiqui ogllasha cacushayquicama

³⁴ushapacayga suwa pillyacunanwan shamojnömi chayapaycushunquipaj.