Read Tayta Diosninchi Isquirbichishan Isaías 21 Bible Online

Isaías 21 - Tayta Diosninchi Isquirbichishan bible

Isaías 21

¹Lamar lädunpa caycaj Babilonia imano cananpäpis Tayta Dios ribilashanta Isaías cayno willacuran: Neguevpa päsar löcu wayra aywashannömi fiyupa manchacuypaj chaqui jirca nasyunpita illgächicoj suldärucuna aywaycämun.

²Fiyupa manchacuypätami Tayta Diosga ribilamasha: Engañacöga engañacun. Wañuchicöga wañuchicun. ¡Shamuy ari Elam! ¡Media jutiyoj nasyun runacunapis yaycupaycäriy! Chauraga Babiloniacho ñacaycaj runacuna manami ñacanganachu.

³Babiloniata Tayta Dios imanöpis castigananpaj cashanta musyarmi cuerpöcunapis manchariywan shiririn. Gueshyacunanpaj warmi nanaycho caycajnörämi nanächicuycäpis. Wiyashäga fiyupami llaquicaycächiman. Ricashäcunapis fiyupami manchariycächiman.

⁴Manami imano yarpachacuytapis camäpacönachu. Manchariyllawanmi fiyupa llaquicuycä. Pacha tardiyar chacänanta ñaupatacuna amatar munashäga canan ticracurisha fiyupa manchariypajmanmi.

⁵Babiloniachöga mësa maynami churaraycan. Jananman mantiltapis maynami mashtasha. Micurcaycan, upurcaycannami. ¡Jatariy mandajcuna! ¡Pillyar chapacuna escüduyquicunata llushwachay!

⁶Tayta Diosmi cayno nimasha: «Aywaycur juc ricachacoj runata churamuy, imatapis ricashantaga llapanta willacamunanpaj.

⁷Parninpa-cama cawallucuna carrëtan garachasha, u bürruncuna muntasha, u camëlluncuna muntasha aywaycämojta ricar rejsinanpaj sumaj ricapächun.»

⁸Chaypitaga ricachacoj runana gayacuran: «Tayta, ricachacunäpaj caycashallächömi goyay-goyay caycä. Chacaycunapapis waray-waraymi ricachacuycä.

⁹Parninpa-cama cawallucuna carrëtan garachasha aywaycämojtami ricaycä. Aywaycämojcuna nisha: ‹¡Canan Babiloniataga illgarachengami! Ïduluncunapis llapanmi agullasha pampacho mashtarpaycanga› nir.»

¹⁰Rïguta ërar lluchcar-ushashanno caycaj marca-masëcuna, nogaga willaycä munayniyoj TAYTA DIOSNINCHI nimashantami.

¹¹Edom runacuna imano cananpäpis Tayta Dios ribilashanta Isaías cayno willacuran: Seirpita-pachami juc gayacusha: «Ricachacoj, ¿imaynataj pacha waranga? Ricachacoj, ¿aycarätaj pishin cay ñacay päsananpaj?» nir.

¹²Chaura ricachacojna nin: «Pachaga waranganami. Ichanga chacaypis yapay chayamonganami. Masta musyayta munarga yapay cutimunqui.»

¹³Arabia imano cananpäpis Tayta Dios ribilashanta Isaías cayno willacuran: Dedán runacuna Arabiacho caycaj shatacunaman pacacuy.

¹⁴Temá runacuna, gueshpir aywacurcaycajta yacuta taripachiy. Micuytapis garay.

¹⁵Paycunaga gueshpicurcaycan sabliwan wañuchinanpitami, lëchawan illapananpaj apuntaraycajpitami, manchariypaj guërrapitami.

¹⁶Tayta Dios cayno nimaran: «Piyun juc wata conträtuta ushashannöllami cananpita juc watataga Cedar munayniyoj cashanpis ushacanga.

¹⁷Lëchawan illapaj jinyu Cedar runacunaga wallcallanami cawaycar quëdangapaj.» Israelpa TAYTA DIOSNINMI chayno nisha.