Read Tayta Diosninchi Isquirbichishan Isaías 25 Bible Online

Isaías 25 - Tayta Diosninchi Isquirbichishan bible

Isaías 25

¹TAYTA DIOS, gammi canqui Diosnë. Nogaga gamtami rispitashpä alabashayqui. Almiraypajcunata rurashayquipitami adurashayqui. Unaypita-pachami yarpashayquicunaga caycan rasun cajlla, alli cajlla.

²Siudätapis gotuy-gotuy juchusha cananpämi ticrarachishcanqui. Pacacuna curalasha siudätapis ushajpämi juchurgärachishcanqui. Jäpa runacunapa palasyuncunatapis juchuchirmi illgarachishcanqui. Chay siudätaga manami imaypis allchachenganachu.

³Chaypitami chay siudächo caj munayniyoj runacunapis rispitashunquipaj. Fiyu runacunapis manchacushunquipaj.

⁴Pobricunataga gammi imaypis washashcanqui. Llaquicuycajcunatapis yanapar chapashcanquimi. Löcu tamya mana chayananpaj pacacunanmi cashcanqui. Fiyupa shanay mana chayananpäpis llantunmi cashcanqui. Fiyu runacunapa jämayninmi ichanga caycan löcu tamyano,

⁵chaqui jircaman shanay chayajno. Fiyupa shanaycaptin pucutaywan llantuchishayquinömi ollgoj runacuna gaparpaycashantapis gamga chawächinqui. Gammi ninqui fiyu runacuna upällalla wiyarpänanpäpis.

⁶Sión lömachömi munayniyoj TAYTA DIOS aypalla micuyta camarenga llapan nasyun runacunapaj. Chaychöga caycanga mishquej micuycuna, mas alli caj bïnupis.

⁷Chay jircachöga mananami llaquicuy canganachu. Tayta Diosmi jorgurenga llapan runacunata chaparaycashan bëluta.

⁸Imaypis manana wañuy cananpämi TAYTA DIOSGA wañuyta ushacächenga. Wagajcunatapis shogashpan weguinta pichapangami. Acrashan runacuna cay pachacho pengaycho cashantapis pampachar gongacächenganami. TAYTA DIOSMI chayno nisha.

⁹Chay junaj runacuna nengapaj: «Chaynömi noganchïpa Diosninchëga. Paymanmi yäracuranchi. TAYTA DIOSMI salbamashcanchi. Pay salbamashanchïpita cushicur gaparpäshun ari.»

¹⁰Sión lömataga TAYTA DIOSMI imapitapis chapanga. Moabtami ichanga lluchcar-ushanga. Ganrata lluchcashannömi lluchcarenga.

¹¹Moab runacunaga mayucho bäñacushannörämi maquintapis tapsenga. Ichanga Tayta Diosmi alli-tucuycajta ñitirenga. Manami imanöpapis gueshpengachu.

¹²Tayta Diosga juchurachengami sinchi pergasha siudäcunapa curralnincunatapis. Nircorga pampacho mashtaraycajtami cachayconga.