Read Tayta Diosninchi Isquirbichishan Isaías 16 Bible Online

Isaías 16 - Tayta Diosninchi Isquirbichishan bible

Isaías 16

¹Cay pachapa mandajninpäga Sión lömaman apachiy manta uyshacunata chunyaj jircacho caycaj Selapita-pacha.

²Arnón mayuta päsanachöga Moab warmicuna ricaconga gueshtancho caycaj äbita imapis mancharaycachiptin gueshpir aywacojnömi.

³Chay warmicunami Sionta nin: «Yarpachacuy imanöpapis nogacunata pacaycamänayquipaj. Nogacunata washämay ari. Junaj caycaptin llantuyniquiwan chapacurcuy chacayno ricacunanpaj. Jitarisha caycajcunataga pacaycamay ari. Ama ‹caychömi pacaraycan› niycuychu.

⁴Gueshpiycaj Moab runacunaga gamcunaman guellicamuchun ari. Gaticachajcuna wañuchinanpita pacaycuy ari.» Ñacachejcuna manana captin, wañuchicojcunapis manana captin, nasyunpita fiyu runacunapis aywacuptinnaga

⁵Davidpita mirajnami Jerusalencho ray cangapaj. Payga canga cuyapäcojmi. Payga canga mana suwacoj juezmi, alli arriglajmi. Payga alli cajllatami ruranga.

⁶Musyanchïnami Moab runacuna alli-tucushanta, waquinpita mas munayniyoj-tucushanta, pitapis mana rispitaj cashanta, baduläqui cashanta.

⁷Chayno cashanpitami Moab runacunaga nasyunnin imano caycajtapis ricaycärir wagangapaj. Fiyupa llaquicurmi wagangapaj, chaquisha übaspita llapshalla mishquej tantata Kir-haresetcho micushanpaj yarpar.

⁸Hesboncho, Sibmacho caj übascunaga wañuytacäcushanami. Chay übascunapa rämanga Jazercamami chayaraj. Chunyajcamami chayaraj. Lamarpita mas washacamami chayaraj. Chaytami juc-lä nasyunpa mandajnincuna pedäsu rurasha.

⁹Chaypitami wagashaj Sibmacho caj übascunapaj, Jazercho caj übascunapäpis. Hesbonpäwan Elealepäpis amatarmi wagashaj. Cosëcha timpu micuy goturaycashan jananchömi runacunaga pillyar gaparpanga.

¹⁰Chacracunachöpis mananami cushicur gaparpanganachu. Manami übas chacracunachöpis cantanganachu. Übastapis manami gapchenganachu bïnuta rurananpaj übas lluchcacunancho. Mananami cushicur gaparpanganachu.

¹¹Chaymi shongöpis fiyupa llaquicur ushaycan Moabpäwan Kir-haresetpäga. Arpapa cuerdasninnöraj sicsicyaycan.

¹²Moab runacuna puytush lömacunaman aywashpan uticänancama chaycho mañacushanpis, capillancunaman mañacoj aywashanpis manacajllapämi canga.

¹³Chaynömi TAYTA DIOSGA niran Moab nasyunpaj. Chaytaga niran unaynami.

¹⁴Cananga TAYTA DIOS nin: «Piyun quimsa wata conträtuta ushashannöllami cananpita quimsa watataga Moab nasyunpa munayniyoj caynin ushacanga. Aypalla runacuna cashpanpis cawaycar quëdajcunaga cangapaj wallcallanami, munayniynajllana.»