Read Tayta Diosninchi Isquirbichishan Cantares 4 Bible Online

Cantares 4 - Tayta Diosninchi Isquirbichishan bible

Cantares 4

¹Cuyaynë, fiyupa cuyayllapämi canqui. Rasunpami cuyayllapaj canqui. Shucutacushayqui rurincho ñawiquicunaga caycan ishcay palumanömi. Ajchayquicunapis aypalla cabra-mallwacuna Galaad jircacunapa pañar purejnörämi caycan.

²Quiruyquicunapis llapan cuyayllapaj yurajllami carcaycan. Chayga caycan bäñashanpita uyshacuna fïlayllanpa chayraj llojshirishano; rutunanpaj alli caycajnöna. Llapanpis mana pishiypa iwal-llami caycan.

³Shimi wirpayquicunapis puca jïlunörämi caycan. Parlacuyniquega maysi wiyacuyllami. Shucutarashayqui rurincho cärayquicunaga caycan granadata pullanpa partirishanömi.

⁴Cuncayquega cuyayllapaj caycan David rurachishan cuyayllapaj törrinörämi. Chay törrichöga waranganpami jinyu suldärucunapa chapacuna escüdun waguiraycan.

⁵Ishcan chuchuyquicunaga caycan millish lluychucuna liryu waytacunapa chaupincho micuycajnöraj.

⁶Manaraj pacha warashanyaj, manaraj intipis yagamushanyaj aywashaj mïrra perfümi cashan jircaman, insinsu cashan pataman.

⁷¡Cuyaynë, gamga cuyayllapämi canqui! ¡Chaquipita umacama camaraj cuyayllapämi canqui!

⁸Majallä, aywacushun. Líbano puntapita uräcushun. Puntacunapita uräshun. Liyuncuna tiyanan machaycunapita aywacushun. Tigricuna tiyanan puntacunapitapis uräcushun.

⁹Cuyaynë, majallä, shongötami pasaypa turwatächishcanqui. Gam ricäramaptillayquimi, wallgayquicho caycaj culur jïlullawanmi shongö pasaypa cuyacurcushurayqui.

¹⁰Cuyaynë, majallä, cuyamashayquega shongöcamarämi chayaycun. Cuyamashayquega mishquej bïnupitapis mas allimi caycan. Perfümiwan pichucushayquipis llapan perfümicunapita mas cuyayllapämi asyan.

¹¹Cuyaynë, shimi wirpayquega mishquinörämi. Muchacuyniquipis lëchiwan mishqui caycajnörämi. Röpayquipis Libanucho caycaj muntipa asyayninnörämi cuyayllapaj asyan.

¹²Cuyayllä, majallä, gam caycanqui intërunpa guenchasha wertano, ushajpaj chapasha yacu pösuno, pashtaj yacuta lläbishano.

¹³Frütayoj wertanömi gamga canqui. Chay wertachömi caycan: mishquej granada,

¹⁴nardo, azafrán, cuyayllapaj asyaj läbo-olor, canëla; tucuy casta insinsu yöracuna.

¹⁵Werta chaupincho pashtaycaj pucyumi canqui. Yacu pashtaycämushan pösumi canqui. Libanupita uraycaj yacumi canqui.

¹⁶Wichaypa aywaj wayra, sumaj wayrämuy. Uraypa aywaj wayra, shamuy cayman. Wertäman wayrämushpayqui cuyayllapaj asyayninta cuyaynë cajman mashtacächiy. Chayrämi cuyaynëga wertanman shamonga. Chaycho frütacunapa mishquej wayuyninta miconga.