Read Tayta Diosninchi Isquirbichishan Isaías 10 Bible Online

Isaías 10 - Tayta Diosninchi Isquirbichishan bible

Isaías 10

¹¡Ay imanöraj canga mana allita rurananpaj layta rurajcuna, pipis cumliyta mana puydinanpaj caj layta rurajcuna!

²Paycunaga pobricunata mana allimi rican. Ñacarcaycajtapis manami alliga arriglanchu. Biyüdacunapa ima-aycantapis guechun. Wacchacunata suwapan.

³Chayno car gamcunaga ¿imataraj ruranquipaj jusgashushayqui öra? Carupita castïgu chayashuptiqui ¿pitaraj mañacunqui? Riquësayquicunatapis ¿maymanraj churanqui?

⁴Ima ruraytapis mana camäpacur prësunami aywanquipaj; man'chäga wañojcunawan iwalmi wañunquipaj. Chaypis, Tayta Dios rabyashanpitaga manami allchacanrächu. Payga jinallarämi castigananpaj rimaycan.

⁵«¡Ay imanöraj canga Asiriapa raynin! ¡Manami musyanrächu! Payga caycan rabyasha car pitapis castigacuna guerömi. Payga caycan ollgur pitapis wirucuna guerömi.

⁶Paytami cachä acrashä juchasapa runacunata magananpaj. Rabyachimaj nasyun runacunamanmi cachä. Chayman cachä ima-aycantapis suwapänanpaj, guechunanpaj, cällicho caycaj mituta-jina lluchcargärinanpämi.

⁷Ichanga Asiriapa raynin manami chaynöchu yarpan. Ni imanillarpis manami tantiyacunchu. Payga achca nasyuncunata illgächiyllatami yarpaycan.

⁸Chaymi payga nin: ‹Llapan raycunapis munaynillächömi caycan.

⁹Nogaga charishcä Calno siudätapis Carquemis siudätanöllami; Hamat siudätapis Arfad siudätanöllami, Samaria siudäpis Damasco siudätanöllami.

¹⁰Achca nasyuncunatami charishcä aypalla diosniyojta. Jerusalencho Samariacho cashanpita mas aypalla ïduluncuna captinpis binsishcämi.

¹¹Samariata, diosnintinta imanöpis rurasha caycarga ¿manachuraj chayno ruräman Jerusalentawan ïduluncunatapis?› nir.»

¹²Sión lömatawan Jerusalenta Asiriapa rayninwan ushaycacherga paytapis Tayta Dios castigangami. Castiganga alli-tucushanpita, ollgoj car munayniyoj-tucushanpita.

¹³Asiriapa raynenga nisha: «Nogaga callpäwanmi llapantapis rurashcä. Yarpaysapa carmi imano ruranäpäpis camacächishcä. Nasyuncunapa lindancunatapis illgächishcä. Llapan riquësancunatapis charicurcushcä. Jinyu caynëwanmi raycunatapis binsishcä.

¹⁴Juc-lä nasyun runacunapa riquësancunatapis charicurcushcä. Llapan nasyuntami munaynëcho cananpaj charishcä, äbi runtunta gueshwacho cacharishanta shuntajno. Chayno ruraptë manami pipis michämashachu. Manami pipis rimacushachu.»

¹⁵Ichanga ¿mutuycaj runapita jächa mas munayniyoj-tucunmanchuraj? ¿Cuchuycajpita rusadörapis mas munayniyoj-tucunmanchuraj? ¡Tucrucuycaj runata tucruga manami munashanpa apanmanchu! ¡Shauya guerupis mas lasajtaga manami awantanmanchu!

¹⁶Chaypitami munayniyoj TAYTA DIOSGA fiyupa callpayojcunata gueshyawan gueshyachenga. Rispitananpa ruquin ninawan rupachenga.

¹⁷Israelcunapaj achquino caycaj Santo Tayta Diosmi nina rataycajmanno ticracurengapaj. Nircorga juc junajllachömi Asiria runacunata illgarachengapaj cashata shatata nina rupacurcushanno.

¹⁸Ushajpämi illgächenga cuyayllapaj muntincunata, wertancunatapis. Gueshyawan gueshyaycaj runa callpaynaj caycajtanönami cachayconga.

¹⁹Chauraga muntichöpis wallcallanami guerucuna quëdanga. Quëdaj guerucunataga wamrallapis yupanganami.

²⁰Chay wichanga wallcallapis quëdaj Israel runacuna mananami Asiria runacunaman yäracongapänachu. Chaypa ruquenga yäraconga Israelpa Santo Diosnillanmannami.

²¹Chay quëdaj Jacob famillyacunaga munayniyoj Tayta Diosllamannami yäraconga.

²²Israel runacuna lamar cantuncho agushnöraj aypalla cashpanpis wallcajllanami cutimonga. Paycunataga Tayta Diosmi jusganga. Illgächinanpaj camacächishanami caycan.

²³Munayniyoj TAYTA DIOSMI mayna nisha illgächinanpaj. Nishantaga llapantami nasyun intërucho cumlenga.

²⁴Munayniyoj TAYTA DIOSMI nin: «Sioncho tiyaycaj acrashä runacuna, ama manchacuychu Asiria runacunataga guerucunawan magashuptiqui; bastunnincunawan wirushuptiqui Egipto runacuna rurashushayquino rurashuptiquipis.

²⁵Ichanga cananpita manapis aycällatanami gamcunapaj rabyasha caycashäpita allchacäshaj. Nircorga Asiriacunatanami fiyupa rabyashpä illgächishaj.

²⁶Noga munayniyoj TAYTA DIOS Madián runacunata Oreb gagacho binsishänömi castigashaj. Munayniyoj cashätapis Asiria runacunata musyachishaj Egipto runacunata musyachishänömi.

²⁷Chay junäga jorgushäpaj lasaj guepita aparipäshushayquitami. Yüguta matancayquiman churapäshushayquitapis paquirishäpaj.»

²⁸Asiria suldärucunaga Ajat partimannami chayaycämun. Migrón partipami aywaycämun. Micmas partimanmi guepincunata churaycan.

²⁹Mayuta päsaycämun. Geba partichöna pachacun. Ramá runacuna fiyupa manchariycan. Saúl tiyashan Gabaacho tiyajcunaga gueshpir aywacuycan.

³⁰¡Gaparay ari Bat-galim runacuna! ¡Chayta wiyay ari Laisa runacuna! ¡Ay imanöraj canga Anatot marca runacuna!

³¹Madmena runacuna machiypa-machir gueshpir aywacun. Gebim runacunana pacacaycärin.

³²Canan örami Asiriacunaga Nobcho jamaycärin. Nircorga chaycho camariconga Jerusalenpa jircan Sionman magaj imano yaycunanpäpis.

³³Ricay-llapa Asiria runacunata. Paycunaga jatun guerucunanömi. TAYTA DIOSGA munayninwanmi chay guerucunata sajtargärin. Jatusajnin caj guerucunatapis muturishanami. Mas jatunnin cajcunapis pampachönami jitarpaycan.

³⁴Jächawan mutuypami sajtargärin jirasha caycaj muntitapis. Libanucho mas cuyayllapaj caj guerucunapis ñitinacur-ñitinacur paquicar aywacun.