Read Tayta Diosninchi Isquirbichishan Jeremías 4 Bible Online

Jeremías 4 - Tayta Diosninchi Isquirbichishan bible

Jeremías 4

¹Chayno niptinna TAYTA DIOS niran: «Israelcuna nogamanna cutimuyta munarga juchayquicunapita arpinticunquiman. Mana sirbej ïduluyquicunata jitariycuptiqui, Noga munashänöllana ruraptiqui,

²rasunpa juraptiqui llapan nasyuncunapis bindisyunta chasquengami. Chauraga runacuna cushicushpan nogatami alabamanga.»

³Jerusalén runacunatawan Judá runacunata TAYTA DIOS cayno nin: «Jamaj chacrata quichajno shonguyquicunata camariy. Amana sïguir muruynachu mana alli custumriquicuna shatano caycajmanga.

⁴Jerusalén runacuna, Judá runacuna cuerpullayquichöga ama señalacuychu. Chaypa ruquenga rumi shonguyquitapis camariy conträtuta rurar parlashanchïta cumlinayquipaj. Chayno mana ruraptiquega illajpitami fiyupa rabyacurcushaj. Rabyacurcuptëga manami pipis allchacächimangapächu. Nina ratariptin pipis upichiyta mana camäpacushannömi ricacushaj.

⁵«Jerusalencho, Judächo tiyajcunata willay-llapa. Trompëtacunata tucashpayqui nasyun intërupa willacuy-llapa. Callpaypa gayacuy: ‹¡Llapanchi shuntacäshun! ¡Curalasha siudäcunaman yaycucushun!› nir.

⁶Bandërayquicunawan sëñata ruray Sión caj-läman. Ama wiyaraychu-llapa. Mayman pacacunayquipäpis ashiy-llapa. Nortipitami apamushaj wañuchicojcunata. Chauraga fiyupa ñacaymi canga.

⁷Puñunancho caycashanpita cäsata ashej liyun aywajnömi nasyuncunata ushajpaj illgächej aypalla suldärucuna aywaycämun. Nasyunniquicunata illgächinanpämi aywarcaycämun. Paycunami siudäniquicunatapis ragällan chunyajta cachayconga.

⁸Chaymi gachga röpacunata jaticuy. Fiyupa wagashpayqui nanächicuycajnöraj gaparpay. Nogaga jinallami nina ratarejnöpis gamcunapaj fiyupa rabyaycä.»

⁹TAYTA DIOSMI cayno nin: «Chay junaj chayamuptenga raypis, mandajcunapis manchariywan sicsicyangami. Cüracunapis fiyupami mancharengapaj. Profëtacunapis jupayllashanömi ricacongapaj.»

¹⁰Chayno niptin noga Jeremías nirä: «¡Ay TAYTA DIOS, imanöshi Jerusalén runacunata engañashcanqui! Gamga aunirayqui ‹imaypis alli goyayllami canga› nirchaj. Chaypis runacunaga wañunanpaj cuncanman cuchillun churapacushanömi carcaycan.»

¹¹Tayta Diosnami nimaran: «Chay junäga Jerusalén runacunata nengapaj: ‹Chunyajpitami acaj wayra wayraycämun acrashä runacuna cajman› nir. Chay wayraga manami rïguta wayrananpaj shamoj wayranöchu.

¹²Noga wayrächimushä wayraga cangapaj fiyu wayrami. Cananmi yarpäshaj paycuna imano jusgasha cananpäpis.

¹³«Chaura Israelcuna nengapaj: ‹Masqui ricäriy. Contranchïcunaga pucutaynömi aywarcaycämun. Pillyapaj carrëtancunapis löcu wayranörämi. Cawalluncunapis ancapita masrämi cörriycämun. ¡Cananchi cananllaga! ¡Manami imanöpa gueshpiytapis camäpacunchïnachu!› nir.

¹⁴Chaura noganami nishäpaj: ‹Jerusalén runacuna jucha rurashayquicunapita arpinticuy. Chaynöparämi salbacunquipaj. ¿Imaycamaraj jucha rurayllapaj yarparcaycanqui?› nir.

¹⁵Dan trïbu, Efraín trïbu runacuna tiyashan puytush lömacunapita-pachami mana alli willapacuna chayaycämun.

¹⁶Jerusalencho tiyajcunata, waquin nasyun runacunatapis willay fiyupa caru nasyunpita contrancuna aywaycämushanta. Paycunaga Judá nasyunman magaj yaycunanpämi büllata ruraraycar aywarcaycämun.

¹⁷Tayta Diosnin caycaptë conträ ricacushanpitami Judá runacunataga runa chacranta tumajno intëru cantunpa contrancuna curalapaycärenga. Noga TAYTA DIOSMI chayno në.

¹⁸Quiquiqui mana allita rurashayquipitami chaynöga päsashurayqui. Fiyupa llaquicuycunaga gamcunaman chayamusha mana allicunata rurashayquipitami. Chayno yarpachacur llaquicuptiqui shonguyquipis nananrämi.»

¹⁹¡Ay shongullau shongullau! ¡Llaquicuywanmi shongö tic-ticyaycan! Pillyapaj trompëta wagamojta, pillyapaj büllata ruraycämojtami wiyashcä. Chaymi jamaytapis manana tarëchu. Manami upällapis cacömanchu.

²⁰Yapay-yapaymi mana allicuna chayaycämun. Nasyuncunapis llapanmi ushacashana. Pachacunäpaj ichichishä toldöcunatapis illajpitami illgarachisha.

²¹¿Imaycamaraj wiyashaj pillyapaj trompëta wagamojta? ¿Imaycamaraj ricashaj conträcuna pillyapaj bandëran aptasha caycajtapis?

²²Chaura Tayta Dios niran: «Acrashä runacunaga upa, mana tantiyacojmi. Manami rejsimanchu. Mana tantiyacoj yarpayniynaj wamräcunami. Allita ruraytaga manami yachanchu. Mana allita ruraytami ichanga fiyupa yachan.»

²³Cay pachata ricäriptë chunyaj manami imapis cashachu. Syëluta ricäriptë manami cashachu ima achicyajpis.

²⁴Puntacunata ricäriptë cuyuriycashami. Puytush lömacunapis cuyuriycällarmi juchur ushacaycasha.

²⁵Ricchacuriptë manami ima runapis cashanachu. Äbicunapis ushajpänami aywacusha casha.

²⁶Ricäriptë micuy alli wayunan chacracunapis chunyajman ticrashami caycasha. Llapan siudäcunapis illgashanami casha. Chaynöga TAYTA DIOSMI fiyupa rabyacurcur ruraycusha casha.

²⁷TAYTA DIOSMI cayno nin: «Cay pachacho cajtaga llapantami illgächishaj. Ichanga manami ushajpäga illgächishärächu.

²⁸Cay pachachöga fiyupa llaquicuymi canga. Syëlupis chacacäcongarämi. Imano cananpäpis nishätaga manami cutiricushächu. Chayno cananpaj camacächishätaga rasunpami cumlishaj.

²⁹Lëchata jitajcuna, muntäducuna gayarashpan shamojta wiyar llapanmi siudäpita gueshpir aywacun. Shatacunaman munticunaman pacacaycärin. Gaga chaupincunaman wichacarcärin. Siudäcunaga llapanpis chunyajmi quëdacun. Chaychöga manami pipis tiyannachu.

³⁰Chayno captin ¿imataraj ruranqui Sión runacuna? ¿Imapätaj murädu röpatapis jaticunqui? ¿Imapätaj gori aläjacunatapis churacunqui? ¿Imapätaj ñawiquitapis yanawan pintacunqui? Cuyayllapaj cashayquipis yangami. Cuyashayquicunapis llapanmi melanäcushunqui. Paycuna cananga wañunayquitami munarcaycan.

³¹Guechpa wawanta warmi gueshyacunanpaj nanaycho car gaparajno gaparpaycajtami wiyä. Sioncho tiyajcunami maquillan chojpasha gaparpaycan ‹¡Cananllapänachari caräpis! ¡Wañuchicojcunami wañuycachimanga!› nir.»