Read Tayta Diosninchi Isquirbichishan Isaías 32 Bible Online

Isaías 32 - Tayta Diosninchi Isquirbichishan bible

Isaías 32

¹Juc raymi cangapaj rasun cajllata rurar mandananpaj. Payta mandäshejcunapis alli cajllatami rurangapaj.

²Raypis mandäshejcunapis cada-ünun cangapaj wayra chayananta chapajno, löcu wayrapita pacacunano, chaqui jircacunata pargunapaj sicyano, chaqui jircacho jatuncaray gagapa llantuyninno.

³Chauraga ricaycajcunapa ñawincunapis sumajmi ricanga. Wiyajcunapa rinrincunapis sumajmi wiyanga.

⁴Mana tantiyajcunapis llapantami alli tantiyanga. Gägucunapis mana ñacapacayllapa clärunami rimangapaj.

⁵Fiyu runataga manami «alli runa» nenganachu. Engañacojcunatapis manami «rispitädu runa» nenganachu.

⁶Fiyu runaga mana allillatami parlan. Yarpayninchöpis yarpaycan mana allita ruranallanpämi. TAYTA DIOS melanäcushancunatami ruran. TAYTA DIOSPÄGA llutancunatami riman. Pishipacojcunatapis manami yawaycachinchu. Yacunaycajtapis manami yacuta chagapaycunchu.

⁷Engañacojcunaga yäracun engañayta yachashallanmanmi. Melanaypajcunata rurayllatami yarparaycan. Pobricunatapis llullapaypami llaquicachin. Alli arriglananta ashiycajcunatapis mana allimanmi churan.

⁸Alli runami ichanga allillata ruran. Chaymi paytaga pipis rispitan.

⁹Imapäpis mana yarpachacoj warmicuna canan nishäta sumaj wiyacuy. Imanöpis caycashallayquiman yarparajcuna canan nishäta sumaj tantiyacuy.

¹⁰Gamcuna cananga mana yarpachacuypa goyarcaycanqui. Cananpita wata masllataga fiyupami llaquicunquipaj. Chaynöga canquipaj cosëchata mana shuntar. Yapayga manami übasta shuntanquipänachu.

¹¹Imapäpis mana yarpachacuypa goyaycajcuna, manchariywan sicsicyay. Imanöpis caycashallayquiman yarparajcuna llaquicuy. Jatiraycashayqui alli röpayquicunata lojticuy. Nircorga llaquicur jaticunayqui röpayquicunatana jaticuy.

¹²Micuy alli wayunan chacracunapaj, übas alli wayunan chacracunapaj llaquicushpayqui pëchuyquita cutacuy.

¹³Acrashä runacunapa chacrancunachöga wiñamonga cashawan jachacunallami shatayänanpaj. Cushicur goyashan wasincunachöpis wiñamonga cashawan jachacunallanami.

¹⁴Palasyucho pipis manami tiyangachu. Aypalla runacuna tiyashan siudäpis chunyajmi ricacongapaj. Sumaj curalasha siudäcunatapis para-simrimi cachaycärengapaj. Chaura chaychöga chucaru bürrucunami cushisha tiyangapaj. Manshu uywacunatapis chaychömi michengapaj.

¹⁵Chaynöga cangapaj janaj pachapita Espíritu noganchïman chayamunancamami. Chaura chunyaj chaqui jircapis ticrangapaj muruna chacramannami. Muruna chacracunachönami micuy fiyupa wayongapaj.

¹⁶Nasyun intëruchöpis rasun cajtawan alli cajllatanami pï-maypis ruranga.

¹⁷Chaura llapanpis alli goyayllana canga. Allillanami imaycamapis goyanga.

¹⁸Acrashä runacunaga allillami tiyangapaj. Mana manchacuypa sigüru wasicunachömi tiyangapaj.

¹⁹Munticunata runtu tamya ushariptinpis, siudäcuna juchuchir-ushasha captinpis

²⁰gamcunaga cushishami goyanquipaj. Murushayquicunata pargunayquipaj achca yacu canga. Guewapis mana pishiypami canga bürrucunapaj y wäcacunapaj.