Read Tayta Diosninchi Isquirbichishan Isaías 19 Bible Online

Isaías 19 - Tayta Diosninchi Isquirbichishan bible

Isaías 19

¹Egipto imano cananpäpis Tayta Dios ribilashanta Isaías cayno willacuran: Masqui ricay TAYTA DIOSTA. Egiptuman aywaycämun fiyupa cörrej pucutay jananchömi. Paypa ñaupanchöga sicsicyanmi Egiptucho caycaj ïdulucunapis. Egipto runacunapis fiyupami mancharin.

²Tayta Diosmi nin: «Nogami camacächej-aywä Egipto runacuna rimanacur raquicänanpaj. Chaynömi camacächishaj quiquin-pura pillyananpaj. Amïgu-purami pillyanga. Marca-purami pillyanga. Nasyuncunata mandaj-purami pillyanga.

³Egiptucunapa yarpaynintami pirdichishaj. Imata rurananpaj yarpashancunatapis manami camacächishächu. Chauraga imata rurananpäpis tapucongapaj ïdulucunata, brüjucunata, wañojcunapa almanta, musyacojcunatami.

⁴Nogami Egipto runacunataga churashäpaj fiyu mandajpa munayninman. Paycunataga mandangapaj fiyu raymi.» Munayniyoj TAYTA DIOSMI chayno nisha.

⁵Nilo mayupis pishengami. Chay mayuga ushajpämi chaquengapaj.

⁶Egiptupa aywaycaj yacucunaga wallca wallcalla yauyaycällarna ushajpaj chaquenga. Chauraga shogushcunapis, ututucunapis chaquicäconganami. Sicyacunachöpis yacu gocharashpan asyarengami.

⁷Nilo mayupa cantuncho ima mururajcunapis llapanmi chaquicäconga. Manami imapis canganachu.

⁸Nilo mayucho pescädu charejcunapis llaquicushpan nanächicuypanöraj wagayman churacanga. Redawan pescäduta charejcunapis fiyupami llaquiconga.

⁹Lïnuta awajcunapis ima ruraytapis manami camäpaconganachu. Lïnuta ñajchajcunapis, awajcunapis llaquicur yur'gashami ricaconga.

¹⁰Tëlata awajcuna fiyupa llaquicongapaj. Arojcunapis llapanmi ima ruraytapis mana camäpaconganachu.

¹¹¡Zoán siudäpa mandajnincunaga yarpayniynaj upa runacunami! ¡Egiptupa mandajninta tantiyachej musyacojcunapis yarpayniynaj upa tantiyachejcunami! ¿Imanirtaj faraonta cayno nin: «Nogacunaga cä unay musyacojcunapita mirajmi, unay raycunapita mirajmi» nishpan?

¹²Faraón, cananga ¿maytaj musyacojniquicuna? Mä willashunqui, mä ricachishunqui ari munayniyoj TAYTA DIOS Egiptuta imano rurananpäpis caycashanta.

¹³Zoanpa mandajnincunaga upami. Menfis siudäpa mandajnincunapis llullapashantami riguisha. Probinsyancunapa mandajnincunami Egipto runacunataga llutanta rurachisha.

¹⁴Paycunamanga TAYTA DIOSMI cachasha pantachicoj espirituta. Egipto runacunataga chay espiritucunami rasun cajtaga mana rurachishachu. Chaymi chay runacunaga carcaycan machasha runa gumitashan jananman tunir mana musyashanno.

¹⁵Egiptutaga manami pipis salbanganachu. Manami salbanganachu mandaj cajpis ni munayniynaj cajpis.

¹⁶Chay junaj Egiptucunaga cangapaj warminömi. Fiyupa mancharishpan ima ruraytapis manami camäpacongapächu TAYTA DIOS paycunata castigananpaj maquinta jogariycajta ricashpan.

¹⁷Egipto runacunaga Judá runacunata fiyupami manchaconga. Jutinta wiyarcushpallannami mancharishpan ima ruraytapis mana camäpacongachu. Munayniyoj TAYTA DIOS Egiptuta imano castigananpäpis caycashanta musyashpanmi fiyupa mancharenga.

¹⁸Chay junäga Egipto nasyuncho pichga siudächömi rimangapaj hebreo rimayta. Paycunaga munayniyoj TAYTA DIOSLLATA sirbinanpämi juranga. Chay siudäcunapami jucpaga Herez jutin cangapaj.

¹⁹Chay junäga jinan Egiptuchömi pergangapaj juc altarta TAYTA DIOSTA rispitashpan. Chay nasyunpa lindanpa ñaupanchönami TAYTA DIOSTA rispitashpan juc wanca rumitapis ichichengapaj.

²⁰Chayga señal cangapaj munayniyoj TAYTA DIOSTA Egiptuchöpis rispitashan musyacänanpämi. Paycunaga fiyupa ñacachiptinmi yanapänanpaj TAYTA DIOSTA mañaconga. Chaura paymi cachamongapaj juc salbajta imapitapis chapänanpaj, ñacaycajta jorgunanpaj.

²¹TAYTA DIOSGA camacächenga Egiptucuna musyar payta rispitananpaj. Chaura Egipto runacunapis tantiyacongami TAYTA DIOS fiyupa munayniyoj cashanta. TAYTA DIOSLLATANAMI aduranga. Sacrifisyu uywacunata pishtarcur paypaj rupachenga. Apapanga chaqui micuy ofrendacunatapis goycunanpaj. TAYTA DIOSPAJ imatapis rurananpaj auninga, cumlenga.

²²TAYTA DIOSGA Egiptucunata castigarcushpan yanapanganami. Paycunapis TAYTA DIOS nishallantanami ruranga. Chaura TAYTA DIOSPIS paycunata cuyapashpan yanapanganami.

²³Chay wichanga jatun nänimi caycangapaj Egiptupita-pacha Asiriacama. Chaura Asiria runacuna chayanga Egiptucama. Egipto runacunapis chayanga Asiriacama. Egipto runacunawan Asiria runacunaga iwalmi Tayta Diosllatana adurangapaj.

²⁴Chay wichanmi Israelpis cangapaj Egiptuwan Asiriawan iwal. Israelcunata cuyaparmi Tayta Diosga intëru munducho tiyajcunatapis bindisyunta gongapaj.

²⁵Munayniyoj TAYTA DIOSGA bindisyunta goshpan nenga: «Nogaga bindisyuntami gö acrashä Egiptuta, rurashä Asiriata, quiquëpa caj Israeltapis.»