Read Tayta Diosninchi Isquirbichishan Proverbios 6 Bible Online

Proverbios 6 - Tayta Diosninchi Isquirbichishan bible

Proverbios 6

¹Ïju, bisïnuyquita garantiyasha carga, jäpa runata garantiyasha carga

²quiquillayquimi mana alliman chayaycanqui. Shimillayquipitami achcaman tuninquipaj.

³Ïju, garantiyashayquipita jucpa munayninman chayasha carga noga nishäta ruray. Pengayta juc-läman jitaycur yanasayquiwan alli arriglay.

⁴Ama wiyaräcuychu. Ni jamaytapis ama tariychu arriglanayquicama.

⁵Runa wañuchinanpita lluychu gueshpishanno ayguicuy. Runa charinanpita pichiusa gueshpishanno gueshpicuy.

⁶Ticsacuna imano rurashallantapis ricacuy guella runacuna. Ticsacuna imano rurashallantapis ricaycur yachacuy.

⁷Paycunapaga mandajninpis manami canchu. Imata rurananpäpis pipis manami mandanchu.

⁸Niycarmi usya quillallacho micuynincunata shuntacun. Micuy cashan wichallan shuntar churacun.

⁹Guellacuna, ¡ama puñuräcuynachu! ¡Ama jitaräcuynachu!

¹⁰Puñucushayquicama, jajtaycashayquicama, maquiqui ogllasha cacushayquicama,

¹¹muchuyga puricachaj runa-jina pillyacunan aptasha magashunayquipaj shamojnörämi chayapaycushunquipaj.

¹²Mana alli ruraj runacunaga llullacushpan runapa washanta rimallarmi purin.

¹³Ñawillanwan guepishtapan. Chaquincunawan dëduncunawan sëñapäcuytami yachan.

¹⁴Mana allicunallatami yarpanpis. Mana allicunata yarpachacuraycällarmi purinpis. Pï-maytapis inrïduta rurallarmi purinpis.

¹⁵Chaypitami illajpita ñacayman chayapayconga. Mana yarpashapitami tucuy-niraj mana allicunaman chayanga. Juc ñipiyllachömi ushacanga.

¹⁶Sojta castata, asta ganchis castatami TAYTA DIOSGA fiyupa melanäcun:

¹⁷Alli-tucojcunata, llullacunata, alli goyäcoj runata wañuchejta,

¹⁸jucha aparicuyllapaj yarparajta, juchata rurallar cörricachajcunata,

¹⁹llullacur jucpa contran declarajcunata, castanwan pillyananpaj inrïduta rurajcunata.

²⁰Ïju, taytayqui willapäshushayquicunata sumaj wiyacuy. Mamayqui taytayqui yachachishushayquicunata ama gongaychu.

²¹Mana gonganayquipaj shonguyquicho sumaj yarparay. Perlas piñi wallgata wallgarajnöpis mana yamacaypa yarparay.

²²Maypa aywaptiquipis chay yachachishäcunaga allimanmi chayachishunquipaj. Ima mana allipitapis chapäshunquipämi. Riccharcuptiquinami alli yarpayta goshunquipaj.

²³Mandamintucunaga achqui tübu rataycajnömi caycan. Yachachicuypis achquinömi. Corrijimashanchïta piñacamashanchïta sumaj wiyacorga alli cawaytami tarishun.

²⁴Mañösa warmipita, alli shimillanpa jäpa warmi luwarta goshuptiquipis chapäshunquimi.

²⁵Chay warmi cuyayllapaj car luwarta goshuptiquipis ama rimapanquichu. Ñipchipar ricapäshuptiquipis ama gaticurcunquichu.

²⁶Guellayllapaj runata chasquej warmiwan cacorga micunanpaj cajtapis runa ushanmi. Majanta ganrachej warmiwan cacurmi ichanga pirdicanna.

²⁷Pipis shanshata millgayninman wiñacorga röpantami rupaconga.

²⁸Pipis shansha jananpa purerga chaquintami rupaconga.

²⁹Chaynömi runapa warminwan cacojpis juchata aparicushanpita castïgucho canga.

³⁰Micunanpaj mana captin pachanpaj suwacojcunataga manami pipis jamurpanchu.

³¹Mana jamurparpis suwacushanta tariparga suwacushanpita ganchis cutipa mastarämi pägachenga. Chayno, jananmanpis imata charashallantapis ushajpämi guechonga.

³²Runapa warminwan cacöga mana tantiyacoj upa runami. Chayno carga quiquillanmi pirdican.

³³Juchata rurashanpitami magar-ushashapis, ashllir ushashapis canga. Chayno pengaycho cashanpitaga runacuna manami imaypis gongangachu.

³⁴Runan musyaycorga chay runapaj fiyupami rabyacurconga. Chayno car manami perdunanganachu.

³⁵«Mana allita rurashäpita pägashayqui» niptinpis manami munangachu. Ni ima-aycata pägayta munaptinpis manami perdunanganachu.