Read Tayta Diosninchi Isquirbichishan Proverbios 28 Bible Online

Proverbios 28 - Tayta Diosninchi Isquirbichishan bible

Proverbios 28

¹Fiyu runaga pipis mana gaticachaycaptinmi gueshpir aywacun. Juchaynaj alli runami ichanga liyunno mana manchacuypa goyäcun.

²Juc nasyuncho mana alli goyayllana captenga mandajcunapis achcami yurin. Alli yachaj yarpaysapa mandajmi ichanga llapanta alli mandan. Chauraga runacunapis allilla goyan.

³Pobricunata ñacachej fiyu mandajmi ichanga caycan chacracho micuy caycajta löcu tamyawan lloglla apacojno.

⁴Lay nishanta mana wiyacojcunaga fiyucunatami alaban. Lay nishanta cumlejcunami ichanga fiyucunapa contran caycan.

⁵Fiyucunaga maygan alli cashantapis manami tantiyanchu. TAYTA DIOSMAN yäracojcunami ichanga llapanta tantiyan.

⁶Pobrilla carpis allillata rurar cawashanmi mas alli caycan rïcu caycar llutancunallata rurar cawananpitaga.

⁷Laycunata cumlëga alli tantiyaj wamrami. Pachallanta ashejcunawan puricojcunami ichanga papänintapis pengayman churan.

⁸Guellayninpa wawanta achcata cobraycällar rïcuyäga pobricunata yanapaj runacunallapämi shuntan.

⁹Pipis Tayta Diospa layninta cumliyta mana munaj cajtaga mañacuptinpis Tayta Diosga manami yanapangachu.

¹⁰Alli runacunata juchata rurananpaj pushajcunaga quiquinmi mana allita yarpaycashanman chayanga. Juchata mana rurajcunami ichanga alli cawayman chayanga.

¹¹Rïcucunaga yarpan yachaj cashantami. Pobri carpis alli tantiyajmi ichanga rïcu imano cashantapis musyan.

¹²Alli runacuna alliman chayaptenga llapanmi cushicun. Fiyu runa alliman chayaptinmi ichanga llapan mancharir gueshpin.

¹³Juchancunata pacajcunaga manami alliman chayangachu. Mana alli ruraycunata cachaycur juchancunapita perdunta mañacojcunami ichanga perdunasha canga.

¹⁴Tayta Diosta imaypis rispitajcunaga cushishami goyanga. Tayta Diosta mana wiyacojcunami ichanga ñacayman chayanga.

¹⁵Pobri runacuna tiyashancho fiyu runa mandaj carga caycan yargaypita gaparaycaj liyunnömi, yargaycaj ösunömi.

¹⁶Yarpayniynaj mandajcunaga llapan mandashan runatami fiyupa ñacachin. Mana yargaj carmi ichanga unaycama alli cawanga.

¹⁷Pitapis wañuchejcunaga gueshpi-gueshpillami wañunancamapis purenga. Chayno runapaga ama pipis faburnin cachunchu.

¹⁸Alli runaga llapanpitami salbaconga. Fiyu runami ichanga disigrasyaman chayanga.

¹⁹Aroj runapaga micuynincunapis puchu-puchumi. Guellacunawan purejcunapaga wasinchöpis wayrallami tumaycan.

²⁰Alli llapanta cumlej runacunaga sumaj rispitashami canga. Ima-aycanöpapis riquësata shuntayta munajcunami ichanga castigasha canga.

²¹Manami allichu waquillanpa faburnin jatariy. Waquin runaga juc amuy tantallapäpis jucpa faburninmi jatarin.

²²Yargajcunaga fiyupami munan rätu rïcuyayta. Manami musyanrächu ima-aycanpis ushacaptin jinaylla pobri ricacunantaga.

²³Waquenga alabashunayquipa ruquin piñacushunquimi. Chaypita jagayarpis nircur-rämi tantiyacunquipaj allipaj cashanta.

²⁴Taytanta mamanta suwaparcur «chayga manami juchachu» nejcunaga wañuchicojcunapa suwa-masinnömi caycan.

²⁵Fiyupa yargaj runaga pï-maywanpis rimanacongallami. TAYTA DIOSMAN yäracoj runami ichanga alliman chayanga.

²⁶Quiquin yarpashallanman yäracoj runaga mana tantiyacoj upa runami. Sumaj tantiyaycur ruraj runami ichanga imapitapis allicho llojshenga.

²⁷Pobricunata yanapajtaga manami imapis pishengachu. Mana yanapajcunatami ichanga ñacajcuna maldisyunta gonga.

²⁸Fiyu runacuna alliman chayaptenga llapan runami mancharir gueshpin. Fiyucuna illgaptinmi ichanga alli runacuna alliman chayan.