Read Tayta Diosninchi Isquirbichishan Isaías 56 Bible Online

Isaías 56 - Tayta Diosninchi Isquirbichishan bible

Isaías 56

¹TAYTA DIOS cayno nin: «Rasun cajllata ruray-llapa. Alli cajllata ruray-llapa. Manapis aycällatanami salbashaj. Chayno salbashpämi munayniyoj cashäta musyachishaj.

²Cushishami cawanga nishäta cumlej runaga. Cushishami cawanga säbadu jamay junajta rispitaj runaga. Cushishami cawanga mana alli ruraycunata mana ruräshej runaga.»

³Jäpa runaga TAYTA DIOS munashanno rurar ama ninmanchu: «Acrashan runacunapita shuynimi TAYTA DIOS charämanga» nir. Capun runapis ama ninmanchu «Nogaga juc chaquisha guerunömi cä» nir.

⁴TAYTA DIOSGA caynömi nin: «Capun runacuna caycajpis säbadu jamay junajcunata rispitaptin; Noga munashäcunata cumliptin; conträtuta rurar parlashänölla ruraptenga

⁵warmi ollgu wamrancunata charänanpita mas allitami goshaj. Chaynömi camacächishaj wasëcho tiyananpaj, wasë ruriman yaycunanpaj. Chaynöpami jutin imaycamapis mana gongacangachu.

⁶Jäpa runacuna sirbimänanpaj, cuyamänanpaj Nogapa munaynëman guellicamur säbadu jamay junajta rispitar, conträtuta rurar parlacushäno llapanta cumliptenga

⁷Nogami pushamushaj rispitädu jircäman. Nircurmi aduramänan wasëcho cushishata goyächishaj. Paycuna altarnëcho garamashanta, uywacunata rupachishanta chasquishämi. Wasëpäga llapan runapis ‹Tayta Diosta mañacuna wasi› nengami.»

⁸Mashtacasha caycaj Israelcunata yapay shuntaj TAYTA DIOSMI cayno nin: «Shuntasha caycächishäpa jananmanpis mastarämi shuntamushaj.»

⁹Jirca animalcuna, munti animalcuna shamuy uyshacunano caycaj Israelcunata micucurcunayquipaj.

¹⁰Paycunata mandaycäga gaprayashami carcaycan. Manami imatapis musyanchu. Llapanpis paycunaga carcaycan mana wagyacoj allgunömi. Paycunaga goyay-goyaymi jitaräcun. Puñullarmi cacun.

¹¹Paycunaga mana sacsaytapis atipaj yargaj guella allgucunanömi. Paycunaga imatapis mana tantiyaj uyshërucunami. Cada-ünunmi imanöpis yarpashanno goyäcun. Imatapis quiquincuna munashallantami ashircaycan.

¹²Paycunaga nin: «Upyananchïpaj bïnuta, machächicojcunata ashej aywashun. Canan rurashanchïno warapis rurashun. Capas masllaräpis rurashun.»