Read Tayta Diosninchi Isquirbichishan Eclesiastés 1 Bible Online

Eclesiastés 1 - Tayta Diosninchi Isquirbichishan bible

Eclesiastés 1

¹Cayga caycan yachachicoj isquirbishanmi. Payga caran Davidpa wamranmi. Paymi Jerusalencho ray caran.

²Noga yachachichöga në: ¡Llapanpis yangallami! ¡Yangallami!

³¿Imataraj jorgun runaga cay pachacho may-jina ñacar arurpis? Manami imatapis jorgunchu.

⁴Runaga yuriycan, y wañuycan. Cay pachami ichanga imaypis mana rucanchu.

⁵Intipis yagarcamun, yagacurcun. Yapay yagarcamun yapay yagacurcun.

⁶Wayraga yaparir yaparirmi wayraycan. Wayra sur caj lädupa wayran. Nircorga norte caj lädupana tumamun. Imaypis chaynöllami wayraga wayraycan.

⁷Mayucunaga llapan aywar chayaycan lamarllaman. Chaypis lamarga manami imaypis juntamunchu. Mayucunaga cutin llojshimushanman imaypis aywashanno yapay aywananpaj.

⁸Llapanpis fiyupami uticächicun. Runaga imanöpa tantiyachiytapis manami puydinmanchu. Chaypis runaga mana yamacaypami ricaycan; mana yamacaypami wiyaycan.

⁹Unay cashanga yapaymi canga. Unay ruracashanga yapaymi ruracanga. Cay pachachöga manami imapis canchu mushojraj yurimöga.

¹⁰Waquenga nenga: «¡Caymi ichanga imaypis mana cashan!» nir. Chaypis maynami caran manaraj noganchi cashanchi wichan.

¹¹Unay cashancunataga gongaycärishami. Chaynöllami canan caycajtapis shamoj watacunachöga gongayconga. Guepata yurej cajtapis mas guepa runacuna gongaycongami.

¹²Noga yachachicöga Jerusalenchömi Israelcunapa raynin carä.

¹³Nogaga cay pachacho imano goyashallanchïtapis sumaj musyanäpaj estudyarä. Alli tantiyanäpaj llapan shongöpa estudyarä. Tayta Diosmi camacächisha chayno estudyananchïpaj. Runacunapäga chay estudyu fiyupa sasami caycan.

¹⁴Chaymi tantiyacushcä llapanpis cay pachacho rurashanchëga manacajllapaj cashanta. Wayrata chariyta munajnöllami caycanchi.

¹⁵Wicsushatapis manami allchayta camäpacunchïnachu. Mana captinnaga manami yupashwannapischu.

¹⁶Shongullächo yarparä: «Canan nogaga sumaj yachajmi cä. Ñaupäta Jerusalencho caj raycunapita masmi musyaj yachaj cä» nir.

¹⁷Llapan shongöpami yachaj canäpaj estudyashcä. Llutan ruraycuna imano cashantapis estudyashcä. Ichanga chaycunapis caycan wayrata chariyta munashanchïnöllami.

¹⁸Rasunpaga mas yachaj carga masmi uma nanayta tarenga. Mas yacharga masmi ñacanpis.