Read Tayta Diosninchi Isquirbichishan Isaías 49 Bible Online

Isaías 49 - Tayta Diosninchi Isquirbichishan bible

Isaías 49

¹Lamar cantuncho caycaj nasyun runacuna wiyamay. Caru nasyun runacuna nishäta sumaj tantiyacuy: Manaräpis yuriptillänami TAYTA DIOSGA gayamaran. Mamäpa pachallanchöraj caycaptillänami nogapa jutëta rimaran.

²Rimashäcuna fiyupa afilasha sablino cananpämi camacächisha. Maquinwanmi ima-aycapitapis chapamasha. Fiyupa llauchi lëchamannömi ticrachimasha. Nircorga lëchata purichicunanmanmi wiñamasha.

³Paymi nimaran: «Israel, gamga sirbimajnëmi canqui. Gampitami nogaga alabasha cashaj.»

⁴Ichanga noga yarparä: «Yangallapämi arushcäpis. Manacajllachömi callpätapis ushashcä. Chayno carpis TAYTA DIOSPA maquinchömi caycä. Arushäpita imano cutichimänanpäpis Tayta Diospa munayninchömi caycan» nir.

⁵TAYTA DIOSGA mamäpa pachancho caycaptillänami pay munashanta willacoj canäpaj churamaran. Jacobpita miraj Israel nasyun runacunata shuntamunäpämi, cutichimunäpämi churamaran. Chaypitami TAYTA DIOSNËGA alli ricamasha. Paymi nogataga yanapaycäman.

⁶Paymi nimasha: «Manami sirbimajnë cashallayquiwanchu usharanga. Manami Jacobpita miraj cawaycar quëdaj Israelcunata cutichishallayquiwanchu usharanga. Chaypa ruquenga nogami camacächishaj nasyuncunapaj juc achquino canayquipaj. Chaynöpami camacächishaj mundu intërucho caycaj runacunaga gam-raycu salbasha cananpaj.»

⁷Israelcunapa Salbacoj Santo TAYTA DIOSNINMI sirbejninta nin: «Gamga juc nasyun runacunapita chiquishami, manacajman churashami cashcanqui. Fiyu mandajcunapa uywayninmi cashcanqui. Cananpitami ichanga raycunapis waquin mandajcunapis ñaupayquiman gongurpaconga. Chaynöga canga Israelcunapa Santo TAYTA DIOSNIQUI gamta acrasha captëmi, aunishäta cumlej captëmi.»

⁸TAYTA DIOSGA caynömi nin: «Ruwacamashayqui örami wiyashcä. Yanapänäta nistashayqui örami yanaparä. Nogami chapäshayqui. Israelcunawan conträtu rurashä señal canayquipämi churashayqui. Chaynöpami nasyun yapay allina canga. Pasaypa pirdichisha caycaj chacracunachöpis yapayna tiyanga.

⁹Prësucunatapis ‹Llojshicuy› ninquipaj. Chacaycho caycajcunatapis ‹Achicyajmanna llojshiy› ninquipaj. Chaura chay runacunaga tiyangapaj may nänipa ñaupanchöpis, may chaqui jircachöpis uywa alli guewata micojnömi.

¹⁰Chauraga yargaypis ni yacunaypis manami canganachu. Intipis, ni acaypis manami ñacachengapächu. Chaynöga canga paycunata noga cuyaptëmi, pusharaptëmi. Chuya yacu pashtajcunamanmi pushashaj.

¹¹Jircacunapapis juc nänitami rurarishaj. Nänicunapis parijashami canga.

¹²¡Masqui ricäriy! May carupitashi aywarcaycämun: Waquenga norte caj-läpita, waquenga inti yaganan cajpita. Waquinnami aywarcaycämun Asuán partipita.»

¹³¡Syëlu, cushicuypita gaparay! TAYTA DIOSGA acrashan runacunata shogashami. ¡Allpa, fiyupa cushicuy! Acrashan runacuna llaquicuycaptin TAYTA DIOSGA cuyapashami. ¡Jircacuna, cushisha caycashayqui musyacänanpaj gaparpay!

¹⁴Sión runacunaga nej: «TAYTA DIOSGA cachaycamashcanchïmi. Diosnëga manami yarpämannachu» nir.

¹⁵Tayta Diosmi ichanga nin: «¿Juc warmi gongaycunmanchuraj wamranta, quiquinpa wamran caycaptin mananachuraj cuyanman? Wamranta juc warmi gongaycuptinpis Nogaga manami gongashayquichu.

¹⁶Nogaga maquëchömi jutiquitapis isquirbiraycächë. Siudäniquipa pergancunatapis ricaycämi.

¹⁷Siudäniquita allchajcunaga apurämi aywarcaycämun. Ushashojcunawan ushajpaj wañuchishojcunami ichanga aywacurcaycanna.

¹⁸Masqui sumaj intërupa ricachacuy. Ricay, imanöshi Israelcunaga shuntacarcaycan. Nircorga gammanna cuticaycämun. Noga TAYTA DIOSMI jurar cayno në: Paycunaga llapanpis cangapaj cuestaj aläjacunata churacushayquinömi, casarananpaj jipash cuyayllapaj adurnucunata jaticushannömi.

¹⁹«Aypalla runacuna cutimuptin nasyunniqui pasaypa quichquimi ricaconga. Ragällan cajcunamanpis, pasaypa chunyaj cajcunamanpis runacuna juntangami. Ushashojcunaga carupanami aywaconga.

²⁰‹Illgashanami› nishayqui wamrayquicunami rinrillayquicho nishunquipaj: ‹Cay nasyonga nogacuna tiyanäpaj fiyupa quichquinami. Juc partita ashipämay ari tiyanäcunapaj› nir.

²¹Chaura gamga yarpaynillayquicho ninquipaj: ‹Nogapaga wamräcuna manami cashachu. Ni wawa tariytapis manami yachashcächu. Chauraga ¿maypitataj cay wamräcuna yurimusha? Nogaga jitarisha, shuyni quiquillämi tiyashcä. ¿Pitaj uywasha paycunataga? Japallätami cachaycamaran. Paycunaga ¿maypitataj shamusha?› nir.»

²²TAYTA DIOSMI cayno nin: «Nasyuncunacho tiyajcunatami nishaj ollgu wamrayquicunata margacurcur apamunanpaj. Marcacunatami señalwan musyachishaj warmi wamrayquicunatapis aparisha apamunanpaj.

²³Raycunami wamrachacushunquipaj. Raypa jipash wamrancunanami uywashunquipaj. Paycunaga rispitashushpayquimi gongurpaconga. Chaquiquiman ñuchu allpa lagacajtapis lajwangami. Chaymi musyanquipaj noga TAYTA DIOS cashäta. Musyanquipaj nogaman yäracamoj cäga mana pengaycho ricacushanta.»

²⁴Callpasapa runa guërracho imatapis quiquinpaj guechucushanta juc runa ¿guechunmanchuraj? Guërracho binsiycur fiyu runa prësu apaycashantapis juc runa ¿guechunmanchuraj?

²⁵TAYTA DIOSMI ichanga cayno nin: «Callpayoj runata guechongami quiquinpaj imatapis apacuycashanta. Binsej fiyu runatapis guechongami quiquinpaj charishanta. Achäquita ashipäshojcunawanga nogami musyanacushaj. Wamrayquicunataga quiquëmi salbashaj.

²⁶Ñacachishojcunataga quiquin-pura micunacunanpämi camacächishaj. Machananpaj bïnuta upushannömi quiquincunapa yawarnintapis uponga. Chaynöpami llapan runacuna musyangapaj Noga TAYTA DIOS salbashojniqui cashäta, Jacobpa munayniyoj Diosnin gamcunata chapaj cashäta.»