Read Tayta Diosninchi Isquirbichishan Isaías 34 Bible Online

Isaías 34 - Tayta Diosninchi Isquirbichishan bible

Isaías 34

¹Llapaniqui shamuy wiyanayquipaj. Tantiyanayquipaj sumaj wiyay marcacuna, nasyuncuna. Wiyachun cay pachapis, cay pachacho cajcunapis. Wiyachun mundu intërupis, munducho llapan cajcunapis.

²TAYTA DIOSGA nasyuncunapaj rabyashami caycan. Rabyashami caycan nasyuncunapa suldäruncunapäpis. Paymi llapanta illgächenga; ushajpaj wañuchenga.

³Wañojcunatapis manami pipis shuntangachu. Chaycunaga fiyupa melanaypämi asyarenga. Intëru jircapapis yacunörämi yawarpis aywanga.

⁴Syëlupis llapan chaycho caycajcunapis papil cauchucajnömi pitucäconga. Estrëllacunapis manana achicyar chaquisha öjanömi shicwacamonga.

⁵Rasunpami Tayta Diospa sablenga syëlucho yurenga. Chay sabliga Edom runacunamanmi yaganga. Edom runacunataga Tayta Diosmi wañunanpaj distinasha.

⁶Edomchömi fiyupa wañuchinacuy canga. TAYTA DIOSGA Bosra siudächömi rupachinanpaj pishtanga. Chaymi TAYTA DIOSPA sablenga yawarpita y wirapita ñitisha caycangapaj. Uyshacunapawan chïbucunapa yawarnin wiran ñitisha caycajnömi caycanga.

⁷Chay runacunawan iwalmi wañongapaj chucaru wäcapis, töru-mallwacunapis, buyicunapis. Chay nasyunchöga intëruchömi yawar mashtaranga. Ñuchu allpapis wirawan tacushallami caycangapaj.

⁸Chayno canga chay junaj TAYTA DIOS ayñita cutichiptinmi. Chay watami Sionga ñacachejcunata ayñita cutichenga.

⁹Edom nasyuncho caj ragracunapaga breyana aywanga. Ñuchu allpacunana asufriman ticracurenga. Chaura chay Edom nasyun partiga breyanörämi ratanga.

¹⁰Chacaypa ni junajpapis manami upengapänachu. Imaypis goshtayga jatariycangami. Imaycamapis chayno ushacasha ragällanna caconga. Chaypaga manami pipis purengapänachu.

¹¹Chaychöga tiyangapaj pillyaj jutiyoj äbicunawan chushyajcunallami. Gueshwancunatapis rurangapaj quillicsawan tucumi. Chay nasyuntaga yarpashannömi Tayta Dios ticrachengapaj chunyajman. Imapis manami canganachu.

¹²Yapayga mananami raynin cangapänachu. Mandajnincuna ushajpämi illganga.

¹³Palasyucunachöpis cashallanami wiñamonga. Pacacunanchönami ishancacunawan shirallana wiñanga. Chay partiga ticrangapaj jirca allgucunapa tiyananman, Avestruz äbicuna puñunallanmanna.

¹⁴Oshgu mishicunawan jirca allgucunallanami tiyanga. Jacha cabracunallami wacpita-caypita wagapänaconga. Chaychöga chushyajcunallanami tiyanga.

¹⁵Chaycho tucu gueshwanta ruranga. Chaycho wachar ogllar pashtarcachirnami pushapata jorgonga. Chipshantaga shuntapayllapami gueshpichenga. Chay partimanga tucuy casta ancacunapis chinan orgunmi shuntacanga.

¹⁶Masqui TAYTA DIOSPA librunta ricay. Masqui liguiy. Chay animalcunapaj niycashäga llapanmi caycanga. Manami mayganpapis chinancunaga pishengapächu. Quiquin TAYTA DIOSMI chayno cananpaj camacächisha. Paypa espiritunnami shuntarengapaj.

¹⁷Cada-ünuntami maycho goyänanpäpis camaripasha. Quiquinmi ricachisha maycho tiyananpäpis. Ricachishanchömi imaycamapis tiyaconga. Imaycamapis chayllachömi tiyacongapaj.