Read Tayta Diosninchi Isquirbichishan Isaías 44 Bible Online

Isaías 44 - Tayta Diosninchi Isquirbichishan bible

Isaías 44

¹«Canan ichanga Jacobpita miraj acrashä Israel runacuna, sirbimajcuna sumaj wiyamay.

²Nogami gamcunata ruraj TAYTA DIOSNIQUI caycä. Mamayquipa pachancho yurinayquipäpis nogami camacächirä. Nogami gamcunataga yanapaycä. Jesurún, Jacobpita miraj sirbimajnëcuna, acrashä runacuna ama manchacuychu.

³Nogami camacächej-aywä chunyaj jircapa yacu aywananpaj, chaqui jircacunachöpis mayu aywananpaj. Gamcunapita mirajcunamanga nogami Espiritöta cachamushaj. Paycunatami bindisyunta goshaj.

⁴Chaura paycunaga parguriptin guewa wiñajnörämi miracurenga. Mayu cantuncunacho wayaucuna wiñashannöraj canga.

⁵Paycuna waquenga nengapaj: ‹Nogaga TAYTA DIOSPAMI cä› nir. Waquinnami willacongapaj: ‹Jacobpita mirar aywajmi cä› nir. Mas waquin cajnami ricrancho señalaconga: ‹Quiquin TAYTA DIOSPAMI cä› nir. ‹Israelmi cä› nir cuyay jutintapis churaconga.»

⁶Israelcunata salbaj ray munayniyoj TAYTA DIOSMI cayno nin: «Nogaga gallarinanpita-pacha imaycamapis caycämi. Nogapita mas juc diosga manami canchu.

⁷¿Pitaj nogaman tincun? Mä willapämächun ari. Imano cananpaj cajtapis ¿pitaj gallarinanpita-pacha willacachisha? Ima cananpaj caycajtapis ¿pitaj nin?

⁸Ichanga balurchay, ama manchacuychu. Nogami chayno nirä. Chaycunataga unaynami willacachirä. Gamcunami testïgöpis carcaycanqui. Nogapita mas juc diosga manami canchu. Manami mas juc canchu chapäshunayquipäga. Juctaga manami rejsëchu.»

⁹Ïduluta rurajcunaga manami imapäpis bälinchu. Paycuna mas cuyayllapaj ïduluta rurashanpis manami bälinchu. Ïdulucunata adurajcunapis gaprami, yarpayniynajmi. Chaypitami pengaycho canga.

¹⁰«Diosnë» nir adurananpaj jundiypa ruraj runaga yanga manacajllapämi ruran.

¹¹Chay rurashan ïduluta adurajcunaga llapanpis pengaychömi canga. Adurananpaj rurajcunaga manacaj runallami. Rurashan ïdulupa ñaupanman shuntacashpan paycunaga fiyupa pengaychömi, mancharishami ricaconga.

¹²Masqui yarpachacushun jirrëru imano tacashantapis: Ima fyërrutapis juyllicho sumaj wayllachin. Wayllashataga cumbawan sinsilwan tacaycällarmi imanirajmanpis ruran. Callpaycur-callpaycurmi tacan. Chay jirrëru sacsaj mana micuptenga callpanpis manami canchu. Yacuta mana upurpis rätumi uticacäcun.

¹³Masqui guerupita ïduluta llagllaypa rurajpäpis yarpachacushun: Gueru ima tamäñu cashantapis metruwanmi tupun. Imanirajta rurananpäpis läpiswan cumpaswan dibujan. Nircorga iscupuluwanna uchcuypa llagllan. Chaynöpami ïdulutaga runa-nirajta ruran. Cuyayllapaj caynintapis runa-nirajman ticrachin. Usharcurnami ïdulu jamaränan altarman churan.

¹⁴Chaynöpis, waquin runa sedruta lantan. Chaynami tamyawan wiñar jatunyan. Chaura chay runapaga sedru guerucuna sajtananpaj cangami. Siprescunata, roblecunata munticho caycajta maygantapis acrashan cajtami uryapan rämapan sumaj racuyänanpaj.

¹⁵Chay guerutanami yantapaj sajtan. Waquinwanmi ninata ratarcachir mashacun. Waquinwannami tantata ruran. Waquin pedäsutanami jorgun «diosnë» nir ïduluta rurananpaj. Nircurnami adurashpan ñaupanman gongurpacun.

¹⁶Waquinwanga yanucun. Chaychönami aychata cancan. Nircur sacsananyaj micun. Chay yantawan mashacushpan nin: «Nina ñaupanchöga maysi jamaräcuyllami. Intëröpanami goñurishcä» nir.

¹⁷Puchoj guerupitanami ïduluta ruran «diosnë» nir adurananpaj. Chay rurashanpa ñaupanmannami adurashpan gongurpacun. Nircorga mañacun «¡Gammi canqui diosnë. Salbaycamay ari!» nir.

¹⁸Chay runacunaga manami musyanchu, ni tantiyanpischu. Ñawin chapashanömi carcaycan. Manami tantiyanchu.

¹⁹Tantiyananpaj manami yarpaynin canchu. Manami yarpachacunchu: «Pullan caj guerutaga rupachishcä. Shanshanchönami tantata cuwashcä. Aychatapis cancarcur micushcä. ¿Puchoj cajpitanachi melanaypäta rurashaj? ¿Juc rösu guerullatachi adurashaj?» nir.

²⁰Chayga uchpata micojnömi. Chayno ruräga quiquillanmi llutanta yarpar ruraycan. Chay runacunaga manami yarpachacongapischu: «Aptaraycashä ïduluga ¿manachuraj manacajlla?» nir.

²¹«Jacobpita miraj Israelcuna, gamcunaga nogata sirbimaj cashayquita ama gongaychu. Gamcunaga nogatami sirbimanqui. Gamcunataga nogami rurashcä. Israelcuna ama gongaycamaychu.

²²Conträ rurashayquicunata, jucha rurashayquicunata nogami ushacächishcä pucutayta illgächejnöpis. Yapay nogamanna cutimuy ari. Nogami gamcunataga salbashcä.»

²³¡TAYTA DIOS imanöpis rurashanpitaga cushicuywan gaparay ari syëlu! ¡Pacha rurincho caycajcunapis bïbar gaparpay! ¡Jircacunapis llapan munticunapis fiyupa cushicushpayqui gaparpay! ¡Cushicur gaparpay Jacobpita mirar aywaj Israelcunata salbashpan TAYTA DIOS fiyupa munayniyoj cashanta musyachishanpita!

²⁴TAYTA DIOSMI gamcunataga manaräpis yuriptiqui rurashurayqui. Paymi imapitapis ricashunqui. Paymi nin: «Nogami ima-aycatapis camaj TAYTA DIOS caycä. Syëlutapis allpatapis nogami mashtar sumaj camacächishcä. Pipis manami yanapämashachu.

²⁵Nogaga manami camacächëchu llulla profëtacuna ‹caynömi, wacnömi canga› nishanno cananpäga. Nogami camacächë musyacojcunapapis manana yarpaynin cananpaj. Nogami camacächë yachajcuna jucnin nishan jucnin nishanwan mana tincunanpäpis. Yachashancunapis imapäpis mana bälejna cananpaj camacächë.

²⁶Sirbimajnë rimashantami ichanga cumlichë. Cachäcuna ima rurayta yarpashanpis llapan allillami llojshipanga. Nogami në Jerusalencho yapay runacuna tiyananpaj cashanta, Judächo caj siudäcunapis llapan allchasha cananpaj cashanta. Nogami camacächishaj ragällan caycajcuna yapay wasiyänanpaj.

²⁷Noga niptëga lamar yacupis chaquicäcunmanmi. Mayu aywaycashancunapis yacuynaj chaquishami ricacunman.

²⁸Nogami ray Cirota në: ‹Gammi canqui uyshërö. Gamga llapantapis noga munashänömi ruranquipaj› nir. Paymi Jerusalenta nenga: ‹Gamtaga yapaymi allchashunquipaj› nir. Templutanami nenga: ‹Yapaymi simintuyquita pergayta gallaycongapaj› nir.»