Read Tayta Diosninchi Isquirbichishan Isaías 13 Bible Online

Isaías 13 - Tayta Diosninchi Isquirbichishan bible

Isaías 13

¹Amozpa wamran Isaiastami Tayta Dios ribilaran shamoj watacunacho Babilonia nasyun imano cananpaj cashantapis.

²¡Jachaynaj gala puntacho señalta jawiy pillyayta gallaycärinanpaj! ¡Suldärucunata niy pillyaj yaycunanpaj! ¡Yaycunan puncupa Babiloniapa mandajnincuna yaycunanpaj maquiquiwan sëñata ruray-llapa!

³Nogata sirbimajcunata maynami gayashcä. Acrashä pillyay yachaj jinyu runacunata cachashcänami paycunawan castigachinäpaj.

⁴Masqui wiyay. Aypalla runacuna shuntacasha cashanmi puntacunapita wiyacaycämun. Masqui wiyay. Achca nasyun runacuna shuntacaycur gaparashanmi wiyacaycämun. Munayniyoj TAYTA DIOSMI shuntaycan pillyaman aywananpaj camaricusha caycaj suldäruncunata.

⁵Caru nasyunpitami aywarcaycämun. Allpapa cuchun syëlupa chaquinpitami aywaycämun. Chay aywaycämöga TAYTA DIOS rabyar castigacunanmi. Runacunata ushajpaj illgarachinanpämi aywaycämun.

⁶Llaquicur shanaypa shanar gaparpay-llapa. Munayniyoj TAYTA DIOS castigananpäga wallcanami pishiycan. Tayta Diosga llapantami usharenga.

⁷Chay öraga llapan runapami ricrancunapis warcucäcongana. Llapanpami balurninpis mana canganachu.

⁸Fiyupa mancharishami ricacongapaj. Fiyupa llaquicuymi charengapaj. Cuerpuncunapis fiyupami nanacuycongapaj. Chauraga warmi nanaycho caycajnörämi milluycachangapis. Jucninpis-jucninpis mancharishami ricapänacongapaj. Pengacuyllawan cärancunapis pucayacäcongapaj.

⁹TAYTA DIOS castiganan junäga chayaycämunnami. Chay junäga manchariypämi cangapaj. TAYTA DIOS fiyupa rabyasha cashpanmi cay pachataga ticrarachengapaj chunyaj chaqui jircaman. Cay pachacho caj juchasapacunataga ushajpämi illgächengapaj.

¹⁰Intipis yagarcamullarnami chacacäconga. Quillapis mananami achicyanganachu. Goyllarcunapis manami achicyanganachu. Janaj pachaga pasaypa yanauyaycajmi ricacongapaj.

¹¹Tayta Diosmi nin: «Allpacho tiyajcunataga ushajpämi illgächishaj. Mana allita rurashanpitami runata castigashaj. Mana rispitacojcunatawan alli-tucojcunatapis pengaymanmi churashaj. Alli-tucoj fiyu runacuna manami canganachu.

¹²Nogami camacächishaj runacunaga Ofircho alli caj gorinöpis juc ishcayllana quëdananpaj.

¹³Chay öraga syëlupis chucchongami. Cay pachapis cuyurishpan caycashanpita witengami. Chaynöga cangapaj chay junaj fiyupa rabyaptëmi.

¹⁴«Chay öra runaga Babiloniapita cada-ünunmi nasyunninman-cama gueshpir cuticonga. Cada-ünunmi marcanman-cama cuticongapaj. Chay runacuna ricaconga gaticachaptin lluychu gueshpiycajnörämi. Uyshëruynaj juc röpa uysha mancharisha cörriyllapa gueshpiycajno canga.

¹⁵Chay junäga pitapis pacaraycajta tarerga tucsirengami. Pitapis charir wañurachengami.

¹⁶Taytan maman ricapaycaptinmi tacsha wamrancunataga pampaman pagshirgärengapaj. Wasincho caj ima-aycantapis apacongapaj. Warmintapis yaycoj fiyu runacunami charipacongapaj.

¹⁷Paycunaman pillyaj shamunanpämi Media jutiyoj nasyun runacunata shacyächej-aywä. Chay runacunaga manami guellaypäga yarpanchu. Ni gori captinpis manami cäsupanchu.

¹⁸Mösucunatapis lëchawanmi wañurgärachenga. Manami cuyapangachu chayraj yurisha caycaj iticunatapis. Manami llaquipangachu jatullan wamracunatapis.

¹⁹Babiloniaga waquin nasyuncunapaj caycan perlasnörämi. Caldea runacunapäga fiyupa bälej perlasnömi caycan. Chayno carpis Babiloniaga illgächiptë quëdangapaj Sodoma Gomorra quëdashannömi.

²⁰Chaychöga imaypis manami runa tiyanganachu. Yapayga mananami pipis tiyanganachu. Arabia runacunapis chaychöga manami pachaconganachu. Uyshërucunapis chaychöga mananami uywancunata jamachenganachu.

²¹Chaychöga oshgu mishicunallanami tiyanga. Wasicunachöpis tucucunallanami tiyanga. Avestruzcunallanami tiyanga. Jacha cabracunallanami pañangapis.

²²Palasyucunachöpis atojcunallami aullar tiyanga. Alli palasyucunachöpis jirca animalcunallami tiyanga. Babilonia nasyunpaga öran chayaycämunnami. Manami aycäpis pishinnachu.»