Read Tayta Diosninchi Isquirbichishan Cantares 8 Bible Online

Cantares 8 - Tayta Diosninchi Isquirbichishan bible

Cantares 8

¹Mamäpa chuchunwan gueshpej turë canquiman caran. Chayno captenga gamwan cällicho tincushpäpis mucharcömanmi. Chauraga pipis manami jamurpämanmanchu.

²Chayno custumri captenga pushämanmi mamäpa wasinman. Chayaycacherga wasin rurimanmi yaycuchëman. Chaychöga gamnami yachachimajnë canquiman. Chaura upunayquipaj macyäman mas allinnin caj bïnuta, granadäpata gapchisha yacuntapis.

³Jucaj maquinta jawanaparcamanman ichanga. Jucaj maquinwanna macallarcamanman ichanga.

⁴Aunimay ari Jerusalén jipashcuna cuyaynë puñucuycajta mana ricchachinayquipaj. Puñucuchun puñuyta sacsashanyaj.

⁵¿Pitaj chunyajpita aywaycämöga? ¿Pitaj cuyayninta macallasha aywaycämun? Gamtaga mansäna yörapa chaquincho puñucuycajtami ricchachirä. Chaychömi mamayquitapis nanay chariran. Chaychömi mamayquega gueshyacushurayqui.

⁶Nogataga mana gongaypa yarparämay. Ricrayquichöpis jutë chäpashano cachun mana gongamänayquipaj. Cuyanacuytaga wañuytano manami pipis chapanchu. Fiyupa munanacuypitapis sepultürapitano manami gueshpinchïchu. Cuyanacushanchëga Tayta Diospa ninannömi mana upinchu.

⁷Aypalla lamar yacupis manami gongachimashwanchu fiyupa cuyanacushanchïtaga; ni mayucunapis manami chapämashwanchu. Chayno cuyanacuycajta juc runa ima-aycantapis «goycushayqui» niptenga chay runata manacajmanmi churanman.

⁸Pañinchïpaga manarämi chuchunpis pushpunrächu. Payta ashej shamuptenga ¿imatataj rurashun?

⁹Pay curral pergano sigüru captenga alli cashanpita paypa janancho guellaypitami juc palasyuta rurachishwan. Pay puncu quicharaycajno captin ichanga jananpa sedru tablacunawan chaparcushwan.

¹⁰Nogaga curral perganömi caycä. Chuchöcunapis ricchacuna törricunanömi caycan. Cuyaynëpa ñaupancho cashpäga alli goyaychönami caycä.

¹¹Salomonpaga Baal-hamonchömi übas chacran caran. Chayta täpananpämi runacunata churaran. Chay runacunami cosëcha ushayga cada-ünun waranga (1,000) guellayta pägaj.

¹²Waranga guellayga gampaj cacuchun Salomón. Chacrata ricajcunapäpis ishcay pachac (200) guellay cacuchun. Nogami ichanga übas chacräta quiquillä ricacö.

¹³Wertacunacho cuyayllapaj caycaj warmi, rimashayquita wiyashaj ari. Yanasanchïcunami wiyayta munarcaycan.

¹⁴Cuyaynë, cörrimuy ari. Lluychuno cörrimuy. Lluychupa wawannöraj alli asyaycaj jircacuna jananpapis cörrimuy ari.