Read Tayta Diosninchi Isquirbichishan Isaías 23 Bible Online

Isaías 23 - Tayta Diosninchi Isquirbichishan bible

Isaías 23

¹Tiro imano cananpäpis Tayta Dios ribilashanta Isaías cayno willacuran: Büquita manijaj Tarsis runacunaga llaquishami carcaycan. Chipripitami willapa chayasha «Tiro siudätami juchuchisha» nir. «Lamar cantunman büqui chayanantami illgächisha» nir.

²Tiro runacunawan Sidón nigusyanticunapis upällallami carcaycan. Paycunaga büquicunawanmi nigusyuta aroj.

³Achca nasyun runacunawanmi ranticanacoj. Paycunaga fiyupami gänaj Egiptupita shuntashan micuyta ranticur.

⁴Lamar cantuncho caycaj Sidón fiyupa pengacuy ari. Tiro manana captinmi lamarga llaquicur nenga: «Ollgu wamracunata mana uywashanömi caycä. Warmi wamracunatapis mana uywashanömi caycä. Nanayta mana musyaj, mana gueshyacushanönami caycä.»

⁵Tiro imano ruracashantapis musyaycur Egipto runacunaga fiyupami llaquiconga.

⁶Lamar cantuncho tiyaj runacuna, Tarsisman aywacuy-llapa; fiyupa wagay-llapa.

⁷Mas unay marcami casha Tiro siudäga. Chaychöga runacuna gustashallanta rurar cushishami goyäcoj. Chay runacunaga caruman tiyaj aywacoj.

⁸Nircur chaychöga raytana churaj. Chay siudäpa nigusyantincunaga rispitädu runacunallami caran. Chaymi llapanpis rispitashpan tiyachej. ¿Pitaj nisha Tiro chayno castigacänanpäga?

⁹Munayniyoj TAYTA DIOSMI chayno camacächisha llapan alli-tucojcunata pengacachinanpaj, cay pachacho caj munayniyojcunata manacajman churananpaj.

¹⁰Tarsis runacuna cananga Nilo mayu chayar mashtacashanno juc-läman juc-läman mashtacäcuy. Lamar cantuncho büquicuna jamanan manami cannachu.

¹¹TAYTA DIOSMI lamar jananpa maquinta jogarisha. Intëru nasyuncunatami sicsicyachisha. Canaán nasyunpa pacacuna siudänincunata illgächinanpämi nisha.

¹²Sidontanami niran: «Fistayquicunapis manami cannachu. Charipacusha jipashnönami caycanqui. Chipriman gueshpirpis manami chaychöpis jamayta tarinquipächu.»

¹³¡Masqui ricay Caldeacuna tiyashanta! Chay nasyonga unay manami caranchu. Asiria runacunami yanaparan chunyaj chaqui jircacho goyajcuna tiyananpaj. Cananga Caldeacunami escaluncunata rurasha Tirocho caj palasyucunata juchuchinanpaj. Paycunaga pasaypa usharcur ragällantami cachaycusha.

¹⁴Lamar cantunman büqui chayanan illgasha captinmi büquita manijaj Tarsis runacunaga llaquisha carcaycan.

¹⁵Chay wichan Tiro nasyuntaga ganchis chunca (70) watacamami gongaycärenga. Ray cawashanno ganchis chunca (70) wata päsariptin ichanga Tiro siudäpaj cantanga guellaypaj cacoj warmipaj birsushanno:

¹⁶«Gongacasha caycaj guellaypaj cacoj warmi, arpayquita matancacurcur siudäpa purimuy. Alli tonädacunata tucay. Yaparir-yaparir birsuy. Mä pillaga yarpärishunquichush.»

¹⁷Ganchis chunca (70) watata usharcuptin ichanga Tiro siudäta TAYTA DIOS yarpärenga. Chaura chay siudächo tiyaj runacunaga yapaymi nigusyuta aruyta gallayconga. Yapaymi llapan nasyun runacunawan ranticanacushpan rejsinaconga.

¹⁸Ichanga manami quiquincunapänachu shuntanga, ni churanga. Chaypa ruquenga gänashancuna canga TAYTA DIOSPÄNAMI. TAYTA DIOSTA sirbejcunatami goycärengapaj alli micusha, alli röpasha goyänanpaj.