Read Tayta Diosninchi Isquirbichishan Isaías 11 Bible Online

Isaías 11 - Tayta Diosninchi Isquirbichishan bible

Isaías 11

¹Tumpupitaga chillguinmi. Chaynöllami Davidpa papänin Isaïpitapis juc ray yurenga.

²Paychöga TAYTA DIOSPA Espiritunmi caycangapaj. Chaymi yachaj canga; yarpaysapa canga; yarpachacuycur imatapis ruranga; callpasapa canga; musyaj canga; TAYTA DIOSTA rispitanga.

³Payga TAYTA DIOSTA rispitashpanmi fiyupa cushiconga. Payga manami ricärillarchu jusganga. Castigacänanpäpis manami jucpa shimillanwanchu nenga.

⁴Pipis mana yanapashancunata alli arriglanga. Nasyuncho caj pobricunatapis rispitacachenga. Paymi nenga ñacachicojcuna castigacänanpaj. Paypa jämaynenga espädanömi fiyucunata wañurachenga.

⁵Pay imaypis alli cajllata, rasun cajllata ruraj cashanmi canga chegllanta watacunanno.

⁶Chauraga atojpis uyshawan tallushanami purengapaj. Tinriwan cabra-mallwapis iwalmi puñongapaj. Besërawan liyunpis iwalmi caycangapaj. Chaycunataga juc wamrallanami michengapis.

⁷Wäcapis ösupa läduncho micur goyäconga. Wawancunapis iwalmi goturpangapaj. Liyunpis buyinömi guewatana micongapaj.

⁸Lätaycaj wamranami pucllanga fiyupa benënuyoj culebrapa uchcuncho. Chayraj wasguisha wamrapis maquinta jatenga culebrapa gueshtanman.

⁹Jerusalenchöga mananami pipis mana allita ruranganachu. Imanömi lamarcho yacu juntan, chaynömi cay pachachöpis TAYTA DIOSTA rispitaj runacunallana juntasha canga.

¹⁰Chay wichanga tumpuno caycaj Isaïpita mirar aywaj yurejmi llapan runacunata shuntanga. Llapan nasyun runacunami payta ashej aywanga. Pay caycashannami fiyupa rispitädu cangapaj.

¹¹Chay wichanga Tayta Dios yapaymi acrashan runacunata shuntanga. Cutichimonga Asiriapita, Egiptupita, Patrospita, Etiopiapita, Elampita, Sinarpita, Hamatpita, lamar cantunpa caj nasyuncunapitapis.

¹²Señalwanmi nasyuncunata musyachenga. Nircorga prësu aywaj Israelcunata shuntamonga. Judá runacunataga wacpa-caypa machicasha caycajta intërupita shuntamonga.

¹³Efraín runacunaga mananami Judá runacunata chiquipanganachu. Judá runacunapis mananami Efraín runacunata rabyapanganachu.

¹⁴Ishcan nasyunnami aywanga inti yaganan caj-lächo caycaj Filistea nasyunman. Paycunata magananpaj yagaparconga. Inti yagamunan caj-lächo tiyajcunapatapis ishcanmi ima-aycantapis guechumonga. Chaynöpami paycunapa maquinchöna canga Edom runacunapis, Moab runacunapis, Amón runacunapis.

¹⁵TAYTA DIOSMI nänita camaripanga Puca Lamar chaupinpa. Éufrates mayu jananpanami maquinta jogarconga. Nircorga fiyupa manchariypaj wayrächimonga. Chay wayranami yacutaga ganchis pachapa raquirengapaj. Chaura runacunaga llanguintapis mana jorguyllapanami yacuta päsangapaj.

¹⁶Israelcuna unay Egiptupita llojshicamur jatun näninpa shamushannömi Asiriacho quëdajcunaga jatun nänipa cutimongapaj.