Read Tayta Diosninchi Isquirbichishan Isaías 24 Bible Online

Isaías 24 - Tayta Diosninchi Isquirbichishan bible

Isaías 24

¹Masqui ricay-llapa. TAYTA DIOSGA llapantami cay pachata usharenga. Cay pachata fiyupami cuyurachenga. Runacunatanami wacpa-caypa mashtacächenga.

²Chay junäga iwalmi päsanga cüratapis, pampa runacunatapis, patruntapis, ollgu uywaytapis, patrönatapis, warmi uywaytapis, rantejtapis, ranticojtapis, ristajtapis, ristacojtapis, rïcutapis, pobritapis.

³Ima-aycata charashantapis ushajpämi guechurenga. Cay pachataga pasaypa chunyajtami cachayconga. Chayno cananpämi TAYTA DIOSGA nisha.

⁴Cay pachaga llaquicuycho cashpanmi chaquir shushuycan. Mundu cansädu cashpanmi pasaypa chaquir shushucäcun. Munayniyoj runacunapis fiyupami llaquicun.

⁵Cay pachataga runacunami ganrachisha. Laycunata manami cumlishachu. Tayta Diospa mandamintuncunata mana wiyacushachu. Imaycamapis alli cananpaj parlashantapis manami cumlishachu.

⁶Chaypitami castïgu chayamur cay pachataga usharisha. Chay castïguwanmi cay pachacho tiyajcunapis ñacaycan. Chaypitami cay pachacho tiyajcuna ushacasha. Wallcallanami runacunaga cawaycar quëdasha.

⁷Übas yöracunatapis gueshyami charisha. Chaymi bïnupis mana cannachu. Ñaupata cushisha goyajcunapis llaquishanami carcaycan.

⁸Mananami tucannachu tamburcunata. Ni arpacunatapis manami tucannachu. Fistata rurar, cushicur gaparpajcunapis manami mayacannachu.

⁹Birsushpan manami bïnuta upyanganachu. Upyajcunapäga machächicojcunapis ashgajmanmi ticracurenga.

¹⁰Siudäga juchushami caycan. Wasimanpis mananami pipis yaycunnachu.

¹¹Bïnu muchuy captin runacunaga cällicunachöpis wagarcaycan. Mananami pipis cushicunnachu. Cushicuyga chay pachapita aywacusha.

¹²Siudäga pasaypa ragällami quëdasha. Puncunpis ichic-ichiclla ruracashami caycan.

¹³Runaga wallcallanami cay pachacho quëdanga. Olivota pallar ushajpaj shicwananpaj wiruptin juc ishcay quëdashannöllana, cosëcha ushay quëdaj übasta ashishannöllanami quëdanga.

¹⁴Cawaycar quëdaj runacunaga TAYTA DIOS imanöpis rurashanta ricasha carmi cushicuypita gaparpanga. Tayta Diosta ricarmi maycho tiyaycashanchöpis cushisha cantanga.

¹⁵May-chaychöpis Israelcunapa TAYTA DIOSNINTAGA rispitashpan alabangami.

¹⁶Cay pachapa cuchunpita-pacha cantamojtami wiyashcäcuna «¡Juchaynäga alabasha cachun!» nir. Noganami nishcä: «Ay, ima ruraytapis manami camäpacöchu. Pasaypa llaquishami caycä. Fiyu runacunaga engañacunmi. Paycunamanga manami yäracuypächu.»

¹⁷Cay pachacho tiyaj runacunaga cangapaj casadurpita jirca animal gueshpiycajnömi. Man'chäga cangapaj uchcuman yagananpaj caycajno, u togllaman chayananpaj caycajno.

¹⁸Casadurpita gueshpej cäga yagangapaj uchcumanmi. Uchcupita llojshirir gueshpej cajnami togllacho watacasha quëdanga. Fiyupa löcu tamyami tamyamongapaj. Cay pachata tucnarämojcunapis chucchongarämi.

¹⁹Cay pachaga fiyupa manchariypämi cuyurenga. Cuyurishpan ichic-ichiclla ruracäcongapaj.

²⁰Machasha runa tuniycachaycajnömi ricaconga. Tuniyta munaycaj chucllanömi alayri cuyuycanga. Cay pachacho tiyajcuna juchata rurashanga fiyupami lasaycan. Chaymi cay pachaga tunishpan imaypis mana jatarenganachu.

²¹Chay junäga TAYTA DIOS castigangapaj janaj pachacho caycaj munayniyojcunata, cay pachacho caj raycunatapis.

²²Llapanta juc pachaman shuntanga. Nircur calapösuman wichganga. Chaychönami prësu wichgarächenga. Unaycama wichgararcachir-rämi castiganga.

²³Munayniyoj TAYTA DIOSGA Sioncho jamacunanman jamayconga acrashancunapa mandajnincuna ricapaycaptin. Nircur Jerusalenchömi achicyacurconga. Chauraga intipis quillapis manami achicyanganachu.