Read Tayta Diosninchi Isquirbichishan Jeremías 48 Bible Online

Jeremías 48 - Tayta Diosninchi Isquirbichishan bible

Jeremías 48

¹Israelcunapa munayniyoj TAYTA DIOSNINMI Moab nasyun imano cananpäpis cayno nin: «¡Ay imanöraj canqui Nebo siudä! Pasaypa ushacashami canquipaj. Quiriataim siudächo tiyajcunataga llapantami prësu charenga. Chaymi fiyupa pengaypaj canga. Curalasha caycaj pacacunantapis ushajpämi juchurachenga.

²Alli cashanta Moabpäga mananami imaypis parlanganachu. Contrancuna Hesbón siudächo llapanmi parlacurcaycan: ‹Moab nasyunta ushajpaj illgächishun› nir. Madmén marca, gampis illgächishami canquipaj. Imaypis guërrallachömi canquipaj.

³Horonaim siudäpita-pachami wiyacaycan ‹¡Ragällan, illgächishami siudäninchi caycan!› nir gaparpashan.

⁴Moabga pasaypa ushacashami canga. Nanächicur gaparashancunaga Zoarcamanami wiyacaycan.

⁵Luhit cuestatapis wagaraycarmi wicharcaycan. Horonaimman urajcunanami urarcaycan ushacächishanpita fiyupa llaquicushpan.

⁶¡Gueshpicuy-llapa! ¡Wañuyta mana munaj cäga imanöpapis gueshpicuy! ¡Chunyaj chaqui jircacho shira caycajno tiyacuy-llapa!

⁷Moab, gamga munayniyoj cashayquimanmi, imay-aycayquipis cashanmanmi yäracoj-canqui. Ichanga gamcunatapis prësumi charishunquipaj. Quemós diosniquita, cürayquicunata, mandaj runacunatapis prësumi apanga.

⁸Contrayquicunaga llapan siudäcunatami illgächenga. Manami ni jucnayllapis sänuga quëdangapächu. Ragra pampacho cajcunapis, altu jircacho cajcunapis illgächishami canga. Noga TAYTA DIOSMI chayno në.

⁹Moab nasyuntaga ushajpämi illgächej-aywan. Siudänincunapis juchusha ragällanmi quëdanga. Manami ni jucnayllapis runa tiyangapänachu. Chaymi Moabta yarpänanpaj juc señalta churapay.

¹⁰«¡Nishäcunata guellanayllapa rurajcunaga maldisyunädu cachun! ¡Wañuchinanpaj niycaptë mana wañuchej cajpis maldisyunädu cachun!

¹¹«Moab runacunaga imaypis jaucallami goyasha. Paycunataga manami imaypis nasyunninpita juc-läman prësu apashachu. Paycunaga caycan mana jäcachiypa wiñarasha bïnunömi. Chaynöpami alli jömuyniyoj, sumaj mishquej bïnuno caycan.

¹²«Ichanga noga TAYTA DIOS në: «Juc junäga runacunatami cachamushaj chay juc pachallacho wiñaräcoj bïnuta jucman-jucman tacshir-ushananpaj. Jinaylla caj wiñacunatana paquir usharenga.

¹³Chayrämi Moab runacunaga Quemós diosninpita pengaconga. Israel runacuna Betelcho caycaj altarman amatar yäracushanpita pengacushannömi pengacongapaj.

¹⁴«Moab runacuna ama nichunchu: ‹Jinyu runacunami cä. Guërracho pillyay yachaj munayniyoj runacunami cä› nir.

¹⁵Chayamonganami Moabcho, siudänincunacho tiyajcuna illgänanpaj, allinnin caj mösucunapis ushajpaj wañunanpaj. Chayno cananpäga Israelcunapa raynin noga TAYTA DIOSMI nishcä.

¹⁶Moab runacuna mana alliman chayananpäga wallcanami pishin. Paycuna ushacänanpäga manami aycäpis cannachu.

¹⁷Moabpa läduncho caycajcuna, imano munayniyoj cashantapis musyajcuna paypaj wagay. Paypaj cayno niy: ‹¡Wawallau, imanöshi quëdasha munayniyoj, pipis mana binsishan, fiyupa allicho goyaj Moab nasyun!› nir.

¹⁸«Dibón siudä runacuna alli-tucur rispitäducho jamaraycashayquipita llojshircur chucru chaqui pampamanna jamacuy. Illgächicöga gamcuna cajchönami caycan. Sumaj curalasha pergayquicunatapis maynami illgächisha.

¹⁹Aroer siudächo tiyajcunana näniman aywaycur ricchacuy. Nircur wañuypita gueshpiycajcunata tapucuy ‹¿imataj casha?› nir.

²⁰Moabtaga illgächishanami. ¡Llaquicur wagay chay nasyunpaj! Moabta illgächishantaga willacuy Arnón mayu wichancho.

²¹«Pata janancunacho caycaj siudäcunata castiganäpaj nishä castïgu chayashanami. Chay castigashä siudäcunaga caycan: Holón, Jahaza, Mefaat,

²²Dibón, Nebo, Bet-diblataim,

²³Quiriataim, Bet-gamul, Bet-meón,

²⁴Queriot, Bosra, Moabcho caycaj llapan siudäcuna carucho sercacho caycajcunapis.

²⁵«Moabga manami munayniyojnachu. Callpayoj cashanpis ushacashanami. Noga TAYTA DIOSMI chayno në.

²⁶Moab runacunaga nogapa conträmi ricacuran. Chaypita paycunataga rabyasha caycashä cöpawan machächiy. Machacarcärerga gumitashan jananchömi gochpanga. Chaura llapanmi asipanga.

²⁷Moab runacuna, gamcunaga Israelcunata asipajmi canqui. Asipashpayquimi suwatanöpis manacajman churaj canqui.

²⁸Moab runacuna, siudäta cachaycärir gueshpicuy. Gaga chaupincunaman aywacuy paluma gagapa wirpancunacho gueshtata ruraycur tiyajno tiyacunayquipaj.

²⁹Pï-maypis musyanmi Moab runacuna alli-tucushanta, waquinpita mas ollgoj munayniyoj-tucushanta, pitapis mana rispitaj cashanta, baduläqui cashanta.

³⁰Nogaga musyämi lïsu cashanta, baduläqui cashanta, shimillanwan pitapis manchachej cashanta.

³¹Chaymi fiyupa llaquicushpä wagashaj Moab nasyuncho tiyajcunapaj, Kir-hares siudächo tiyaj runacunapäpis.

³²Jazer siudäpaj wagashäpitaga masrämi wagashaj Sibma marcacho caj übas chacrapäga. Rämayquicunapis lamarpa washa chimpancamarämi chayarasha. Chayno päsararmi chayasha Jazercama. Cananga übas chacrayquita pasaypami ushaycusha.

³³Cananga mananami wiyacannachu Moab runacunapa chullpa chacrancunacho cushicuywan gaparpashanpis. Bïnupis manami cannachu churaräcunancunacho. Bïnupaj übasta lluchcajcunapis manami cannachu. Manami cushicuypitanachu gaparpaycanpis.

³⁴Hesbón runacunaga nanaywanmi gaparpaycan. Gaparpashanga wiyacaycan Eleale siudäcama Jahaza siudäcama, Zoarpitana Horonaimcama, Eglat-selisiya marcacamapis. Chaynöga gaparpaycan Nimrimpa aywaj yacucunapis chaquisha captinmi.

³⁵«Nogaga illgächishämi Moab runacuna puytush lömacunaman aywaycur diosnincunapaj uywacunata rupachejta, insinsuta rupachejcunata. Noga TAYTA DIOSMI në chayno ruranäpaj cashanta.

³⁶Chaymi Moabcho tiyajcunapaj shongöpis icchun runata pampaptin quënata tucashannöraj. Kir-harescho tiyajcunapäpis shongö icchun ima-aycatapis shuntacushancuna ushacashana captinmi.

³⁷Llapan runami llaquicuywan ajchancunatapis, shaprancunatapis rutucusha. Maquincunatapis llapanmi cuchucur-ushasha. Gachga röpacunatapis jaticusha.

³⁸«Moab runacunapa wasin janancunacho intëru cällicunacho wiyacaycan llaquicur wagarcaycashallanmi. Chayno wagananpäga nogami illgarachishcä imapäpis mana sirbej puyñutano. Noga TAYTA DIOSMI chayno në.

³⁹¡Moab nasyunpaj llaquicuy-llapa! ¡Fiyupa manchariypämi caycan! ¡Pengacurmi ticracurcusha! Moab runacunaga ñaupancho tiyajcunapaj caycan fiyupa melanaypämi, pasaypa manacajmi.»

⁴⁰TAYTA DIOS nin: «Anca lluyllucarcur imatapis charinanpaj aywaycajnörämi Moab runacunamanga contrancuna aywaycan.

⁴¹Moab runacunapataga siudänincunata pacacunancunatapis contrancunami charenga. Chay junaj Moabpa suldäruncunaga warmi nanaycho caycajnörämi sicsicyangapis.

⁴²Moabga manami nasyunnachu canga. Chayno canga noga TAYTA DIOS caycaptë apärimashanpitami.

⁴³Chaypitami noga TAYTA DIOS në: Moab runacunaga canga casadurpita jirca animal gueshpejno, man'chäga uchcuman yagananpaj caycajno, u togllaman watacänanpaj caycajnöna.

⁴⁴Casadurcunapita gueshpej cäga uchcumanmi yaganga. Uchcupita llojshej cajnami togllaman watacanga. Nogami camacächishaj Moab nasyuncho tiyajcuna castigashana cananpaj. Noga TAYTA DIOSMI chayno në.

⁴⁵«Gueshpir aywajcunaga callpaynajnönami chayan Hesbón siudäman pacacunanpaj. Ray Sehonpa siudänin Hesbonchöga ninami ratariycan. Chay nina ratarir mashtacashpan intëru Moab jircacunatami, llapan fiyu runacuna tiyashantami ushacurcun.

⁴⁶¡Ay imanöraj canqui Moab runacuna! ¡Quemós diosta aduraj runacuna manami salbacunquipänachu! ¡Wamrayquicunata ollguta warmitapis prësumi apacuycan!

⁴⁷Ichanga Moabpita prësu apashancunata mas unaytaga cutichimushämi. Noga TAYTA DIOSMI chayno në.» Tayta Dios Moab runacunapaj nishanga chaynömi caycan.