Read Tayta Diosninchi Isquirbichishan Cantares 6 Bible Online

Cantares 6 - Tayta Diosninchi Isquirbichishan bible

Cantares 6

¹Llapan warmicunapitapis mas cuyayllapaj warmi, ¿maypataj aywacusha cuyayniquega? ¿Maymantaj aywanman? Ashej aywashun ari.

²Cuyaynëga aywasha wertanmanmi. Payga aywasha cuyayllapaj alli asyaycaj wayta wertanmanmi. Chaymanmi aywasha uyshancunata michicoj, rösa waytacunata pallaj.

³Nogaga cuyaynëpami cä, paypis nogallapami. Payga uywancunata michin liryu waytacuna cashanchömi.

⁴Cuyaynë, gamga canqui Tirsa siudänöpis fiyupa cuyayllapämi, Jerusalén siudänöpis maysi cuyacuyllami; pipis mana ichipashan pillyaman aywaycaj suldärucunanömi.

⁵Amana ricapämaynachu ari. Ricapämashpayquega pengacachimanquimi. Ajchayquicunapis cabra-mallwacuna Galaad jircacunapa pañar purejnörämi caycan.

⁶Quiruyquicunapis llapan cuyayllapaj yurajllami carcaycan. Chayga carcaycan bäñashanpita uyshacuna fïlayllanpa chayraj llojshirisha caycajno millwanta rutunanpaj alli caycajnömi.

⁷Granadata pullanpa partirishanömi shucutayqui rurincho cärayquega caycan.

⁸Sojta chuncami (60) caycan raypa warmincunaga. Pusaj chuncami (80) caycan chïnancunaga. Raypa donsëlla jipashnincunaga aycashi caranpis.

⁹Chayno captinpis cuyashä palumäga jucnayllami. Payllatami acrashcä. Pay japallanmi caycan maman gueshyacushpan mas cuyashan cäga. Jipashcunapis ricashpan «alli goyay» nin. Raypa warmincunapis, chïnancunapis paypäga allitami parlan.

¹⁰¿Pitaj chay watgarcamun tutapa inti yagarcamojnöpis? Quillanöpis cuyayllapämi, intino achicyaycachaycaj, pipis mana ichipashan pillyaman aywaycaj suldärucunanömi.

¹¹Nuwal yöracunalla caycashan muntipa aywashcä. Aywashcä yacu aywaj ragra cantun pampa berdiraycajta ricapaj. Übas chichiycajta, granada waytaraycajta ricayta munashpämi urashcä.

¹²Chaypitaga manami musyashcänachu imano cashätapis. Raynëpa ñaupanchöna cawallu garchashan carrëtacho ricacushcä.

¹³¡Cuticamuy, Sulamita, cuticamuy ari! ¡Gamta ricaytami munä! ¡Cuticamuy ari! ¿Imano caycajtataj Sulamitataga ricayta munarcaycanqui? ¡Tolducunacho gachwajno gachwaycajtami ricayta munä!