Read Tayta Diosninchi Isquirbichishan Proverbios 30 Bible Online

Proverbios 30 - Tayta Diosninchi Isquirbichishan bible

Proverbios 30

¹Caycunaga caycan Masa partipita Jaquëpa wamran Agur rimashancunami. Agur willaparan Itieltawan Ucalta.

²Nogaga cä llapan runapitapis mas mana tantiyacoj upami. Manami runapa yarpayninnöchu nogapa yarpaynëga.

³Imatapis manami yachacushcächu. Tayta Dios imano cashantapis manami musyächu.

⁴¿Pitaj syëluman wichasha? ¿Syëlupita caymanpis pitaj urämusha? ¿Piraj llapan wayrata aptaranman? ¿Piraj lamar yacuta jacunwan guepinman? ¿Piraj camacächiran cay pachapa lindancunata? Llapan chaycunataga pipis rurashami canga. Quiquinta rejsir jutinta yachashpayquega mä willamay. Wamranpa jutintapis mä willamay.

⁵Tayta Diosga imapitapis chapanmi payman yäracojcunataga. Payga aunishanta llapantapis cumlinmi.

⁶Pay nishanmanga ama masta yapanquichu. Yapaptiquega piñacushunquimi. Chauraga llullatanömi ricashunquipaj.

⁷Tayta Dios, gamtaga ishcayllatami mañacushcä. Chay mañacushätaga manaräpis wañucuptillä camacaycachiy ari.

⁸Engañanäta, llullacunätaga ama munaycuychu ari. Chayno ama rïcuyächimaypischu ni pobriyächimaypischu. Chaypa ruquenga cawanä-tupuylla tariycachimay ari.

⁹Rïcu carga gamta gongaycur Tayta Dios capaschari nëmanpis «Pitaj chay TAYTA DIOS» nir. Muchupacarga capaschari suwacuycömanpis. Chayno rurarga jutiquitapis manacajmanmi churaycöman.

¹⁰Patrunninta ama willanquichu uywayninpa contran. Contran willaptiquega uyway maldisyuntami goshunquipaj. Chauraga ñacanquipämi.

¹¹Waquenga canmi taytanta ñacachej, mamantapis mana rispitaj.

¹²Waquenga juchata mana rurashanöpis alli-tucun. Rasunpaga jucha ruraycunata manami cacharinrächu.

¹³Waquenga fiyupami munayniyoj-tucun. Chaymi waquin runataga manacajman churan.

¹⁴Waquenga yargaj cashpanmi pobricunapa imantapis guechun. Chay runacunapa quironga espädanömi. Waguncunapis cuchillunömi. Chayno carmi pobricunapa imantapis ushapan.

¹⁵Upucruypa wawancunaga ishcaymi: Jucajpa jutenga «gomay». Jucajpa jutinnami «masta gomay». Chaynöpis quimsami, asta chuscumi can yargaj imaypis mana sacsaj. Chaycunaga manami «chayllatana» ninchu.

¹⁶Pantiyun uchcu ayata simrimi gayaycan. Wawaynaj warmipis wawata simri munaycan. Chaqui jircapis yacunayta manami yamanchu. Cañapapis rupayta manami yamanchu.

¹⁷Maman-taytanta mana alli ricajtaga ñawincunatapis ancacuna jorgucurinman, cundurcunapis micucurcunman.

¹⁸Fiyupa yarpachacurpis manami tantiyayta atipächu. Chaycunaga quimsami can; mas jucpis canrämi:

¹⁹Janajcho ancapa näninta, gagacho culebrapa näninta, lamarcho büquipa näninta; warmiwan ollgu imano majachacashantapis.

²⁰Mañösa warmiga juc runawan cacurcurpis «manami juchataga rurashcächu» nin.

²¹Quimsami cay pachata sicsicyachin. Chuscu cajnami munduta yamacächin.

²²Uyway runa mandaj cayman chayan. Mana tantiyaj upa runapa micuynin mana pishinchu.

²³Llapan runa mana munashan warmi majata tarin. Uyway warmi patrönanpa runanwan tiyacurcun.

²⁴Cay munduchöga chuscu casta tacsha animalcunami yachajcunapitapis mas yarpaysapa caycan:

²⁵Callpaynaj ticsacunaga aypalla tacsha suldärunömi usya wichan micuyninta shuntarcur churacun.

²⁶Wishcashcuna callpaynajlla cashpanpis ranracunachömi tiyan.

²⁷Chüpacacunapis mandajnin mana caycaptinmi mashtaypa aywarpis chay iwal-lla aywan.

²⁸Shullashcunaga fäsi chariy caycarpis raycunapa wasincamami yaycun.

²⁹Cay pachachöga quimsami cuyayllapaj purin. Chuscu cajnami almiraypaj purin.

³⁰Liyonga mas manchacuypaj animalmi. Imapitapis ni pipitapis manami gueshpinchu.

³¹Ollgoj gällu mana manchacuypa purin. Yayan chïbupis mana manchacuypa purin. Raypis suldäruncunapa ñaupanta imatapis mana manchacuypa aywan.

³²Mana tantiyacoj upa-jina mana allita ruranayquipaj yarpasha caycarga sumajraj yarpachacuy.

³³Musyashayquinöpis lëchita gaywerga mantiquillatami jorgunqui. Callpaycur-callpaycur sinyaptenga senganpita yawarmi llojshimun. Chaynömi runa-masinta achäquita ashipajpis pillyayman chayanga.