Read Tayta Diosninchi Isquirbichishan Jeremías 23 Bible Online

Jeremías 23 - Tayta Diosninchi Isquirbichishan bible

Jeremías 23

¹TAYTA DIOS nin: «¡Ay imanöraj canqui mana alli uyshëruno caj mandajcuna! Gamcunaga uyshäno caycaj acrashä runacunatami mashtacächishcanqui, pantacächishcanqui.

²Gamcunaga chay uyshäcunatami mashtarishcanqui. Mana sumaj ricaptiquimi gueshpir aywacusha. Mana allita rurashayquipitaga nogapis castigashayqui imanöpis rurashayquimannömi. Noga TAYTA DIOSMI chayno në.

³Ichanga may-chaypapis aywacunanpaj camacächishäpita quiquëmi yapay shuntamushaj. Llapanta shuntarcurmi paycunataga tiyashancunaman cutichishaj. Chaychönami aypallaman miranga.

⁴Nircur alli uyshërucunatanönami churashaj alli ricananpaj. Chaura runacunaga imapitapis mana manchaconganachu, jucnayllapis manami pishenganachu. Noga TAYTA DIOSMI chayno në.

⁵«Juc junäga Davidpita lijïtimu mirar aywajnami ray cangapaj. Payga alli yachaj cayninwanmi mandangapaj. Cay nasyunchöga alli cajllatanami rurangapäpis.

⁶Pay ray cashan wichan Judá runacunaga allillami goyangapaj. Israel runacunapis allimi goyanga. Chay mandajpa jutintaga churapangapaj ‹Alliman churamajninchi TAYTA DIOS› nir.»

⁷TAYTA DIOSMI nin: «Juc junäga manami juranganachu ‹Israelcunata Egiptupita jorgamoj TAYTA DIOSPA jutincho jurä› nir.

⁸Chaypa ruquenga jurangapaj ‹Israelcunapita mirar aywajcunata norte caj-lä nasyunpita cutichimoj, waquin nasyuncunaman mashtarishanpita shuntamoj TAYTA DIOSPA jutincho jurä› nishpannami. Nircorga quiquincunapa nasyunninchönami tiyacongapaj.»

⁹Noga Jeremiasga, Tayta Diospa ñaupancho caycashpä, profëtacunapaj TAYTA DIOS parlashanta wiyashäpitami pasaypa turwatashano caycä. Intëru cuerpöpis sicsicyaycan. Fiyupa machasha runano, mana yarpänancama upyasha runano caycä.

¹⁰Cay nasyunchöga juchallatami rurarcaycan majayoj-masincunawan cacushpan. Mana allita rurananpäga bïbumi. Paycuna chayno cashanpitami cay nasyuntaga Tayta Dios maldisyunaycusha. Chauraga allpapis chaquicäcushami. Chunyajcho wiñamoj guewacunapis rupacäcushami.

¹¹TAYTA DIOSMI cayno nin: «Asta profëtacunawan cüracunapis manami manchacamanchu. Templöchöpis tarishcä mana allita rurarcaycajtami.

¹²Chayno cashanpitami caminuncunapis fiyupa llushca y chacaj ricaconga. Nogami camacächishaj tangariptin chaycho tuninanpaj. Juchancunapita jusgashpä paycunaman disigrasyatami chayachimushaj. Noga TAYTA DIOSMI chayno në.

¹³«Nogaga ricashcämi Samariacho profëtacuna mana munashäta rurarcaycajta. Paycunaga Baal diospa jutinchömi willacusha. Chayno rurashpanmi acrashä Israelcunatapis pantacächisha.

¹⁴Noga ricashcämi Jerusalencho caj profëtacunapis fiyupa melanaypäcunata rurarcaycajta. Paycunaga majayojcunawanmi cacurcaycan; llullacurcaycan. Chayno rurarmi juchasapacunatapis mana allita ruraycashanta mana cachaycunanpaj shacyächin. Chaymi paycunapis, siudächo tiyajcunapis Nogapäga carcaycan Sodomawan Gomorra cashanno.»

¹⁵Chayno cashanpitami noga munayniyoj TAYTA DIOSGA llapan profëtacunapaj në: «Jerusalencho caj profëtacunapitami nasyun intëruchöpis yachacusha. Chaypitami paycunataga fiyupa ashgajta garaj-aywä. Bininasha yacutami upuchej-aywä.»

¹⁶Munayniyoj TAYTA DIOSMI nin: «Israelcuna ama cäsupaychu chay profëtacuna willacushantaga. Paycuna willacushanga llapanpis llullacuyllami. Chay willacurcaycashantaga quiquincunapa yarpaynillanpitami jorgurcaycan. Nogaga manami willapashcächu.

¹⁷Noga willachishäta manacajman churajcunata chay profëtacunaga nin ‹Llapanpis allimi llojshipäshunquipaj› nir. Shongun munashannölla mana allita rurajcunatana ‹Gamcunataga manami ima disigrasyapis chayashunquipächu› nin.

¹⁸«Paycunaga ¿maygantaj pacayllapa parlacunäpaj shuntacashäman shamusha? Paycuna ¿maygantaj ricasha u wiyasha parlaycashäta? Noga nishätaga ¿pitaj wiyacusha?

¹⁹Chaymi mana wiyacamajcunataga rabyashpä löcu tamyano, löcu wayra ima-aycatapis apacojno usharishaj.

²⁰Llapan yarpashäta manaraj rurayta ushashäcamaga rabyashä manami päsangachu. Juc junäga cayno niycashäcunata sumaj yarpachacur tantiyacunquipämi.

²¹«Chay profëtacunataga manami cachamushcächu. Ni willayllapis manami willapashcächu. Chaypis paycunaga cörriylla intërupa aywasha nogapa jutëcho willacuraycar.

²²Noga pacayllapa parlacushäman shamusha cashpanga Noga nishätami acrashä runacunata willapanman caran. Chauraga llutanta ruraycashanpitapis allitami ruranman caran.

²³«Carucho cajpäpis sercacho cajpäpis nogallami TAYTA DIOSGA cä.

²⁴Noga ricanäpitaga ¿piraj pacacunman? Syëluchöpis allpachöpis caycämi. Noga TAYTA DIOSMI chayno në.

²⁵«Nogaga wiyashcämi chay llutan profëtacuna llullacuypa nogapa jutëcho willacur ‹Suyñushcämi. Suyñuynëchömi willapämasha› nir willacuycajta.

²⁶¿Imaycamaraj chay profëtacunaga llullacuyllapa, quiquinpa yarpayllanpita willacurcaycanga?

²⁷Paycunaga suyñushancunata jucninpis-jucninpis willacushpanmi acrashä runacunawan gongaycachimayta munarcaycan. Chaynöllapami unay caj awiluncunapis Baalta adurashpan gongaycäramaran.

²⁸Chay profëtacuna suyñushallanta willacuyta munarga willacuchun. Noga willapashä cajcuna ichanga willapashänölla willacuchun. Päjapita rïgu mas bälishannömi willacuynëpis mas bälin.

²⁹Noga willacachishäga caycan ninanömi, gagata paquej cumbanömi. Noga TAYTA DIOSMI chayno në.

³⁰« ‹Diosmi willamasha› nej llulla profëtacunapa contranmi caycä.

³¹Quiquinpa yarpaynillanpita jorgurcur noga nishätano willacoj llulla profëtacunapa contranmi caycä.

³²‹Suyñushcä› nir llullacuypa willacojcunapa contranmi caycä. Manacajcunata willapashpanmi acrashä runacunata pantacarcaycächin. Chay profëtacunataga noga manami cachashcächu. Manami ‹willacuy› nishcäpischu. Chaynöpami paycunaga acrashä runacunata alli yanapayta mana camäpacunchu. Noga TAYTA DIOSMI chayno në.

³³«Jeremías, pï runapis, profëtacunapis u cüracunapis ‹¿ima llaquicuypätataj TAYTA DIOS nishurayqui?› nishuptiqui gampis ninqui: ‹TAYTA DIOS nimasha: «Llaquicuypämi gamcunataga cachaycushayqui.» ›

³⁴Cüra carpis, profëta carpis u jinan marca runapis: ‹Llaquicuypätami TAYTA DIOS nimasha› nejtaga noga castigashaj quiquinta llapan famillyancunatawanmi.

³⁵Chayno tapunanpa ruquenga rejsinacushanta u famillyantapis tapunman ‹Noganchïpaj ¿ima nintaj TAYTA DIOSGA? ¿Imatataj cuntistamashcanchi?› nir.

³⁶Ichanga pipis ama tapuchunnachu ‹¿Ima llaquicuypätataj TAYTA DIOS nishurayqui?› nir. Pipis chayno niptenga chay rimajtami llaquicuyman chayachishaj. Paycunaga imaypis mana ushacaj munayniyoj TAYTA DIOS caycaptëmi alli willapashäcunata jucnöman ticrachisha.

³⁷Profëtataga tapuy: ‹¿Ima nintaj TAYTA DIOSGA? ¿Imatataj cuntistamashcanchi?› nir.

³⁸‹¿Ima llaquicuypätataj TAYTA DIOS nishurayqui?› niptin ichanga gam ninqui: ‹TAYTA DIOSGA nin: Gamcunaga «amana rimanquichu» nishätapis jinallami rimarcaycanqui.

³⁹Chayno llaquicachimaptiquimi gamcunataga cachaycushayqui. Unay awiluyquicunata goycushä siudäpitapis carumanmi jitarishayqui.

⁴⁰Nircorga gamcunapaj camacächishaj imaycamapis manacajman churasha canayquipaj, pengaycho canayquipämi. Chaytaga manami imaypis gonganquipächu.› »