Read Tayta Diosninchi Isquirbichishan Proverbios 29 Bible Online

Proverbios 29 - Tayta Diosninchi Isquirbichishan bible

Proverbios 29

¹Piñacuycaptinpis tantiyacuyta mana munajcunaga manapis aycällatanami ushacanga. Jampipis manami canganachu.

²Alli runacuna autoridä cayman chayaptenga llapanmi cushicun. Fiyu runa mandaj cayman chayaycuptenga llapan runami llaquicun.

³Yachaj wamraga taytanta cushicachinmi. Guellaypaj cuerpunta ranticoj warmicunawan cacorga guellaynintapis ushajpämi ushanga.

⁴Ray llapantapis alli arriglaptenga mandashan runacuna allimi goyan. Ray guellayllapaj yargaj captinmi ichanga nasyunnin pobriyanga.

⁵Imaypis amïgunta alabajcuna rasunpaga mana alliman chayachinallanpämi alaban.

⁶Fiyu runaga quiquinpa juchallanpitami imamanpis chayan. Alli runami ichanga cushisha alli goyäcun.

⁷Alli runaga tantiyanmi pobri runacuna imano goyaycashantapis. Fiyu runatami ichanga imapis mana gocunchu imano goyashanpis.

⁸Shimisapacunaga llapan runatami rimanacachin. Yachajcunami ichanga imanöpapis llapanta gasacächin.

⁹Mana tantiyaj upa runawan yachaj runa rimanacorga imatapis manami jorgongachu. Yachaj runataga manacajman churarmi asipanga.

¹⁰Wañuchicojcunaga juchaynaj runacunata wañuchiyllatami yarpaycan. Alli runacunami ichanga juchaynajcunapa amïgun cayta munan.

¹¹Mana tantiyaj upa runa rabyarga llapan yarpashantami riman. Alli tantiyaj runami ichanga rabyarpis rabyan rätulla.

¹²Llullacojcunapa shiminta juc mandaj chasquiptenga llapan yanapajnincunapis mana allita ruraj runacunallanami ricaconga.

¹³Ñacaj runawan ñacachej runapis chay-nirajllami carcaycan: Ishcantapis TAYTA DIOSGA iwalnintami ricaycächin.

¹⁴Juc mandaj pobricunata alli mandaptenga imaycamapis chaynöllami mandaycanga.

¹⁵Runaga piñacur astiptinrämi yachacun. Mana piñacuypa uywashan wamrami ichanga mamanta pengayman churan.

¹⁶Achca fiyu runacuna captenga jucha ruraycunapis manami pishinchu. Ichanga alli runacuna ricapaycaptillanmi fiyu runacunaga mana alliman chayanga.

¹⁷Umayquita mana nanächinanpaj wamrayquita piñacuy. Chaura wamrayquega fiyupami cushicachishunquipaj.

¹⁸Tayta Diosta mana wiyacorga runacuna llutanta rurallarmi goyan. Tayta Diospa laynin niycashanno cumlejcunami ichanga cushisha goyanga.

¹⁹Uywaynintaga manami shimillawanchu tantiyachin. Tantiyaycarpis shimillapa nishantaga manami ruranchu.

²⁰¿Mana yarpachacuypa parlaj runata wiyashcanquichu? Chayno runapitaga mana tantiyacoj upa runapis allirämi canman.

²¹Tacsha cashanpita-pacha uywayniquita munashanno goyäcunanpaj cachaycusha captiquega jatunyarga umayquita nanächir fiyupami llaquicachishunquipaj.

²²Imallapitapis juclla rabyacäcoj runaga pï-maywanpis jucllami rimanacun. Chayno cashpanmi llutancunata ruran.

²³Alli-tucojcunataga manacaj cayman churan. Umildi cajcunatami ichanga alliman churar rispitan.

²⁴Suwacunawan goturpäga quiquillanmi llutanman chayan. Declarananpaj jurachisha caycaptinpis manami willacunchu.

²⁵Runacunata manchacorga ima mana allimanpis chayanmi. TAYTA DIOSMAN yäracojcunatami ichanga imapis mana chayanchu.

²⁶Runacunaga llapan-japuymi mandajnin cuyapänanta munan. Chaypis TAYTA DIOSLLAMI llapantapis arriglanga.

²⁷Alli runacunaga fiyu runacunata ricaytapis manami munanchu. Fiyu runacunapis alli runacunata ricayta manami munanchu.