Read Tayta Diosninchi Isquirbichishan Isaías 59 Bible Online

Isaías 59 - Tayta Diosninchi Isquirbichishan bible

Isaías 59

¹TAYTA DIOS mana salbananpäga paypa munaynin manami wallcayashachu. Ni mana wiyananpäpis manami upayacäcushachu.

²Ichanga gamcunapa juchayquimi Tayta Diospitaga pergano raquishurayqui. Gamcuna juchata rurashayquipitami Tayta Diosga mana ricärishunquinachu. Mañacuptiquipis mana wiyashunquinachu.

³Gamcunapaga maquiquipis yawarwan tiñicashami caycan. Dëduyquicunapis runa wañuchejllami. Llullacuyllatami parlanquipis. Shimiquicunapis mana allicunallatami parlan.

⁴Pipis manami rasun cajtaga dimandacunnachu. Pipis manami cannachu rasun cajllawan dimanduman chayäga. Chaypa ruquenga llullacunanpaj cajllamanmi yarparaycan. Llullacuyllata rimananpämi carcaycan. Mana allitami gueshyaj carcaycan. Chayno carmi wañuchinacuyllacho carcaycan.

⁵Culebra runtuncunata ogllajnömi paycunaga mana alli rurayllata yarparaycan. Pipis chay runtuta micoj cäga wañongami. Paquiriptenga benënuyoj culebracunallami llojshicaramonga. Paycunaga pachca llicanta awajnömi mana alli ruraycunallata yarparaycan.

⁶Chay llicapitaga manami röpata ruranchu. Chay awashanwanga manami pipis jananta chapacunchu. Paycunaga wañuchicuyllatami arun.

⁷Mana allita rurananpäga apuraypa apurarmi cörrin. Alli runata wañuchinanpaj rasyaylla aywan. Wañuchicuyllapämi yarparcaycan. Paycuna purishanpaga mana allita rurashallanmi caycan.

⁸Manami musyanchu alli goyay imano cashantapis. Paycuna rurashanga llapanpis mana allillami. Paycuna rurashanga llapanpis llutanllami. Paycuna goyashanno goyajcunaga alli goyayta manami tarinchu.

⁹Juchanchïcunapitami salbacunanchïpäga fiyupa sasa caycan. Chaynöpami Tayta Diospa achicyaynin mana chayamunchu. Achicyajta shuyarashanchïpis chacajllami caycan. Achicyayta munaycarpis yanauyaycajllachörämi purircaycanchi.

¹⁰Gapracunanöpis pergata yatayllapami puriycanchi. Ñawiynajnöpis tapra-taprami puriycanchi. Las-dösi inti caycaptinmi chacaypanöpis tacacanchi. Callpallanchïchöraj caycarmi wañushanöna carcaycanchi.

¹¹Llapanchïpis ucumaryanömi gaparpaycanchi. Palumanömi ataycanchi. Salbasyunta shuyararpis manami salbacunchïchu.

¹²Noganchëga Tayta Diosta fiyupami rabyachishcanchi. Juchanchïcunami chayno cashanchïta musyachimanchi. Jucha rurashanchïcunataga yarparaycanchïmi.

¹³TAYTA DIOS nishantaga manami cumlishcanchïchu ni wiyacushcanchïpischu. Paytaga chiquicarcärishcanchïmi. Noganchëga wañuchicuyllapämi, juc runata mana alli rurayllapämi parlashcanchi. Jucta-jucta engañanallanchïpämi parlacushcanchïpis.

¹⁴Chaynöpami alli cajta ruraytaga gongaycärishana. Alli cajta ruraytaga pipis manami yarpannachu. Parlashantaga runacuna manami cumlinnachu. Suwapänacur suwapänacullarnami goyarcaycan.

¹⁵Rasun cajtaga mananami pipis parlannachu. Mana allita rurayta cachaycoj cajtaga ima charashallantapis suwapaycärinmi. Pipis allita mana ruraptin TAYTA DIOSGA fiyupami rabyacurcusha.

¹⁶Chayno caycajta pipis mana michajta ricarmi Tayta Diosga fiyupa almiraran. Chaura munayniyoj cashanta llapanta musyachinanpaj quiquinmi camaricuran.

¹⁷Pay allita rurashanmi pillyar chapacunan chalëcuno ricacusha. Salbacoj cayninnami cascunno ricacusha. Ayñita cutichicoj cayninna röpanno ricacusha. Fiyupa rabyasha cashanna jacucushanno ricacusha.

¹⁸Chayno camaricurcurmi Tayta Diosga cada-ünunta imanöpis rurashanmanno cutichenga. Contrancunataga castigangami. Chiquej cajtaga imanöpis rurashanmannömi cutichenga. Chaynömi ruranga lamar cantun nasyuncunacho tiyaycajtapis.

¹⁹TAYTA DIOSGA fiyupa chayasha mayu aywar jaytarejnörämi chayamongapaj. Llapan runami inti yagamunan caj-läpita-pacha inti yaganan caj-läcama Tayta Diosta rispitangapaj fiyupa munayniyoj caycajta ricashpan.

²⁰TAYTA DIOS cayno nin: «Salbacojmi Sionman shamongapaj. Jacobpita mirar-aywajcuna juchancunapita arpinticuptenga llapantami salbanga» nir.

²¹TAYTA DIOSGA caynömi nin: «Nogaga paycunawan parlacurmi conträtuta ruraycä. Chaymi në: ‹Espiritöga gamcunapita manami witengachu. Yachachishäcunapis gamcunapita manami gongacangachu. Imaypis manami gongacangachu gamcunapita ni gamcunapita mirajcunapitapis› nir.»