Read Tayta Diosninchi Isquirbichishan Jeremías 17 Bible Online

Jeremías 17 - Tayta Diosninchi Isquirbichishan bible

Jeremías 17

¹Acrashan runacunata Tayta Dios cayno nin: «Judá runacuna, rumi shonguyquichömi juchayquicunaga isquirbiraycan fyërrupita rurasha sinsilwan, llauchi fyërru shucshuwan. Jucha rurashayquicunaga altarniquicunapa wagrancunachöpis isquirbiraycanmi.

²Wamrayquicuna manami gonganchu rämasapa yöracunapa rurincunacho altarcuna cashanta, altunnin puytush lömacunacho Asera diosa-niraj ïdulucuna cashanta.

³Altu puntacunachömi camacächishaj juchayquipita ima-aycayquitapis, guellayniquitapis suwapäshunayquipaj. Chaynöga camacächishaj nasyunniquicho fiyupa juchata rurashayquipitami.

⁴Partisyun goycushä nasyuntapis cachaycärinquipämi. Quiquiquicunapis mana rejsishayqui nasyunchömi contrayquicunapa uywaynin canquipaj. Nogaga fiyupami gamcunapaj rabyasha caycä. Chaymi nina fiyupa ratarir mana upejno ushajpaj usharishayquipaj.»

⁵TAYTA DIOS nin: «Maldisyunädumi canga runa-masillanman yäracojcunaga. Maldisyunädumi canga callpallanman yäracojcunaga. Maldisyunädumi canga nogaman mana yäracamoj runaga.

⁶Chay runaga chunyajcho wiñamoj jachanömi canga. Manami cuentata gocongachu alli goyay chayaptinpis. Rumicuna chaupincho jacha quiquillan wiñacamojnömi canga. Pipis mana tiyashan cachi cashan chaqui allpacho wiñacoj jachanömi canga.

⁷«Nogallaman yäracamoj runami ichanga bindisyunta chasquenga.

⁸Chay runaga cangapaj mayu cantunman yörata lantaycusha mayu rurinpa sapincuna sapichajnömi. Chay yörataga shanarpis manami chaquichinchu. Imaypis berdillami caycan. Wayuyninpis mana pishiypami caycan.

⁹«Runapa shongonga fiyupa mana tantiyaypämi. ¿Piraj tantiyanman llullapar engañaycashanta? ¿Piraj musyanman mana allita rurayta yarpaycashanta?

¹⁰Nogami ichanga llapanpa shongun imano yarpaycashatapis musyä. Nogaga cada-ünuntami imanöpis cashanpita, imanöpis rurashanpita pägunta gö.»

¹¹Engañayllapa rïcuyaj runaga caycan chacwa jucpa runtunta ogllajnömi. Mana yarpashapitami llapan riquësancuna cachayconga. Chaura ushanantaga pasaypa pobrimi ricaconga.

¹²TAYTA DIOS, tiyashayqui Temploga fiyupa rispitädumi. Gallarinanpita-pachapis casha fiyupa rispitashami.

¹³Gamllami canqui Israelcuna yäracunanga. Gamta gongaycushoj cäga canga fiyupa pengaychömi. Gamta manana sirbishoj cäga canga ñuchu allpacho jutita isquirbishan illgacäcushannömi. Mana chaquej chuya yacuno caycaptiqui cachaycushushayquipitami chaynöga canga.

¹⁴TAYTA DIOS, gamllatami rispitar alabä. Allchacächimay ari sänuna canäpaj. Salbaycamay ari salbashana canäpaj.

¹⁵Runacunaga niman: «¿Imaytaj TAYTA DIOS willacachishancuna cumlenga? ¡Juclla cumlicächun ari!» nir.

¹⁶Chayno niycämaptinpis nogaga manami mañacamurächu castiganayquipaj. Paycuna fiyupa ñacananpäpis manami nirächu. Gamga musyanquimi imata nishallätapis. Wiyaycämaptiquimi llapantapis nishcä.

¹⁷Chaymi Tayta Dios ama camacächiychu noga manchacunätaga. Gamga canqui llaquicur ñacashä wichan imapitapis pacamajmi.

¹⁸Nogata gaticachämajcunata ichanga pengayman churay. Nogataga ama pengayman churamaychu. Paycuna ricacuchun fiyupa mancharisha. Nogaga ama mancharishächu. Paycuna llaquicuychöpis cachun. Paycunataga fiyupa castigar ushariy.

¹⁹TAYTA DIOS nimaran: «Jeremías, Judäpa raynincuna yaycushan llojshishan puncuman ayway. Nircur chaycho willacuy. Y chaycho willacushayquinölla Jerusalenman yaycuna waquin puncucunachöpis willacuy.

²⁰Cayno willacunqui: ‹Judäpa raynincuna, Judá runacuna, Jerusalencho tiyaj runacuna TAYTA DIOS nishanta sumaj wiyay-llapa.

²¹TAYTA DIOSMI cayno nin: Säbadu jamay-junajchöga ama ima guepitapis apaychu. Ni imatapis ama yaycachiychu Jerusalén puncupaga.

²²Säbadu jamay junajchöga wasiquicunapitapis ama ima guepitapis jorguychu. Chay junajchöga ima aruytapis ama aruychu. Säbadu jamay junajchöga unay awiluyquicunata nishäno nogata rispitamashpayqui jamay.

²³Awiluyquicunaga willapaycaptëpis manami wiyacuranchu. Noga nishäta ruraytaga upanömi mana munaranchu. Piñacushätapis manami wiyacuranchu.

²⁴« ‹Nishäta rasunpa wiyacuy. Säbadu jamay junajchöga siudäman maygan puncupapis ima guepitapis ama yaycachiychu. Chay junäga ama arunquichu. Cachun nogata aduramänayquipaj acrasha junaj.

²⁵Chayno gamcuna rispitamaptiquega ray David jamarashancho jamaränanpäpis ray caycangami. Chaura cay siudäpa puncuncunapa rayga yaycuycangami carrëtancunawan, cawalluncuna muntasha, llapan autoridänincuna, Judá runacuna, Jerusalén runacunapis gatiraptin. Jerusalenchöpis imaycamapis runacuna tiyaycangami.

²⁶Chaymanmi shamongapaj Judá nasyuncho caycaj siudäcunapita, Jerusalenpa läduncunapita, Benjamín trïbu tiyashanpita, aypalla puntayoj caycashan partipita, Néguev partipitapis. Paycunaga Templuman apamongapaj uywancunata rupachinanpaj, chaqui micuy ofrendacunatapis. Insinsuntapis apamonga. Agradësicamashpanpis ofrendancunata apamonga.

²⁷Noga nishäta gamcuna mana wiyacushpayqui säbadu jamay junaj mana jamaptiqui, Jerusalenpa puncuncunapa ima guepitapis mana yaycuchinanpaj nishätapis mana wiyacuptiqui ichanga siudäpa puncuncunaman ninata sindipaycushaj. Chaymi Jerusalencho caycaj palasyucunata rupar ushacurcongapaj. Chaytaga manami pipis upichengapächu.› »