Read Tayta Diosninchi Isquirbichishan Isaías 43 Bible Online

Isaías 43 - Tayta Diosninchi Isquirbichishan bible

Isaías 43

¹Cananmi ichanga Jacobpita mirar aywaj Israelcuna, camashoj TAYTA DIOSNIQUI cayno nishunqui: «Ama manchacuychu. Nogami gamtaga salbashcä. Jutiquipami gayashcä. Nogapanami canqui.

²Mayucunata chimpaptiquipis nogaga gamcunawanmi caycäshäpaj. Mayu yacupis manami apashunquipächu manami shenganquipächu. Nina chaupinpa päsaptiquipis manami rupashunquipächu. Gamcunachöga ninapis manami ratangapächu.

³Nogami cä gamcunapa TAYTA DIOSNIQUI, salbashojniqui. Gam Israelcunapa Santo Diosniquimi caycä. Gamcunata jorgamunäpäga ruquiqui churashcä Egiptutami, Etiopiatami, Sabätami.

⁴Nogaga gamcunata charänäpaj y mana wañunayquipämi juc nasyuncunata ruquiqui churashcä. Chayno rurashcä gamcunata cuyashpämi. Gamcunaga ima-aycapitapis masmi bälinqui.

⁵Ama manchacuychu. Nogaga gamcunawanmi caycä. Cay pachacho inti yagamunan caj-läpitami gamcunapita mirajcunataga cutichimushaj. Cay pachacho inti yaganan caj-läpitapis gamcunapita mirajcunataga shuntamushämi.

⁶Norte caj-lä nasyun runacunatapis ‹Cutichimuy› nishämi. Sur caj-lä nasyun runacunatapis nishaj: ‹Wamräcunataga ama charicurcuychu.› Paycunataga ollguta warmitapis may carupita carpis cutichimushaj.

⁷Nogata rispitamaj cajtaga Noga rurashä cajtaga Nogata aduramaj cajtaga llapanta cutichimushaj.

⁸«Acrashä runacunataga apamuy ari. Paycunaga ñawiyoj caycarpis gapranömi carcaycan. Rinriyoj caycarpis mana wiyajnömi carcaycan.

⁹Llapan nasyun runacuna shuntacay. Llapan marca runacuna shuntacay. Chaycho caycajcuna ¿mayganraj rimir-puntata rimaran acrashä runacunata yanapänäpaj cashanta? Chayno cananpaj rimasha cashpanga mä testïgucunata pushamuchun. Mä chay testïgucuna nichun paycuna willacushanta. Wiyaj cäga llapanpis ‹¡Au, rasunpa nishannömi casha!› nengami.»

¹⁰TAYTA DIOSGA caynömi nin: «Nogata sirbimaj runacuna gamcunami testïgö canqui. Gamcunataga acrashcä rejsimänayquipämi, nogaman yäracamunayquipämi, pï cashätapis tantiyacur musyanayquipämi. Imaypitapis nogallami Diosga cä. Nogapita mas juc diosga manami cangapischu.

¹¹Nogallami TAYTA DIOSGA cä. Nogallami salbacöga cä.

¹²Nogaga salbanäpaj cashantami willacachirä. Nircorga willacachishänöllami salbashcä. Manami juc runacuna ‹diosnë› nishanchu salbashurayqui. Noga salbashätaga gamcuna musyarcaycanquimi.

¹³Imaypitapis nogallami Diosga cä. Nogapa maquëpitaga manami pipis gueshpinchu. Noga ruraptëga manami pipis chapata ruranmanchu.»

¹⁴Israelcunata salbaj Santo TAYTA DIOSMI nin: «Gamcunata salbanäpäga runacunatami Babiloniaman cachashaj. Paycunami llapan runacunata binsir gaticachanga. Caldea runacunatapis alli-tucur büquincunacho caycajta gaticachanga.

¹⁵Nogami Santo TAYTA DIOSNIQUI cä. Nogami Israel nasyunta camacächishcä. Nogami rayniqui cä.

¹⁶Lamar chaupinpami nogaga juc nänita rurarirä. Wac-läman cay-läman yacu cuyuycaj chaupinpami cällitano rurarirä.

¹⁷Conträcunaga aypalla munayniyoj suldärucunawanmi gatimaran. Llapanta usharinanpaj carrëtancunawan, cawalluncunawanmi shamuran. Chay gaticachämajcunataga llapantami tunichishcä. Chaypitaga mananami jatarishanachu. Achqui rataycashanpita upicäcojtanöpis illajpitami illgächishcä.

¹⁸Cananga acrashä runacunata noga në: Ñaupa cajcunallapäga ama yarparaychu. Ni unay cashancunallapäpis ama yarparaychu.

¹⁹Cananga mushojtanami ruraj-aywä. Chayga yurimojnami-aywan. ¿Manachu cuentata gocunqui? Chunyaj chaqui jircapami juc nänita rurashaj. Imapis mana wayushan chaqui jircachömi mayuta yurichishaj.

²⁰Chauraga jirca-allgucunapis, avestruz äbicunapis agradësicamangami. Nogaga chaqui jircachömi yacuta pashtachimö. Chaqui jircachömi mayuta yurichimö. Chayno yurichimö acrashä runacuna upunanpämi.

²¹Chay runacunataga quiquëpämi rurarä. Paycunataga alabamänanpämi rurarä.

²²«Chaypis gamcunaga Jacobpita mirar aywaj Israelcuna manami alabamashcanquichu. Chaypa ruquenga yamacämashcanquimi.

²³Nogapaj uyshacunata rupachinayquipaj manami apamushcanquichu. Rispitamashpayqui manami uywacunata garamashcanquichu. Nogaga manami ‹chaqui micuy ofrendacunata garamay› nir yamacächishcächu. Manami ‹insinsuta saumachiy› nir rabyachishcächu.

²⁴Nogapaj ofrendata apapämänayquipaj manami alli asyajcunata rantishcanquichu. Pishtashayqui uywacunapa wirantapis cushicachimänayquipaj manami garamashcanquichu. Chaypa ruquenga juchata rurashpayquimi yamacächimashcanqui. Tucuy melanaypajcunata rurashpayquimi fiyupa rabyachimashcanqui.

²⁵«Chaypis nogaga Diosniqui cashpämi conträ rurashayquicunata gongaycöna. Jucha rurashayquicunatapis manami yarpäshänachu.

²⁶¿Imallaga canchuraj gamcuna allita rurashayqui? Mä tapunacushun. Mä juchaynajchush caycanqui.

²⁷Unay rimir-punta caj awiluyquipis juchatami ruraran. Yachachishojniquicunapis conträmi ricacuran.

²⁸Mandashojniquicunapis Templöta ganrachisha. Chaynöpami camacächishcä Jacobpita mirar-aywaj Israelcunata ushacächinanpaj, manacajman churananpaj.