Read Tayta Diosninchi Isquirbichishan Proverbios 7 Bible Online

Proverbios 7 - Tayta Diosninchi Isquirbichishan bible

Proverbios 7

¹Mañösa warmiga tucuy mäñatami yachan. Ïju, llapan willapashäcunata sumaj wiyacuy. Willapashä mandamintucunataga umayquiman sumaj churacuy.

²Mandamintuta willapashäcunata, yachachishäcunata sumaj wiyacuy. Ñawi nïñuyquita chapashayquinöraj yachachishäcunata yachacorga alli cawaytami tarinquipaj.

³Yachachishäcunataga imaypis mana gonganayquipaj umayquiman sumaj churacuy. Maquiquiman isquirbiy.

⁴Yachaytaga «pañëmi canqui» niy. Yarpaysapa caytapis «castämi canqui» niy.

⁵Chaycunami salbashunquipaj runapa warminpita, alli shimillanpa luwarta gocoj warmipitapis.

⁶Juc junaj, ricchacuycarä wasëpa bentäna rëjas uchcullanpa.

⁷Ricapaycarä mana tantiyacoj mösucunata. Chaycho ricapaycarä mas mana yarpachacoj mana tantiyacoj caj mösuta.

⁸Chay mösuga cälli isquïnaman chayar jucaj-lä cälliman chimpariran mañösa warmipa wasin caj-läman.

⁹Intiga yagashana captin, pachaga chacaycaranna.

¹⁰Mañösa warmiga illajpita llojshiriran tincunanpaj jipash tucur, milluycachaycar, guepishtaycachar.

¹¹Chay warmiga wasinta cachaycur-cachaycur puricoj warmimi. Näni quinraycho wapiycachayllatami yachan.

¹²Chay warmiga cällicunapa, läsacunapa puricun. Isquïnacunacho ichiycachäcun. Pï runatapis rimir-puntata yurircoj cajta luwarta gonanpaj shuyaraycan.

¹³Chay warmi yarpayniynaj mösuwan tincurcorga juclla macallacurcusha, muchayta gallaycusha. Mana pengacuypa nisha:

¹⁴«Alli goyaypita sacrifisyuta garanäpämi aunirä. Chayno aunishätaga canan junajmi cumlishcä.

¹⁵Chaymi gamwan tincoj llojshimushcä. Gamwan tincuytaga fiyupami munarä. Yarpashänöllami tincuycunchi.

¹⁶Cämämanpis mashtashcä Egiptucho awashan lïnupita cuyayllapaj cullchatami.

¹⁷Cämätaga pichushcä mïrra, áloe, canëla perfümiwan.

¹⁸Wasëman juclla yaycushun. Warayllata cacushun. Munashanchïno waräcushun.

¹⁹Runäga manami caychöchu. Carupami aywacusha.

²⁰Chaychica guellayta apacurcurmi aywacusha. Llëna quillachörämi cutimonga» nir.

²¹Chayno cuyacoj shiminwan parlapaycällar, yaparir-yaparir niycällar mösutaga aunichisha.

²²Aunircorga mösupis warmipa guepanta wasiman yaycusha. Pishtananpaj quiquillan töru aywacuycajno, togllaman lluychu yaycupaycoj-japuy yaycusha.

²³Aywasha wañunanpaj cashanta mana musyashpan trampaman pichiusa yaycupaycojno. Shongunpa tucsipaycuptinrämi mayanga.

²⁴Ïju, chaymi sumaj wiyacamay. Willapashäcunataga llapanta sumaj tantiyacuy.

²⁵Chay-niraj warmitaga ama parlapanquipischu ni munapanquipischu. Chay-niraj warmillapitaga ama llutancunaman chayanquichu.

²⁶Chayno warmicunaga achca runatami wañuyman chayachisha. Wañuchishancunaga aypallami.

²⁷Chay-niraj warmicunaman aywaparga caycanqui wañuyman aywapaycajnönami.