Read Tayta Diosninchi Isquirbichishan Isaías 50 Bible Online

Isaías 50 - Tayta Diosninchi Isquirbichishan bible

Isaías 50

¹TAYTA DIOSMI cayno nin: «¡Gamcunaga capas yarpanqui juc runa warminwan raquicajno Israelta cachaycushäta! Chauraga ¿maytaj raquicashä papil? ¡Capas yarpanqui pipapis jagan cashpä gamcuna uyway canayquipaj ranticuycushäta! Chauraga ¿maytaj jaga cashä papil? Chaypa ruquin gamcunaga juchayquipitami ranticusha cashcanqui. Gamcuna mana wiyacoj cashayquipitami mamayqui Israelga jitaricasha.

²¿Imanirtaj noga shamushpäga pitapis mana tariränachu? ¿Imanirtaj, gayacuptëga pipis mana wiyamashachu? ¿Manachu riguiran jorgunäpaj cashanta? ¿Manachu riguiran salbanäpaj cashanta? Noga juc shimi rimarcuptillämi lamar yacupis chaquicäcunman, mayucunapis chaqui jircaman ticracurinman. Chauraga pescäducunapis yacunaypita wañunmanmi, yacu mana captin ismunmanmi.

³Nogami syëlutapis yanauyaycajman ticrarachë. Lütu caycajmanno yanayächë.»

⁴TAYTA DIOSGA yachachimasha uticasha caycajcunata shacyächir cushicachinäpämi. Tayta Dios nimashanta masta-masta tantiyacunäpämi cada tuta wiyaj wiyajlla caycächiman.

⁵TAYTA DIOSMI wiyacunäpaj yanapäman. Nimashancunatapis mana cachariypami cumlishcä.

⁶Astimänanpäpis wajtäta camapashcämi. Shapräta achur-ushaptinpis manami rimacushcächu. Ashllircaycämaptin, togapaycämaptinpis cäräta manami chapacushcächu.

⁷Ichanga TAYTA DIOSMI yanapäman. Chaymi ashllimashancunaga mana nanämanchu. Musyaycämi pengaycho mana canätaga. Chaymi mana cuyucoj gagano caycä.

⁸¿Piraj nogawan churacanman? ¡Pipis nogawan churacayta munaptenga juezman iwal aywashaj! ¿Pillaga caycanchuraj dimandamaj? ¡Cashpanga shamur mä nimächun ari! Ñaupächömi caycan juchaynaj cashäta nimänanpaj.

⁹Nogataga TAYTA DIOSMI yanapäman. Chauraga ¿piraj «juchayojmi canqui» nimanga? Puyu ushaptin röpa ushacashannömi conträcunaga llapan ushacanga.

¹⁰¿Pitaj TAYTA DIOSTA rispitan? ¿Pitaj TAYTA DIOSTA sirbejta wiyacun? Chacaycho purirpis TAYTA DIOSMAN yäracojcunallami, upinaycajlla achquin caycaptinpis Diosman guellicojcunallami wiyacun y rispitan.

¹¹Cuydädu, achquicunayquipaj quiquiquicunalla ninata sindejcuna; chay ninawan achquicusha purejcuna. Chayno cawaptiquega Tayta Dios castigashunquipämi. Fiyupa llaquicur ñacaychömi goyanquipaj.