Read Tayta Diosninchi Isquirbichishan Isaías 42 Bible Online

Isaías 42 - Tayta Diosninchi Isquirbichishan bible

Isaías 42

¹Tayta Diosmi cayno nin: «Caychömi caycan sirbimajnë. Paytaga nogami yanapaycä. Paytaga nogami acrashcä. Paypämi nogaga fiyupa cushicö. Paymanmi espiritöta churashcä. Chaymi llapan nasyuncunacho alli goyay cananpaj arriglanga.

²Payga manami gayacongachu, ni sinchipapis rimangachu. Cällicunachöpis manami pipis wiyangachu.

³Llachquisha caycaj shogushtapis manami paquirengapächu. Upinaycaj achquitapis manami upirachengachu. Payga llapantapis allimi arriglanga.

⁴Payga manami jamayta tarengachu cay pachacho alli goyay cananpaj manaraj arriglashancama. Lamar läduncho caj nasyun runacunapis pay yachachishanta wiyananpämi shuyaraycan.»

⁵Syëluta camarcur intërupa mashtacächejmi, cay pachata camajmi, cay pachacho ima ayca cajcunatapis camajmi, runacunata cawachej, jämayta goj TAYTA DIOSMI sirbejninta cayno nin:

⁶«Noga TAYTA DIOSMI gamta gayashcä munashäta ruranayquipaj. Maquipita charircurmi yanapashpä purichishayqui. Nogami churashayqui señalno canayquipaj, nasyuncunapäpis achquino canayquipaj.

⁷Churashayqui gapracunata allchacächinayquipaj, prësucunatapis carsilpita jorgunayquipaj, chacajchöno caycajcunatapis achquimanno jorgunayquipaj.

⁸Nogaga cä TAYTA DIOSMI. Chaymi jutëpis caycan. Chaymi camacächishaj nogallata aduramänanpaj. Manami camacächishächu nogata alabamänanpa ruquin ïdulucunata alabanantapis.

⁹Masqui yarpachacuy. Ñaupata willacachishäcunaga llapanmi cumlishana. Cananga yapaymi juc willacuycunatana willacachishaj. Gamcunataga musyaycächë manaraj imapis captinmi.»

¹⁰TAYTA DIOSTAGA mushoj alabansawan alabay. Cay munducho cajcunaga may carucho cashpayquipis alabay-llapa, lamar jananpa büquiwan purejcunapis, lamarcho tiyaj animalcunapis, lamar chaupin tishgucunacho caycaj nasyun runacunapis.

¹¹Cushicuchun chunyaj chaqui jircacunapis siudänincunapis, Cedarpita miraj runacuna witichinalla wasincunacho tiyajcunapis. Selacho tiyaj runacuna cushicuypita cantachun. Altunnin puntacunacho cushicuywan gaparpächun.

¹²TAYTA DIOSTAGA alabay-llapa. Lamar cantun nasyuncho tiyaj runacunapis paytaga alabay-llapa.

¹³TAYTA DIOSGA fiyupa callpasapa runanömi, fiyupa jinyu runanömi pillyanga. Guërracho pillyapaj gaparpashanno callpaycurmi gaparanga. Contrancunataga llapantami binsenga.

¹⁴Tayta Diosmi cayno nin: «Achca watami mana rimacushcächu. Shongullächo yarparashcä, upällalla cacushcä. Cananmi ichanga gueshyacoj warmi nanaywan gaparashanno gayarayparaj willacushaj.

¹⁵Puntacunatapis puytush lömacunatapis ushacächishämi. Chaycho wiñaj jachacunatapis ushajpämi chaquirachishaj. Mayucunatapis chunyaj chaqui jircamanmi ticrarachishaj. Gochacunatapis chaqui allpamanmi ticrarachishaj.

¹⁶Gapracuna aywashanpaga chacaytapis achicyajmanmi ticrarachishaj. Jatun ragracunatapis pampamanna ticrarachishaj. Paycunataga pushashäpaj mana rejsishan nänicunapami, quichqui nänicunapami. Chaycunataga rasunpami rurashaj.

¹⁷Chaura ïdulucunaman yäracojcunaga, runa rurashancunata adurajcunaga fiyupa pengay-tucushami aywacongapaj.

¹⁸«Mana wiyacoj upa runacuna, wiyay. Gapracuna, sumaj ricay.

¹⁹¿Pillaga sirbimajnëno mana ricaj canchuraj? ¿Pillaga willacojnëno mana wiyaj canchuraj? ¿Pillaga cachäno ñawin wichgasha canchuraj?

²⁰Paycunaga tucuytami ricasha. Ichanga manami cuentata gocushachu. Wiyaytaga wiyanmi. Ichanga imata niycashätapis manami tantiyanchu.»

²¹TAYTA DIOSGA fiyupa alli salbacoj Diosmi. Chaymi munasha paypa yachachicuyninta llapan yachacunanta.

²²Ichanga Tayta Dios acrashan runacunata suwaparcaycan, guechurcaycanmi. Llapantami prësu charisha. Calapösumanmi wichgaycusha. Llapan ima-aycantapis guechurcaycan. Paycunata washänanpäga manami pipis canchu. Ima-aycanta guechuptinpis manami pipis canchu «cutichiy» ninanpaj.

²³Chayno caycaptinpis gamcunaga manami tantiyacunquichu. Imano cananpaj cashanta willashuptiquipis manami wiyacunquichu.

²⁴¿Pitaj camacächisha Jacobpita miraj Israelcuna tiyashanta juccuna charicarcärinanpaj, quiquincunatapis prësu apananpaj? ¿Manachu chaytaga TAYTA DIOS camacächisha? Paycunaga juchatami ruraran. Tayta Dios nishancunataga manami rurayta munaranchu. Yachachishantapis manami wiyacuranchu.

²⁵Chaypitami Tayta Diosga paycunapaj rabyacurcuran. Nircorga guërracho fiyupa ñacachishpan castigasha. Chay runacunataga rabyashpanmi Tayta Dios ninanöpis ushariran. Chayno ruraycaptinpis paycunaga manami wiyacuranchu.