Read Tayta Diosninchi Isquirbichishan Cantares 2 Bible Online

Cantares 2 - Tayta Diosninchi Isquirbichishan bible

Cantares 2

¹Nogaga cä Saroncho caj rösa waytami. Ragra pampacunacho caj liryu waytami cä.

²Cashacuna chaupincho caycaj lirio waytanömi cuyaynëga jipashcunapa chaupincho caycan.

³Munti chaupincho mansäna yöra wayuraycajnömi cuyaynëga waquin runacunapa chaupincho caycan. Llantuyninman jamaycorga fiyupami cushicö. Wayuyninpis fiyupa mishquejmi.

⁴Alli micuyta micurcaycashan fista wasimanmi pushamasha. Chaychöga fiyupa cuyamashpanmi ogllamasha.

⁵Payta cuyayllawanmi wañucuriytapis munaycäna. Päsaspita pastilcunata garamay ari. Mansänacunatapis garamay ari.

⁶Jucaj maquinta jawanapaycamanman ichanga. Jucaj maquinwanna macallarcamanman ichanga.

⁷Munti lluychucuna-raycu, tarushcuna-raycu aunimay ari Jerusalén jipashcuna cuyaynë puñucuycajta mana ricchachinayquipaj. Puñucuchun puñuyta sacsashanyaj.

⁸Cuyaynëga aywaycämunnami. Ïcunta wiyaycänami. Jircapa pintircur pintircurmi aywaycämun. Puytush lömacunapa patacunapapis pintircur pintircurmi aywaycämun.

⁹Cuyaynëga lluychunömi: Lluychu-mallwanömi. ¡Chaychönami caycan! ¡Puncu wajtanchönami! Bentänapa rëjasllanpami watgaycämun.

¹⁰Cuyaynë, jatariy. Fiyupa cuyashä warmi, caypa shacamuy ari.

¹¹Tamya quillacunaga päsashanami. Tamyaga mananami cannachu.

¹²Intëru jircachömi waytacunapis pashtacaramusha. Cantananchi wichan chayamushanami. Tiyashanchïpaga wiyacaycannami palumacuna cantashanpis.

¹³Ïgus yöracunapis wayuraycannami. Übas chacracunapitapis cuyayllapaj asyaynin mayacaycämunnami. Cuyaynë jatariyna ari. Fiyupa cuyashä warmi caypa shacamuy ari.

¹⁴Cuyashä paluma, gamga pacacuycanqui gagacunamanmi. Ama pacacuychu ari. Cärayquita ricaycushaj ari. Busniquita wiyarcushaj ari. Gam rimashayquega maysi wiyacuyllami. Gamga maysi ricapäcuyllami canqui.

¹⁵Übasninchëga waytaraycanmi. Tacsha atojcunami übasninchïta ushaycan. ¡Charipämay-llapa atojcunataga!

¹⁶Cuyaynëga nogallapami. Nogapis payllapami cä. Payga uywancunata michin liryu waytacuna caycashallanpami.

¹⁷Manaräpis pacha waraptin, manaraj llantuy illgashancama juclla cuticallämuy ari. Lluychu-mallwa chunyaj puntacunaman cutishanno juclla cuticallämuy ari.