Read Tayta Diosninchi Isquirbichishan Jeremías 18 Bible Online

Jeremías 18 - Tayta Diosninchi Isquirbichishan bible

Jeremías 18

¹TAYTA DIOS nimaran:

²«Ayway manca rurajpa wasinman. Chaychömi willashayqui runacunata willanayquipaj.»

³Chaura noga Jeremías aywar manca rurajtaga tarishcä manca ruracunancho mancata ruraycajta.

⁴Ruraycashan mana alli llojshiptenga pirdiraycachir chay mitullapita yapay ruraran munashanno alli llojshinanpaj.

⁵Chaura TAYTA DIOS niran:

⁶«Israelcuna, manca ruraj runa mituta rurashanno ¿manachuraj nogapis gamcunata ruräman? Manca rurajpa maquincho mitu caycashannömi gamcunaga nogapa maquëcho caycanqui.

⁷Nogaga munashä örami illgarachë, jorgurë, sajtarë nasyuncunata-carpis, raycunata-carpis.

⁸Chay nasyun runacuna mana alli rurayta cachaycärir allillatana ruraptenga paycunata castiganäpaj caycashächöpis mananami castigänachu.

⁹Munashä örami nogaga juc nasyun jatunyänanpäpis yanapä, raycuna munayniyojyänanpäpis yanapä.

¹⁰Chay runacuna noga nishäta mana wiyacur quiquincuna munashannölla ruraptin ichanga yanapänäpaj caycashächöpis manana yanapäshänachu.

¹¹«Judá runacunawan Jerusalén runacuna, wiyamay. Gamcunaman mana allita chayachimunäpämi camariycä. Gamcunata castiganäpämi yarpaycä. Chaymi gamcunaga arpinticushpayqui allillata rurarna goyay.

¹²Chaura paycuna nengapaj: ‹¡Imapänataj allitapis rurashaj! Nogacunaga quiquë munashäno goyäcushaj. Shongö mana allita yarpashanno imatapis ruracushaj› nir.»

¹³Chaymi TAYTA DIOS cayno nin: «Mä nasyuncunacho tapucachay. Mä pillaga wiyashachush cay runacuna rimashantano. ¡Israel runacunaga manchariypaj mana allitami rurasha!

¹⁴¿Puntacunapita ïlaj chuya yacu urämoj chaquinmanchuraj? ¿Líbano altunnin puntacunacho caycaj rashta illganmanchuraj?

¹⁵Acrashä runacunami ichanga gongaycamasha. Mana rasun caj dioscunallapämi insinsutapis rupachin. Unay purishan nänicunapita pantaycärirmi juc-läpana purircaycan. Mana rejsishan nänipanami aywarcaycan.

¹⁶Chayno cashanpitami nasyunnintapis chunyajna cananpaj camacächisha. Fiyupa manchariypaj ragällanna caycan. Llapanpis chaypa päsajcunaga almirashami umanta awiconga.

¹⁷Löcu wayra shamojnömi Nogaga Israelcunata mashtarishaj. Chaymi contrancunapita machiypa-machir gueshpenga. Castiganä junäga paycunapita noga ticracurcushämi.»

¹⁸Runacunaga ninacuran: «Jeremiasta calumyananchïpaj parlacushun. Pay manana captinpis cüracunaga manami pishengapächu yachachimänanchïpaj, musyajcuna willapämänanchïpaj, profëtacunapis Dios nishanta willamänanchïpaj. Jeremiastaga tucuynöpa calumyashun. Pay imata willapämashapis ama wiyaj-tucushunchu.»

¹⁹¡TAYTA DIOS, wiyaycamay ari! ¡Conträcuna imanir calumyaycämashantapis masqui wiyay!

²⁰Paycunaga mana alliman tunichimänanpämi uchcuta rurasha. ¿Allita rurashanchïpita mana alliwanchu cutichimanchi? Paycunapaj fiyupa rabyasha caycashayquipita allchacänayquipaj paycunapa faburnin gamta ruwacushäta yarpaycuy ari.

²¹Canan ichanga gam castigaycuy wamrancuna yargaypitapis sabliwanpis wañunanpaj. Warmincunapis biyüda wamraynajllana quëdachun. Ollgu cajcunaga gueshyawan wañuchun. Mösucunapis guërracho wañuchun.

²²Paycunaman illajpita suwacuna yagacuycuchun. Paycuna fiyupa manchariywan gaparpashan wiyacächun. Chayno päsachun mana alliman chayachimänanpaj uchcuta rurashanpita, purishäcunaman togllata churashanpita.

²³TAYTA DIOS, gamga musyaycanquimi paycuna wañuchimänanpaj parlacushanta. Chayno fiyu cashanpita, juchata rurashancunapitaga ama perdunaychu ari. Fiyupa rabyasha castigaycuy ari. Chaynöpa paycunaga mana alliman chayachun.