Read Tayta Diosninchi Isquirbichishan Isaías 14 Bible Online

Isaías 14 - Tayta Diosninchi Isquirbichishan bible

Isaías 14

¹Israelcunata TAYTA DIOSGA cuyapangami. Paycunaga yapaymi canga acrashan runacunana. Chaynöpami yapay camacächenga Israelcuna nasyunninman tiyaj cutinanpaj. Juc-lä nasyun runacunapis paycuna cajmanmi aywanga. Nircur Israelcunawanga iwalnami tiyanga.

²Israelcunataga achca nasyun runacunami jamachenga. Nircorga nasyunnincama yan'ganga. TAYTA DIOS acrashan partichönami Israelcunaga uywayninman ticrachenga chay runacunata. Israelcunanami prësu apanga ñaupata paycunata prësu apajcunataga. Ñaupata ñacachejcunatapis paycunanami mandanga.

³Israelcuna, ñacaycashayquipita uywayno fiyupa sirbircaycashayquipita TAYTA DIOS jamachishunquipämi.

⁴Chauraga Babiloniapa rayninta manacajman churashpayqui cayno rimanquipaj: «¡Masqui ricay, ñaupata ñacachicöga imanöshi caycan! ¡Ricay, imanöshi caycan chay fiyu runaga!

⁵TAYTA DIOSGA paquishami fiyu runacuna mandar charashan bäranta. Fiyu mandajcunapa munaynintapis ushacächishami.

⁶Paycunaga juc-lä nasyun runacunata fiyupami ñacachej. Mana cachaypami wirur-ushaj. Mana cuyapaypami gaticachaj.

⁷Cananmi ichanga intërucho cushisha mana yarpachacuypana goyarcaycan. Chaymi cushicuypita cantarcaycan.

⁸Mana alliman chayashayquipitaga Libanucho caycaj sedruwan pïno guerucunapis cushicunmi. Chaymi nin: ‹Babiloniapa raynin mana alliman chayashanpitaga mananami pipis mutumanchïnachu› nir.

⁹Wañojcunanami pacha rurincho ricaj-ricajlla shuyarpaycäshunqui. Wañojcuna jatarisha gamta taripäshunayquipaj. Wañoj mandajcunapis aywaycämun taripashunayquipaj. Sillunninpita jatarircaycämun gamta chasquicushunayquipaj.

¹⁰Paycunaga jucnin-jucnin tapushunquipaj: ‹¿Gampapis callpayquega ushacashana au? Cananga nogacunanöllanami caycanqui.

¹¹Cananga pï-maypita rispitasha cashayquipis ushacashanami. Cushicunanpaj tacsha arpacunatapis manami tucannachu. Caychöga cämayquipis canga ismushayquimi. Jacuyquipis canga curucunallanami.›

¹²«Pacha waray yagamoj Waraj imanöshi syëlupita shicwamushcanqui. Gamga achca nasyuncunatami binsirayqui. Cananga quiquiquitanami pampaman sajtashurayqui.

¹³Gamga shongullayquicho nej canqui: ‹Syëlucamami chayashaj. Diospa estrëllancunapa jananchömi jamanäta rurashaj. Fiyupa caru norte caj-lächo jamaycurmi mandashaj. Dioscuna shuntacänan jircachömi jamaräshaj.

¹⁴Mas altucho caycaj pucutaypa jananmanmi wichäshaj. Nogaga janaj pachacho caycaj Diosnönami cashaj› nir.

¹⁵¡Chayno yarparpis chayashcanqui wañushacuna caycashanmanmi! ¡Pacha rurinchöpis mas rurimanrämi chayashcanqui!

¹⁶Ricashojcunaga chiyacashami ricapäshunqui. Ricapäshushpayqui nin: ‹¿Caychi allpatapis chucchuchej runa? ¿Caychi llapan nasyuncunatapis illgächej runa?

¹⁷¿Cay runachi intëru pachata chunyajta cachaycoj, siudäcunatapis illgächej, prësucunatapis mana cacharej?› nir.

¹⁸Nasyuncunapa raynincunaga llapanpis pamparashan uchcucunachömi cushisha pamparäcun.

¹⁹Gamtami ichanga mana pampashurayquichu. Pampacho jitaraycarmi ayayqui quëdasha. Ganratanömi lluchcacur ushashurayqui. Nircorga guërracho wañusha quëdajcunatanömi ragraman garpurishurayqui.

²⁰Gamtaga manami waquin raycunatanöchu pampashunquipaj nasyunniquita mana alliman churashayquipita, marca-masiquicunata wañuchishayquipita. Mana allita rurajcunapita mirajcunataga manami pipis yarpanganachu.

²¹Chay ray fiyu cashanpita wamrancunata wañuchiy. Chaura chay wamrancunaga manami yarpanganachu nasyuncunapa mandajnin cayta, ni intërucho siudäcunata ruraytapis.»

²²Munayniyoj TAYTA DIOSMI nin: «Babiloniata ushajpämi illgächishaj. Chaycho quëdajcunataga wamrancunatapis willcancunatapis ushajpämi wañuchishaj.

²³Chay partitaga ticrarachishaj mitu-mitu gochamannami, chushyajcuna tiyanallanmannami. Illgächicuna pichanawanmi illgächiypa pichashaj.» Munayniyoj TAYTA DIOSMI chayno nisha.

²⁴Munayniyoj TAYTA DIOSMI jurashpan nisha: «Yarpashänöllami rasunpa canga. Nishänöllami llapanpis canga.

²⁵Acrashä nasyunchömi Asiria runacunataga ushajpaj illgächishaj. Altu puntäcunachömi ñitirishaj. Acrashä runacunata yügu ñacachishanno manami ñacachenganachu. Lasaj guepita apachishanno manami ñacachenganachu.

²⁶Cay pachacho caj nasyuncunapäga chayno cananpämi nishcä. Llapan nasyun runacunata castiganäpämi caycä.

²⁷Manami pipis michämangachu. Pipis mananami jucno cananpaj yarpächimanganachu. Noga Munayniyoj TAYTA DIOSMI chayno nishcä.»

²⁸Ray Acaz wañushan watachömi Tayta Dios ribilashanta Isaías willacuran:

²⁹Filistea nasyun runacuna ama cushicuychu magaycäshushayqui Asiriapa raynin juc bastun paquejno wañushanpita. Juc culebra llojshishan uchcupita mas benënuyoj culebranami llojshimonga. Chaypa guepanmanga mas fiyupa benënuyoj buylaj culebrapis llojshimongami.

³⁰Pobricunapäga cangapämi uyshancunata michinanpaj guewapis. Imanpis mana caj runapis cushishami goyangapaj. Ichanga Tayta Dios camacächenga gam tiyashayqui nasyun runacuna yargaypita wañunanpaj. Cawaycar quëdaj cajcunatapis ushajpämi Tayta Dios wañuchenga.

³¹¡Filistea runacuna llapayqui llaquicuy! ¡Nanaywan gaparpay! ¡Manchariywan sicsicyay! Norte caj-läpitami suldärucuna aywaycämun pucutayno jirca ñitejraj. Fïlanpa aywaycämushanpitaga manami ni juc runapis llojshinchu.

³²Chay nasyun runacunapa cachancunataga ¿imatataj nishwan? Paycunataga nishun: «Sión lömataga TAYTA DIOSMI sumaj camacächisha. Acrashan runacunacho ñacajcunapis chaymanmi pacaconga» nir.