Read Tayta Diosninchi Isquirbichishan Proverbios 3 Bible Online

Proverbios 3 - Tayta Diosninchi Isquirbichishan bible

Proverbios 3

¹Ïju, ama gonganquichu llapan yachachishäta. Willapashäcunataga umayquiman sumaj churacuy.

²Chaynöpami unaycama alli cawanquipaj.

³Ama imaypis gonganquichu cuyapäcoj cayta. Chaycunataga shonguyquiman sumaj churacuy.

⁴Chayno alli cawaptiquega Tayta Diospis allimi ricashunquipaj; runacunapis rispitashunquipämi.

⁵Llapan shonguyquipa TAYTA DIOSMAN yäracuy. Quiquiqui yachashayquimanga ama yäracuychu.

⁶Imata ruraycashayquichöpis Tayta Diosllaman yäracuy. Chauraga paymi alli caminupa pusharäshunquipaj.

⁷Ama yachaj-tucunquichu. Chaypa ruquenga TAYTA DIOSTA manchacushpayqui jucha ruraypita witicuy.

⁸Chayno allita ruraptiquega cuerpuyquipis sänumi cangapaj; sinchimi canquipaj.

⁹Ima-aycayqui cashallanpitapis TAYTA DIOSTA rispitar garayniquita apay. Micuyniquita rimir-punta shuntar raquishayquitaga paypaj apay.

¹⁰Chauraga Tayta Diosmi micuyniquicunatapis, micuy churacuna wasiquichöpis juntay-juntay cachenga. Bïnuyquipis wiñacunayquicunacho imaypis manami pishengachu.

¹¹Ïju, TAYTA DIOSNINCHI piñacushuptiquega ama jagayanquichu. Pay willapäshuptiqui ama manacajman churanquichu.

¹²TAYTA DIOSGA cuyashan wamrancunatami piñacun imanömi taytanpis cuyay wamranta piñacun, chayno.

¹³Cushishami goyanga yachaj runaga, alli yarpayniyoj runaga.

¹⁴Yachaj cayga guellaypitapis masmi bälin. Gorita tarishanchïpitapis masmi gänachimanchi.

¹⁵Yachaj caymanga cuyayllapaj perlas rumipis manami tincunchu. Mas fiyupa cuyay cajpis manami tincunchu.

¹⁶Yachayga derëchu caj maquinwan mana ushacaj cawaytami tarichicun. Ichoj cajwannami ima-aycatapis tarichin; pï-maypis rispitananpaj yanapan.

¹⁷Chay yachay nishannölla rurarga alli cushishami goyanga. Nishannölla goyarga cushisha goyaytami tarin.

¹⁸Yachacojcunata yachayga allimi goyächin. Pipis yachaj cäga cushishami cawanga.

¹⁹TAYTA DIOSGA yachaj cayninwanmi cay pachatapis sumaj tacyachisha. Yarpaysapa cayninwanmi janaj pachatapis sumaj camacächisha.

²⁰Fiyupa yachaj munayniyoj cayninwanmi lamartapis raquisha; tamyamunanpäpis camacächisha.

²¹Ïju, mana yamacaypa allillata ruranqui. Sumaj yarpachacurir imatapis allillata ruranqui.

²²Chaura gampäga cangapaj alli goyaymi. Runacunapis gampäga alli cashayquitami parlanga.

²³Chauraga mana manchacuypami maypapis purinquipaj. Manami chayanquipächu ima mana allimanpis.

²⁴Puñurpis manami manchacunquipänachu. Mana yarpachacuypanami puñucunquipäpis.

²⁵Illajpita ima chayashunayquitapis manami manchacunquipächu. Fiyu runacunata mana alli chayaptinpis gamga manami manchacunquipächu.

²⁶TAYTA DIOSMI cuydaycäshunquipaj. Mana alliman chayanayquitapis manami dëjashunquipächu.

²⁷Yanapänanpita ñacaycaptenga pitapis yanapanqui. Timpuyqui caycaptenga ama fiyu canquichu.

²⁸Ima-aycayquipis caycaptin mañacushuptiquega ama «wararaj yawachishayqui» ninquichu.

²⁹Pipis yäracushuptiquega ama llutanta ruranquichu.

³⁰Pipis achäquita mana ashipaycäshuptiquega ama piwanpis rimanacunquichu.

³¹Fiyu runa rurashantano ruraytaga ama munapanquichu. Mana allita rurashancunatanöga ama ruranquichu.

³²Fiyu runacunataga TAYTA DIOS melanäcunmi. Alli runacunatami ichanga alli rican.

³³Juchasapacunata TAYTA DIOSGA famillyantintami manacajman churan. Alli runacunatami ichanga famillyantinta bindisyunta gon.

³⁴Manacajman pitapis churajcunataga quiquintami Tayta Diospis manacajman churan. Umildicunatami ichanga alli ñawinpa rican.

³⁵Yachajcunataga pï-maypis rispitangami. Tantiyacuyta mana munajcunami ichanga pengaycho canga.