Read Tayta Diosninchi Isquirbichishan Proverbios 31 Bible Online

Proverbios 31 - Tayta Diosninchi Isquirbichishan bible

Proverbios 31

¹Caycunaga caycan Masa partipita ray Lemuel yachaj cayninwan rimashancunami. Chay rimashancunataga llapanta mamanmi alli goyänanpaj willaparan.

²Ïju, mañacuptë Tayta Dios yanapämaptinmi gamga yurirayqui. Canan mä sumaj willapäshayqui.

³Warmicunallaman yarpacusha ama puriychu. Achcajmi raycunapis warmi-rayculla pirdicasha.

⁴Lemuel, manami allichu mandajcunapis ni raycunapis alläpa upyallaman chayaptenga.

⁵Machacurcorga laycuna niycashantapis gongaycunmanmi. Chayno gongaycorga ñacaycajcunata mananami alliga ricanganachu.

⁶Machächicoj bïnuga caycan llaquicuycajcunapämi, jagayasha wagaycajcunapämi.

⁷Llaquicuycashanta, pobrilla cashantapis gongaycunanpämi chay runacunaga upyan.

⁸Parlayta mana yachajcunapa faburnin cay. Washänanpaj pïninpis mana captin washay.

⁹Upällallaga ama cacuychu. Llapantapis alli arriglay. Pobricunatawan umildicunataga washay ari.

¹⁰Alli warmiga sasa tariymi. Cuyayllapaj achic-achicyaycaj perlascunapa risyunpis manami aypanchu.

¹¹Alli warmin captenga llapan shongunwanmi runan yäracun. Chayno alli warmiwanga manami imaypis ushapacanchu.

¹²Chay warmiga cawashancama majanta allimi yanapan.

¹³Millwatawan lïnuta ashiriycur, cushisha ima awallatapis awan.

¹⁴Imanömi jatuncaray büqui nigusyuta apan, chaynömi carupa aywaycur wasincho micunanpaj imallatapis ashircur apamun.

¹⁵Chaca chacalla jatarin. Nircorga wamrancunatawan uywaynincunata garariycun.

¹⁶Chacratapis sumaj ricaycur-raj rantin. Arur gänashanwannami übasta lantachin.

¹⁷Chegllata sumaj chanaj watacurcur aruyta gallaycun. Sumaj yarpaypa mana guellanaypa arun.

¹⁸Nigusyuncho alli gänananpämi sumaj arun. Pacha chacarcuptinpis chacaycamarämi ima ruraynincunatapis ruran.

¹⁹Quiquin puchcata puchcan. Quiquinmi awata awan.

²⁰Wacchacunatawan pishipacajcunataga mana gongaypa imallatapis macyaycun.

²¹Chay warmiga manami llaquicunchu rashtaptin ni gasapaptinpis. Paypa famillyanga alli racta röpashami carcaycan.

²²Quiquinmi gatancunatapis awacun. Alli röpacunallatami jaticunpis.

²³Runantaga llapanmi marca-masincunapis rejsin. Runanpis waquin runacunawan iwal rispitädumi caycan.

²⁴Röpacunatapis ruran. Wachcucunata awan. Nircur nigusyanticunata ranticun.

²⁵Waracuna imamanpis chayananpitaga manami manchacunchu. Ni imapitapis mana pengacunchu, ni llaquicunpischu.

²⁶Sumaj yarpachacurcurmi alli tantiyaj cayninwan parlan. Sumaj tantiyachir alli shimillanwanmi yachachin.

²⁷Wasincho imallanpis pishiycashantaga ricaycan musyaycanmi. Quiquin arucur ruracur tarishantami micun.

²⁸Alli warmi captinmi mamanta wamrancuna cuyan. Majannami alabashpan nin:

²⁹«Alli warmicunaga achcajmi caycan. Chaypis gammanga manami mayganpis tincunchu.»

³⁰Buena-mösa cashanpis yanga manacajllapämi. Cuyayllapaj cayninpis rätu ushacajllami. TAYTA DIOSNINCHÏTA rispitaj warmimi ichanga alli rispitasha canga.

³¹Llapan runacunapa ñaupanchöpis paytaga alabay-llapa. Allita rurashancunapita fiyupa rispitasha caycullächun.