Read Tayta Diosninchi Isquirbichishan Isaías 41 Bible Online

Isaías 41 - Tayta Diosninchi Isquirbichishan bible

Isaías 41

¹Tayta Diosmi cayno nin: «Lamar cantuncho caycaj nasyun runacuna upällalla wiyamay. Intëru nasyuncho caycaj runacunapis sumaj balurchay. Parlananchïpaj shamuy-llapa. Tapunacunanchïpaj shuntacämuy.

²Llapanta binsircur alli llojshej raytaga ¿pitaj inti yagamunan caj-läpita yurichimusha? Chay rayga waquin nasyunpa raynincunatapis maquinchömi chararaycan. Paytaga maygan raycunapis manami ichipanchu. Payga raycunata sablinwan ñuchu allpamannömi rurarin. Lëchancunawanmi ogshatano wacpa-caypa machirin.

³¿Pitaj camacächisha chay ray mana manchacuypa gaticachänanpaj; imaypis mana purishan nänipa aywananpaj?

⁴¿Pitaj chaycunataga rurasha? Gallarinanpita-pacha llapanpis chayno cananpäga ¿pitaj nisha? Noga TAYTA DIOSLLAMI chayno camacächishcä. Nogallami gallarinanpita-pacha imaycamapis caycä.»

⁵Lamarcho caycaj nasyuncunacho tiyaj runacuna chay raytaga ricashami. Ricaycorga fiyupami mancharisha. Allpapis juc cantupita juc cantucamarämi cuyurisha. Chayamunanpäga manami aycäpis pishinnachu.

⁶Chaymi fyërruta tacay yachajcunaga aroj-masinwan shacyächinacun.

⁷Ïduluta ruräga guellay tacajta shacyächin. Martilluwan tacajpis jirrëru yunquicho tacajta shacyächin. Nircorga «¡Allimi camacächishcanqui!» nin. Chayno rurariycur ïdulutaga mana cuyunanpaj läbuswan sumaj läbusyan.

⁸Tayta Diosga mastapis niran: «Jacobpita miraj Israelcuna, gamcunaga sirbimajnëmi carcaycanqui. Gamcunataga nogami acracushcä. Gamcunaga amïgö Abrahampita mirar-aywajmi carcaycanqui.

⁹May carupitashi nogaga jorgamushcä. May-chaychöpis caycajtami gamcunataga gayashcä. Nircur ‹Gamcunaga sirbimajnëmi canqui› nirä. Gamcunataga nogami acracushcä. Acrarcur manami jitarishcächu.

¹⁰Ama manchacuychu. Nogaga gamcunawanmi caycä. Ama manchacuychu. Nogaga Diosniquimi cä. Nogami yanapar gamcunataga callpata gö. Maquëcho charararmi gamcunataga alli goyächishayqui.

¹¹«Chiquishojcunaga llapanmi pengaypaj manacajman churasha cangapaj. Gamcunawan pillyaj cajcunaga ushajpämi illganga.

¹²Contrayqui cajcunataga ashirpis manami tarinquipänachu. Gamcunawan guërrata ruraj cäga mana cashan-japuymi cangapaj.

¹³Noga TAYTA DIOSNIQUIMI gamcunataga maquipita chariraycä. Chaymi gamcunataga nishcä: ‹Ama manchacuychu, nogami yanapaycä› nir.

¹⁴Jacobpita mirar aywaj Israelcuna, curunölla cashpayquipis ama manchacuychu. Nogami yanapäshayqui. Nogami gamcunapa Santo TAYTA DIOSNIQUI caycä. Nogami imapitapis jorgoj caycä.

¹⁵Gamcunataga mushoj alli quiruyoj rïguta ëracunamannömi ticrachishayqui. Chayno alli quiruyoj carmi puntacunatapis yapyarinquipaj. Contrayquicunatapis rïgupa päjantano muntuy-muntuy goturaycajtami cachaycunquipaj.

¹⁶Paycunaga wayra apacuptin illgashannömi ushacangapaj. Löcu wayra shamur wacpa-caypa machirishannömi illgangapaj. Chaynöpami TAYTA DIOS yanapäshushayquipita fiyupa cushicunquipaj. Santo Diosniquipäga fiyupa cushishami caycanquipaj.

¹⁷«Imanpis mana caj pobricunaga yacuta ashirpis manami tarinchu. Yacunayllawan gallunpis chaquisha caycan. Noga TAYTA DIOSMI ichanga yanapäshaj. Israelcunapa Tayta Diosnenga manami cachaycushächu.

¹⁸Yacu mana cashan jircacunachömi mayucunatapis yurichishaj. Guechwa ragran quinranchöpis pucyucunatami pashtachimushaj. Chunyaj chaqui jircacunatapis ishtanquimanmi ticrarachishaj. Yacu mana cashan jircacunapami mayu-mallwacunata aywachishaj.

¹⁹Chunyaj chaqui jircachönami guerucunata wiñachimushaj: sedruta, acaciata, rayanta, olivo yörata. Chaqui jircacunachömi wiñachishaj pïnucunata, siprescunata chaycunatawan iwal abeto yöracunatapis.

²⁰Chaura intërucho tiyaj runacunami ricashpan tantiyaconga Noga TAYTA DIOS munaynëwan chaycunata rurashäta, gam Israelcunapa Santo Tayta Diosniqui chaycunata camashäta.»

²¹Jacobpita mirajcunapa raynin TAYTA DIOSMI cayno nin: «Mä ïdulucunata apamuy chapacur rimananpaj. Mä ima rurayta camäpacushantapis nimächun.

²²Ñaupa caj watacunacho imano ima cashantapis tantiyachimächun. Shamoj watacunacho ima cananpaj cajtapis willamächun. Chaura nogacunaga musyashänami imano cananpaj cashantapis.

²³Mä willamächun chaypitaga imana cananpaj cashantapis. Chauraga rasunpa dioscuna cashanta musyashämi. Imallatapis mä rurachun allita mana allitapis chay rurashancunata ricar almiranäpaj.

²⁴Ichanga chay ‹diosnë› nishayquicuna manami ima ruraytapis camäpacunchu. Chaycunaga manacajllami caycan. Chay dioscunaman yäracojcunaga fiyupa melanaypämi.

²⁵«Inti yagamunan caj-lächömi juc runata yurichishcä. Paytaga jutinpami gayashcä. Payga norte caj-läpami chayamonga. Mandajcunatapis mituta-jinami lluchcarenga. Manca-ruraj mituta lluchcajnömi rurarenga.

²⁶¿Pitaj chayno cananpäga unayna musyachisha? ¿Pitaj unaypita-pacha nisha ‹Au, rasunpami› ninanchïpaj? Manami pipis wiyashachu ni juc shimillapis parlajta. Manami ni mayganpis musyachishachu.

²⁷Nogami gallarinanpita-pachapis Sión runacunamanga willacachirä. Nogami Jerusalenmanpis alli willapata willacoj cacharä.

²⁸Ricachacushpä, manami ricächu maygan dioscunapis yurimojta. Tantiyachej shamojpis manami pipis chayamunchu. Tapushäcunata cutichimänanpaj manami pipis canchu.

²⁹¡Chay dioscunaga mayganpis manami imapischu! Imata ruraytapis manami camäpacunchu. Chaycunaga caycan runa rurashallan y mana-bälejcunallami.»