Read Tayta Diosninchi Isquirbichishan Jeremías 46 Bible Online

Jeremías 46 - Tayta Diosninchi Isquirbichishan bible

Jeremías 46

¹Nasyuncuna imano cananpaj cashantapis TAYTA DIOSGA profëta Jeremiasta willaparan.

²Josiaspa wamran Joacim chuscu watana Judäpa raynin caycaran. Y Éufrates mayu lädun Carquemischo Egiptupa mandajnin faraón Necaopa suldäruncuna caycaptinmi paycunataga Babiloniapa raynin Nabucodonosor wañuchir illgächiran. Chay wichanmi Egipto imano cananpaj cashantapis Tayta Diosga profëta Jeremiasta cayno willaparan:

³«¡Egipto runacuna, chapacuna escüduyquicunata listucuy! ¡Nircorga pillyaj ayway!

⁴¡Cawalluyquicunata sillacuy! ¡Muntacuyta yachajcuna muntacuy! ¡Cascuyquicunata chucucuy! ¡Nircur sumaj fïlacay! ¡Tucsicunayquicunata sumaj afilacuy! ¡Chapäshunayquipaj caj chalëcucunata jaticuy!

⁵«Ichanga ¿imatataj ricä? Egipto suldärucunaga fiyupa mancharishami gueshpir cuticurcaycan. Binsiycuptinnami pillyajcunaga mashtaypa-mashtar aywacuycan. Mana ticraycuypami gueshpir aywacurcaycan. ¡Intërupami manchariypaj caycan! Noga TAYTA DIOSMI chayno në.

⁶Fiyupa cörrejcunapis manami gueshpiyta puydinnachu. Jinyunnincunapis gueshpiyta manami camäpacunchu. Norte caj-lächo Éufrates mayu cantunchöga tacacar llapanmi tunircaycan.

⁷¿Maygan nasyuntaj Nilo mayu chayajno achcayaycäga? ¿Maygan nasyuntaj mayu chayashpan bötiypa-bötir intërupa mashtacaycajnöga caycan?

⁸Nilo mayu chayashpan achcayaycajnöga Egiptumi. Bötiypa-bötir intërupa yacu mashtacaycajnömi caycan. Egipto runacunaga nin: ‹Aypallaman mirashpä intërumanmi juntashaj. Siudäcunatapis llapan runacunatapis ushashami.›

⁹«¡Cawalluwan muntäducuna pillyaj yaycuy! ¡Carrëtawan cajcunapis ayway! Pillyajcuna yaycuy. Ayway Etiopía nasyun suldärucuna, Fut parti suldärucuna chapacuna escüduyquicunata camaricarcärir. Camaricuy lëchawan illapay yachaj Lud parti suldärucuna.

¹⁰Chay junäga cangapaj noga munayniyoj TAYTA DIOS castiganä junajmi. Chay junajmi llapan conträcunata ayñita cutichishaj. Sablëmi tucsenga yamacashancama. Chayno tucsenga pasaypa yawar ñitinancamami. Chay junäga noga munayniyoj TAYTA DIOSMI norte caj-lächo caycaj nasyuncho, Éufrates mayu läduncho aypalla runata wañuchishaj.

¹¹«¡Donsëlla jipashno caycaj Egipto runacuna, Galaadman ayway jampi ashej! Aypalla jampita shuntar jampicushayquipis yangami canga. Gamcunapäga mananami jampi cannachu.

¹²Intëru nasyun runacunanami musyarcaycan manacajman churasha cashayquita. Intëru nasyunmanmi wiyacaycan gaparpashayqui. Pillyajniquicunaga quiquin-purami tacanacusha. Nircur ishcanmi cuchpasha.»

¹³Babiloniapa raynin Nabucodonosor Egiptuman pillyaj yaycunanpaj aywaycaptin TAYTA DIOSGA profëtan Jeremiasta cayno niran:

¹⁴«Egiptucho, Migdolcho, Menfischo, Tafneschöpis cayno willacuy-llapa: ‹¡Ricaj-ricajlla camaricushallana carcaycay! ¡Intëru ñaupayquipanami sabliwan wañuycächin!›

¹⁵Apis jutiyoj töru diosniquega ¿imanirtaj tunisha? Noga TAYTA DIOSMI sajtarishcä. Chay töru diosniquega ¿imanirtaj jinalla mana ichiraycanchu? Chaytaga noga TAYTA DIOSMI tunirachishcä.

¹⁶Suldäruyquicunapis tacanacushpan tunin. Jucnin-jucninpis ninacun: ‹Caypitaga llapanchi cuticushun marcanchïman-cama. Yurishanchi marcanchïman cuticushun. Wañuchinacuypita gueshpir aywacushun› nir.

¹⁷Chayno ninacur gaparpan: ‹Egiptupa mandajnin faraonga ricayllanmi. Manami imata ruraytapis camäpacunchu› nir.

¹⁸«Nogaga munayniyoj Raymi cä. Jutëcho jurarmi në: Puntacunapa chaupincho Tabor punta ichiraycajno, lamarpita ichiraycaj Carmelo puntanömi Egipto runacunapa contran shamunanpaj caycäga caycan.

¹⁹Egipto runacuna camaricuyna prësu aywanayquipaj. Menfisga chunyajmi ricacongapaj. Juchusha ragällan captin pipis manami tiyangapänachu.

²⁰Egiptucunaga caycan cuyayllapaj ternëra-nirajmi. Chayno caycajta cañiycunanpämi norte caj-läpita upucruy aywaycämun.

²¹Guellaypaj pillyaj mincaynincunapis wera töru-mallwacunanömi. Ichanga paycunapis upucruypita gueshpirmi aywaconga. Pillyananpäpis manami ichipangapänachu. Paycuna disigrasyaman chayanan junäga chayaycämunnami. Castigasha canan junäga chayaycämunnami.

²²Yöracunata mutur sajtajnöpis aypalla suldärucuna yaycapaycuptinmi Egiptucho tiyajcunaga gueshpir aywaconga culebra wichyashpan gueshpejnöraj.

²³¡Chay contrancunaga jirasha caycaj muntincunatapis chagurengami! Yaycoj runacunaga chüpacacunapitapis mas aypallami canga. Yupaytapis manami pipis atipangachu. Noga TAYTA DIOSMI chayno në.

²⁴Egiptucho tiyajcunaga fiyupa pengay-tucushami ricaconga. Paycunaga norte caj-lä nasyun runacunapa maquinchönami ricaconga.»

²⁵Israelcunapa munayniyoj TAYTA DIOSNINMI nin: «Tebaspa diosnin Amonta, Egiptupa diosnincunata, raynincunata, faraonta, faraonman yäracojcunatapis llapantami castigashaj.

²⁶Nogami camacächishaj fiyupa chiquej Babiloniapa raynin Nabucodonosorpa maquincho cananpaj, pay mandashan runacunapa maquincho cananpaj. Chaypita mas unaytanami ichanga unay tiyashannöna yapay Egiptucho runacuna tiyacongapaj. Noga TAYTA DIOSMI chayno në.»

²⁷«Jacobpita mirar aywaj Israelcuna ama manchacuychu. Sirbimajcuna ama juc-nirajyaypischu. Maymanpis caru nasyunman apashushayquipitami gamcunata, llapan wamrayquicunatapis jorgamushayquipaj. Chaypitaga allillanami goyäcunquipaj. Pipis manami manchachishunquipänachu.

²⁸Jacobpita mirar aywaj sirbimajcuna ama manchacuychu. Nogami gamcunawan caycä. Gamcunata jitarishächo tiyaycashayqui nasyun runacunataga llapantami illgächishaj. Gamcunatami ichanga mana illgächishayquipächu. Chaypa ruquenga juchayqui-tupullami castigashayqui. Castigänillataga manami cachaycushayquipächu. Noga TAYTA DIOSMI chayno në.»