Read Tayta Diosninchi Isquirbichishan Proverbios 4 Bible Online

Proverbios 4 - Tayta Diosninchi Isquirbichishan bible

Proverbios 4

¹Wamracuna, taytayqui willapäshushayquitaga sumaj wiyacunqui. Umayquiman sumaj churacunqui alli tantiyaj canayquipaj.

²Nogaga allimi yachachishcä. Chay yachachishäcunataga ama gongaychu.

³Nogapis mama taytawanmi goyashcä. Amatar cuyarmi paycunaga uywamaran.

⁴Papänëmi yachachimar willapämar cayno nimaj: «Llapan willapashäcunata umayquiman sumaj churacuy. Willapashäcunano rurarga allimi goyanquipaj.

⁵Yachaj canayquipaj willapashäcunataga sumaj wiyacuy. Willapar yachachishäcunataga ama gongaychu.

⁶Yachaytaga fiyupa cuyanqui. Ama cachaycunquichu. Mana cachaycuptiqui yachayga fiyupa allimanmi churashunquipaj.

⁷Imatapis cachaycur rimëruga yachaytaraj umayquiman sumaj churay tantiyaj canayquipaj.

⁸Yachayta cuyaptiqui yachayga allimanmi churashunquipaj. Llapan shonguyquiwan fiyupa yachayta munaptiquega pipis allimi rispitashunquipaj.

⁹Nishäcunata wiyacorga sumaj adurnashanömi caycanquipaj. Achic-achicyaycaj corönashanömi canquipaj.»

¹⁰Ïju, llapan willapashäcunata sumaj wiyacuy. Willapashäta wiyamarga unaycamami cawanquipaj.

¹¹Quiquëmi llapan yachachishäcunata sumaj tantiyachishayqui. Alli caminupami purichishayqui.

¹²Alli caminupa purerga manami mana alliman chayanquipächu. Llutancunamanpis manami chayanquipächu.

¹³Willapar yachachishushayquicunataga umayquiman sumaj churacuy. Ama gongaychu. Willapäshushayquicunata wiyacorga allimi goyanquipaj.

¹⁴Mana allita ruraj runacunamanga ama tallupaychu. Mana allita rurashancunataga ama yachacunquichu.

¹⁵Paycuna goturashanmanga ama yaycapanquichu. Yaycunayquipa ruquenga tumarcur juc-läpa päsacunqui.

¹⁶Mana allita rurananpaj yarpashanta manaraj rurashancamaga manami jamaytapis tarinchu. Pitapis manaraj mana alliman chayachishancamaga paycunapäga manami puñuypis puñuychu.

¹⁷Paycunaga mishquilla micuycaj-nirajmi mana allita ruran. Mishquilla upuycaj-nirajmi wañuchicun.

¹⁸Alli runacuna alli goyashanga caycan pacha warämur achicyajnömi.

¹⁹Juchasapacuna mana alli goyashanmi ichanga caycan fiyupa manchacuypaj yanauyaycaj chacayno. Chay runacunaga manami musyanchu imaman tacacushantapis.

²⁰Ïju, willapashäcunataga sumaj wiyacuy. Willapashäcunataga mana gongaypa yarparay.

²¹Tantiyachishäcunata ruraytaga ama gongaychu. Llapanta sumaj umayquiman churacuy.

²²Willapashäcunami wiyacojcunataga alli goyayta tarichin.

²³Ima-aycayquitapis cuydashayquipita masta cuyday shonguyquicho yarpashayquicunata. Yarpashayqui imanöpis cashanpitami goyanqui allipis u mana allipis.

²⁴Umayquipita jorgurcur manacajcunataga ama rimanquichu. Ama llullacunquichu.

²⁵Chayanayquipaj cajllaman yarparay. Juc-lämanga ama yarpaychu.

²⁶Mayman japaycashayquitapis sumaj ricay. Alliman japarga manami tuninquipächu.

²⁷Alli caminupa puriycashayquipitaga janaman ni uramanpis ama yaycunquichu. Mana allicunataga ama ruraychu.