Read Tayta Diosninchi Isquirbichishan Isaías 28 Bible Online

Isaías 28 - Tayta Diosninchi Isquirbichishan bible

Isaías 28

¹¡Ay imanöraj canga Samaria! Payga corönanömi micuyta alli wayuchej altu patacho caycan. Burrächu Efraín runacuna alli-tucushanmi caycan. Chaynöpis caycan adurnu wayta wañuytasha caycajnömi. Chaychöga bïnuta upyallarmi goyarcaycan.

²Chay siudäpaj Tayta Diosga maynami acrasha caycächin callpayoj, munayniyoj runata. Chay runaga runtu tamyanöpis munayniyoj caycan; imatapis illgächej löcu wayranömi; löcu tamyaptin ima aycatapis lloglla apar illgächejnömi; aypalla yacu chayar ima-aycatapis ñiticurcojnömi. Chay runaga charircurmi pampaman sajtarenga.

³Nircur latojpaj lluchcarenga upyallata aroj Efraín runacuna alli-tucushanta, corönanta.

⁴Adurnu wayta wañuytasha caycäga, micuyta alli wayuchej pampa chacra juc patacho caycäga cangapaj ïgus pogunan wichan rimir-puntata wayojnömi. Pipis chay ïgusta ricärishpan pallarcorga jinan örami micucurcun.

⁵Chay junaj quëdaj acrashan runacunapäga munayniyoj TAYTA DIOSMI cangapaj fiyupa alli corönan, fiyupa cuyayllapaj adurnun.

⁶Dimanduta arriglaj juezcunatami alli arriglananpaj sumaj tantiyachenga. Siudäta täpaycaj suldärucunatapis masmi balurta gonga.

⁷Cananga cüracunawan profëtacunapis machächicojcunata achcata upucurcushpanmi tuni-tuni purircaycan. Tayta Dios willapaycashan örapis tuniycacharcaycan. Dimandacojcunatapis machashami arriglaycan.

⁸Mësancunachöpis gumitashan ganracunami caycan. Manami ni juc pachallapis canchu limyuga.

⁹Nogata asipämarmi cayno rimarcaycan: «¿Pita yachaycächishantataj yarpaycan? ¿Pitataj willapaycan Dios musyachishanta? ¿Chayraj wasguisha caycaj wamracuna cashanchïtachuraj yarpan? ¿Chayraj chuchuta cachaycusha wamracuna cashanchïtachuraj yarpan?

¹⁰‹Cayta, wacta ruray› niycämanchi. ‹Wacta, cayta wiyacuy› niycämanchi. ‹Cay-läman, wac-läman witiy› niycämanchi. ‹Wac-läman, cay-läman witiy› niycämanchi» nir.

¹¹Chayno mana wiyacushayquipitami gamcunataga Tayta Dios willapäshunquipaj mana yachashayqui rimaycho, juc-lä nasyun runacuna rimashan rimaycho.

¹²Tayta Diosga unaynami gamcunata nishurayqui: «Cay partichömi caycan alli goyayga. Caychömi caycan jamanayquicunapäga. Uticasha cäga jamachun ari» nir. Ichanga gamcuna manami wiyacurayquichu.

¹³Chaypitami TAYTA DIOSGA «Cayta, wacta ruray» nishunquipaj. «Wacta, cayta wiyacuy» nishunquipaj. «Cay-läman, wac-läman witiy» nishunquipaj. «Wac-läman, cay-läman witiy» nishunquipaj. Chaura purishpayqui ancallaypami tuninquipaj. Däñacunquipämi. Togllamanmi watacanquipaj. Chaychönami prësu ricacunquipaj.

¹⁴TAYTA DIOS nishanta wiyacuy-llapa, cay Jerusalencho pitapis mana rispitaj mandajcuna.

¹⁵Gamcunaga nircaycanqui: «Wañuywanmi parlashcäcuna fiyupa manchariypaj mana alli chayamuptin nogacuna mana wañunäpaj. Nogacunaga llullacuypami pacacushäcuna. Engañaypami chapacushäcunapis.»

¹⁶Chaypitami TAYTA DIOSGA nin: «Sionmanmi juc rumita churaj-aywä. Chaymanga churashaj acrasha rumitami. Chay rumiga cangapaj llapanpita mas allimi. Jinachöpis chay rumimi simintupa isquïnancho puntu rumi cangapaj. Chayman yäracoj cäga allimi goyanga.

¹⁷Chaychöga alli goyaymi plomädano canga. Rasun cajta ruraynami nibilno canga. Gamcuna llullacuypa pacacushayquitaga runtu tamyami illgarachengapaj. Chapäshunayquipaj yäracushayquitanami yacu apacongapaj.

¹⁸Wañuywan parlashayquega anulacangami; manami bälenganachu. Fiyupa manchariypaj mana alli disigrasyami chayamongapaj. Chaura chay mana alliga ushajpämi ñitirishunquipaj.

¹⁹Cada chayamuyninmi garachasha apashunquipaj. Waran-waranmi, chacaypapis junajpapis chayamongapaj.» Chayamunanpaj caycashanta musyaycullarnami manchariywan sicsicyanquipäpis.

²⁰Chaura gamcunaga caycanquipaj mana tincushayqui quichqui cawituman puñucuycojnömi, tacshalla gatacunawan gatacojnöllami.

²¹TAYTA DIOSGA Perazim jircacho rurashannömi illajpita usharenga. Gabaón guechwacho rurashannömi rabyawan usharenga. Runa tantiyayta mana atipashantami ruranga.

²²Chaymi amana caynachu mana rispitacöga. Mana rispitacoj captiqui wataraycäshushayqui cadina mastami apritacäconga. Nogaga wiyashcänami munayniyoj TAYTA DIOS cay nasyunta ushajpaj illgächinanpaj mayna nishanta.

²³Sumaj wiyay noga nishäta tantiyacunayquipaj. Noga nishäcunataga juctapis mana cachaypa sumaj tantiyacuy.

²⁴Juc runa imata murunanpäpis arorga manami yaparir-yaparir yapyayllaga yapyacunchu. Chayno manami cuspiyar guewancunata tapsillarpis cacunchu.

²⁵Sumaj cuspiyariycorga ¿manachu murutana murun? Machiypa rïguta murun. Sebädatapis murun mayninpapis murunanpaj cajllapami. Abënatapis murun cantullanpami.

²⁶Diosmi tantiyachin imano murunanpäpis. Imano alli cashantapis musyachin.

²⁷Musyashanchïnöpis eneldotaga manami ëranchïchu. Cominustapis cawalluwanga manami ëracho lluchcachinchïchu. Eneldotaga gueruwan wiruyllapami shicwachinchi, cominustapis llanu guerucunawan wiruyllapami.

²⁸Rïgutami ichanga ëranchi. Chaypis manami ñuchunanyäga lluchcachinchïchu. Cawalluwan may-öra lluchcarcacherga rïgu llojshej cajta raquinchi rïguncuna manaraj ñuchuptin.

²⁹Chaytapis ruran munayniyoj TAYTA DIOS yarpayta goptinmi. Paypa yachachicuynenga almiraypämi. Pay yachaj cashanga manami imamanpis tincunchu.