Read Tayta Diosninchi Isquirbichishan Jeremías 30 Bible Online

Jeremías 30 - Tayta Diosninchi Isquirbichishan bible

Jeremías 30

¹Jeremiastami TAYTA DIOS willaparan. Willaparmi niran:

²«Israelcunapa noga TAYTA DIOSNINMI në llapan nishäcunata isquirbinayquipaj.

³Juc junäga acrashä Israelcunapa, Judá runacunapa surtinta rucachishämi. Noga TAYTA DIOSMI chayno cananpaj në. Unay caj awiluncunata goycushä nasyunmanmi cutichimushäpaj.»

⁴Israelcunapajwan Judäcunapaj TAYTA DIOS rimaran.

⁵Chay rimashanga caynömi caycan: «¡Fiyupa llaquicuywan gaparpashanmi wiyacaycan! ¡Fiyupa manchariywan wagarcaycashanmi wiyacaycan!

⁶Mä tapucachay, ¿juc ollgu runa gueshyacunmanchuraj? Chauraga ¿imanirtaj ollgu runacunata ricä chegllan charisha tumaycachaycajta, gueshyacunanpaj nanay chariptin warmi milluycachaycajtano? ¿Imanirtaj paycunaga llapanpis pasaypa yur'gacäcusha?

⁷Chaynöga canga fiyupa manchariypaj junaj chayamunanpaj captinmi. Chay junajnöga manami imaypis canyasharächu. Chay wichan Jacobpita mirajcunapäga fiyupa llaquicuymi cangapaj. Ichanga paycunata noga salbashämi.

⁸Noga munayniyoj TAYTA DIOSMI në: Acrashä runacuna ñacar yüguta matancaraycashantami paquirishaj. Watasha caycashan wascantapis rachirishaj. Chaypitanaga manami imaypis juc-lä nasyun runacunapa uywaynin canganachu.

⁹Chaura paycunaga rispitar sirbimanga noga TAYTA DIOSLLANTANAMI. Churapashä raynintapis sirbenga. Chay rayga Davidnömi mandangapaj.

¹⁰«Noga TAYTA DIOSMI në: «Jacobpita mirar aywaj Israelcuna, ama manchacuychu. Sirbimajcuna ama manchariychu. Caru nasyunman apashushayquipitami gamcunata y llapan wamrayquicunata jorgamushayquipaj. Chaypitaga allinami goyäcunquipaj. Alli goyäcuptiqui pipis manami manchachishunquipänachu.

¹¹Nogaga gamwanmi caycä imapitapis salbanäpaj. Maychöpis jitarishächo caycashayqui nasyun runacunataga llapantami wañuchishaj. Gamcunatami ichanga mana wañuchishayquipächu. Chaypa ruquenga rurashayquimanno castigayllami castigashayqui. Jina castigänillataga manami cachaycushayquipächu.

¹²«Noga TAYTA DIOSMI cayno në: «Gueriquega manami imanöpapis allchacannachu. Nanächicuycashayquipäga manami jampi canchu.

¹³Manami pipis canchu gamta ricashunayquipäga. Manami pipis canchu gueriquita jampipäshunayquipäga. Manami jampipis canchu allchacänayquipäga.

¹⁴Llapan yanapäshoj nasyun runacunami gongaycushurayqui. Paycunataga manami imapis gocunnachu. Yupaytapis mana atipaypaj juchata rurashayquipitami, fiyupa mana allicunata rurashayquipitami mana cuyapaypa castigashcä. Gamtaga contrayquinöpis nogami gueshyaj-tucachishcä.

¹⁵Nanaycäshushayquipaj manana jampi caycaptenga ¿imapänataj nanächicur gaparaycanqui? Gamtaga castigashcä yupaytapis mana atipaypaj juchata rurashayquipitami, fiyupa mana allicunata rurashayquipitami.

¹⁶«Ichanga gamcunata ñacachishoj cajpis llapanmi ushacanga. Contrayquicunapis llapanmi prësu aywanga. Gamcunata guechushojcunataga quiquincunatapis guechunanpämi camacächishaj. Suwapäshoj cajcunataga paycunatapis suwapangami.

¹⁷Gamtami ichanga gueriquicunata jampipäshayqui. ‹Dios cachaycushan siudä› nir manacajman churashuptiquipis gamtaga allchacächishayquipämi. Noga TAYTA DIOSMI chayno në.»

¹⁸TAYTA DIOS nin: «Jacobpita mirajcunata nogami cutichimushaj. Paycuna tiyashan nasyunninta cuyapäshämi. Juchusha caycaj janancunachömi siudänincunatapis yapay ruranga. Palasyuncunatapis maychöpis cashanchömi yapay jatarachenga.

¹⁹Paycunami agradësicamar alabamanga. Cushishami goyanga. Paycunaga manami wallcayangachu. Chaypa ruquenga nogami camacächishaj achcayänanpaj. Llapan rispitananpaj noga camacächiptëmi manana pipis manacajmanga churanganachu.

²⁰Israelcunaga unay cashannönami goyanga. Juc marcanöllanami nogapa ñaupächo tiyanga. Paycunata ñacachej cajtaga castigashämi.

²¹Quiquincunapitami juc mandaj jatarenga. Llapanta mandananpaj quiquincunapitami yurenga. Pay ñaupächo cananpämi camacächishaj. Chayno mana camacächiptëga ¿piraj ñaupäman chayamunman?

²²Paycunaga noga acrashä runacunami canga. Noganami Diosnin cashaj. Noga TAYTA DIOSMI chayno në.»

²³TAYTA DIOS rabyashan fiyu runacunapäga caycan löcu tamyano, löcu wayra ima-aycatapis apacojnömi.

²⁴TAYTA DIOS rabyashanga manami päsangachu yarpashanta manaraj rurayta ushashancamaga. Llapan chaycunata gamcunaga juc junajrämi tantiyanquipaj.