Read Tayta Diosninchi Isquirbichishan Isaías 37 Bible Online

Isaías 37 - Tayta Diosninchi Isquirbichishan bible

Isaías 37

¹Willashanta wiyaycur ray Ezequiasga jatiraycashan röpanta rachiriran. Nircur fiyupa llaquicushpan gachga röpacunata jaticurcur TAYTA DIOSPA Templunman aywaran.

²Chaypita rayga Amozpa wamran profëta Isaiasman cacharan palasyucho mandaj Eliaquimta, acta ruraj Sebnata, mayur cüracunatapis llaquicur gachga röpan jatishata.

³Aywajcunaga niran: «Ezequiasmi cayno nin: ‹Cananga fiyupa llaquicuychömi caycäcuna. Castïguchömi, pengaychömi caycäcuna. Nanaycho caycaj warmi gueshyacunanpaj callpan manana cajnönami caycäcuna.

⁴TAYTA DIOSNIQUEGA wiyashami canga Asiriapa raynin cachamushan mandaj suldärun ashllishpan imata nishantapis. Cawaj Diostami ashllisha. Ashllishanpita TAYTA DIOSNIQUI castigaycunman. Mañacushpayqui ruwacuycuy ari quëdajcunallapäpis› nir.»

⁵Ray Ezequiasta mandäshejcuna chayno willaptin

⁶Isaiasga niran: «Patrunniquita willay TAYTA DIOS cayno nishanta: ‹Imatapis Asiria raypa suldäruncuna nogapa conträ parlashanpitaga ama manchacuychu.

⁷Nogami camacächishaj willapa chayaptin cuticunanpaj. Chaura nasyunninman cuticongapaj. Chaychönami camacächishäpaj sabliwan wañuycachinanpaj› nir.»

⁸Chaypitaga Asiriapita shamoj mas mandaj suldäru mayaran Asiriapa raynin Laquis siudäpita aywacushanta. Chaura paycunapis Jerusalenpita jinan öra aywacuran. Asiriapa raynintaga tariran Libna runacunata magaycajtana.

⁹Chaychöna Asiriapa raynenga mayaran paypa contran Etiopía nasyunpa raynin Tirhaca suldäruncunawan pillyaj aywaycashanta. Chaypitapis ray Senaqueribga Judäpa raynin Ezequiasman yapayraj cachata cacharan. Ezequiasta niran:

¹⁰«Gam yäracushayqui Diosniquega nishunqui Jerusalenga nogapa munaynëcho imaypis mana cananta. Ichanga nishushayquita ama riguiychu.

¹¹Gamga mayashcanquinami Asiriapa raynincuna nasyuncunata imano rurashantapis. ¿Chaychuraj gamga gueshpinquiman?

¹²Nogapa unay caj awilöcuna illgächishan marcacunata maygan diosninpis manami salbashachu. Manami salbaranchu Gozanta, Haranta, Resefta, Bet-edén runacuna Telasarcho tiyajtapis.

¹³Masqui yarpachacuy. ¿Cananga maytaj Hamatpa, Arfadpa, Sefarvaimpa, Henapa Ivapa raynincuna?»

¹⁴Cacha aywajcuna cartata chayachishanta chasquircur ray Ezequías liguiran. Nircorga Templuman aywaycur cartata mashtayninpa churaycur

¹⁵TAYTA DIOSTA cayno mañacuran:

¹⁶«Israelpa munayniyoj TAYTA DIOSNIN, gamga mandashpayqui jamaraycanqui querubín anjilcunapa chaupinchömi. Japallayquimi cay munducho tiyajcunapa Tayta Diosnin canqui. Gammi camarayqui syëluta cay pachatapis.

¹⁷TAYTA DIOS, mañacur ruwacushäta wiyaycamay ari. Senaquerib cachamushan mandaj suldärun imata nimashancunatapis ama gongaychu. TAYTA DIOS, gam cawaj Dios caycaptiquimi chayno rimar rabyachishurayqui.

¹⁸TAYTA DIOS rasunpami Asiriapa raynenga nasyuncunata ushar illgächisha.

¹⁹Runacuna ‹diosnë› nishancunatapis rupargärachisha. Chaycunaga manami rasunpa dioschu caran. Chaycunaga guerupita, rumipita runacuna rurashallanmi casha. Chaynöpami illgächishapis.

²⁰TAYTA DIOSNË, cananga Asiriapa munaynincho canäpita salbaycamay ari. Chaynöpami cay pachacho caj runacunaga llapan musyanga gam japallayqui rasunpa TAYTA DIOS cashayquita.»

²¹Chaypita Amozpa wamran Isaiasga ray Ezequiasta willachiran. Willachir niran: «Israelpa TAYTA DIOSNENGA caynömi nin: ‹Noga wiyashcämi Asiriapa raynin Senaqueribpaj mañacamashayquita.

²²« ‹Noga TAYTA DIOSGA Asiriapa rayninpaj caynömi në: « ‹Senaquerib, gampäga Sión siudä juc jipashnömi asicun. Gam aywacuptiqui Jerusalenga manacajman churashushpayquimi umanta awicun.

²³¿Pitataj ashllishcanquega? ¿Pitataj gayapashcanquega? ¿Pitataj gayarashcanqui alli-tucushpayquega? ¡Israelpa Santo Diosninpa contranmi rimashcanqui!

²⁴Cachayquicunawan ashllichimarmi cayno nimashcanqui: «Yupaytapis mana atipaypaj aypalla carrëtäcunawanmi yaycushcä intëru puntancunapapis. Mana pipis yaycunan Líbano jircacunamanpis yaycushcämi. Mas cuyayllapaj pïno gueruncunatapis, jatunnin sedru gueruncunatapis sajtashcämi. Chayashcämi altunnin jircancunaman, may-may muntincunamanpis.

²⁵Juc-lä nasyun chaqui jircacunacho pösucunata rurarcur yacuta upushcä. Suldäröcuna päsananpämi Egipto mayucunatapis chaquichishcä» nir.

²⁶Gamga ¿manachu musyarayqui noga Tayta Dios chaycunata llapanta camacächishäta? Unaypitanami chayno cananpaj camacächirä. Chaymi cananga cumlishcä. Chaynöpami gamga curalasha siudäcunatapis illgächir cachaycunqui ragällanta, muntuy-muntuy goturaycajta.

²⁷Chay siudäcunacho tiyajcunanami quëdasha fiyupa mancharir pengay-tucusha. Jircacho caj berdi guewacuna quëdasha wasi janancho llullu guewacuna fiyupa usyawan chaquicäcojno.

²⁸Nogaga musyaycämi imanölla goyashayquitapis, imanölla rurashayquitapis. Musyaycämi nogapaj fiyupa rabyaycashayquitapis.

²⁹Nogapa conträ jatarir rabyar fiyupa ollguycashayquita wiyashcämi. Chaypitami sengayquiman churashaj juc arguyllata. Shimiquimannami frënuta churashaj. Nircorga shamushallayquipami cutichishayqui.› »

³⁰Ray Ezequiastana Isaías niran: «Rasunpa cananpaj cashanta musyanayquipaj caynömi canga: «Cay watapis, watanpis gamcunaga micunquipaj quiquillan wiñacamoj micuy wayushantami. Watannin cajchönami ichanga mururcärirpis shuntanquipaj. Übasta lantarcurpis wayuyninta micunquipaj.

³¹Quëdaj caj Judá runacunaga cangapaj lanta jachanömi. Lanta sapichajnöpis mana llojshiypanami tiyanga. Früta yörancho wayojnöpis mirangapämi.

³²Waquenga Jerusalenchömi quëdanga. Sión lömachömi cawaycaj quëdanga. Amatar cuyacoj cayninwanmi TAYTA DIOS chayno cananpaj camacächenga.

³³«Asiria nasyunpa rayninpäga TAYTA DIOS caynömi nin: « ‹Jerusalenmanga manami yaycongapächu. Manami jucnayllatapis lëchanta jitangapächu. Manami pillyapaj escüduncuna aptasha yaycongapächu. Manami yaycunanpaj curral wajtancunaman allpatapis gotongapächu.

³⁴Shamushallanpami cuticongapaj. Siudämanga manami yaycongapächu. Noga TAYTA DIOSMI chayno niycä.

³⁵Nogami cay siudäta chapäshaj. Imapitapis salbashaj sirbimajnë Davidta aunishäta yarpar, quiquëpis rispitacachicushpä› nir.»

³⁶Chay nishan chacayllami TAYTA DIOSPA anjilnin chayaycur wañuchiran Asiria suldärucuna pachacaraycajta pachac pusaj chunca pichgan waranga (185,000) runacunata. Warannin tuta waquin suldärucuna riccharcamorga tariran wañusha mashtarpaycajtana.

³⁷Chaura Asiriapa raynin Senaqueribga tolduncunata shuntacurcur cuticuran Nínive siudäman.

³⁸Juc junaj diosnin Nisrocpa templunman yaycuycur aduraycaran. Niycaptinmi wamrancuna Adramelecwan Sarezer yaycuycur sabliwan wañuycärachiran. Wañuycacherga Ararat partiman gueshpir aywacuran. Chaypitaga papäninpa ruquin ray caran wamran Esarhadón jutiyojna.