Read Tayta Diosninchi Isquirbichishan Jeremías 6 Bible Online

Jeremías 6 - Tayta Diosninchi Isquirbichishan bible

Jeremías 6

¹Nortipita fiyupa manchariypaj y disigrasyami chayamunanpaj caycan. ¡Benjamín trïbu runacuna Jerusalenpita gueshpir aywacuy! ¡Pacacunayquipaj ashiy! Tecoa marcacho wagrata tucay-llapa. Bet-haquerem marcacho goshtachiy musyananpaj.

²Cuyayllapaj Jerusalén siudäta illgächinäpänami caycä.

³Chay siudä ñaupancunamanga contran suldärucunami pachaconga uyshërucuna pachacojno. Nircorga guewata uyshacuna ushajnömi siudäta ushajpaj illgächenga.

⁴Chay contrancunaga nin: «¡Sumaj camaricuy Jerusalén runacunawan pillyanapaj! ¡Llapaniqui shamuy pullan junaj yaycapaycärinapaj! Ichanga inti yagaycannami. Llantuycunapis ñitiycämunnami.

⁵¡Chauraga chacaypana yaycapaycärishun! Ricchacuna törrincunatapis juchurgärachishun.»

⁶Munayniyoj TAYTA DIOSNAMI cayno nin: «¡Guerucunata muturir Jerusalenpa curralnin wajtancunaman ichichiy chaypa yaycunayquipaj! Chay siudächo caycaj runacunaga castigasha cananpämi caycan. Chaychöga llapanpis fiyu runacunallami carcaycan.

⁷Pucyupita yacu llojshimojnömi Jerusalenpitaga mana allicuna intëruman mashtacaycan. Chay siudäpitaga imaypis wiyacaycämun mana alli ruraycunallami, pillyallami. Chaymi imaypis ricaycä nanaywan gaparpaycajllata, rachir-ushashallata.

⁸Sumaj yarpachacuy Jerusalén runacuna. Mana yarpachacuptiquega rabyashami aywacushaj. Nircorga gamcuna tiyashayquita chunyajmanmi ticrarachishaj. Chaychöga manami ni jucnayllapis runa tiyangapänachu.»

⁹Munayniyoj TAYTA DIOSMI cayno nin: «Übaspa wayuyninta yaparir-yaparir ushajpaj ashejnömi Israel quëdajcunatapis contrancuna manyapita ashenga.»

¹⁰Chaura noga nirä: «¿Pitaraj nishaj? ¿Pitaraj willapäshaj? ¿Piraj wiyamanga? Paycunaga imatapis mana wiyananpaj rinrincuna chapashami caycan. TAYTA DIOSPA palabranpaj paycunaga asicunmi. Paycunaga manami wiyaytapis munanchu.

¹¹Nogapis TAYTA DIOS rabyashanta willacunäpämi caycä. Chaytaga manami amuräcömanchu.» Chaymi Tayta Dios nimaran: «Rabyasha caycashätaga willay cällicho caycaj wamracunata, röpanpa puriycaj mösucunata. Runacunataga prësumi apacongapaj warmintawan-cama, auquincunatapis mana cuyapaypa.

¹²Chacrancunapis, wasincunapis, warmincunapis jucpanami cangapaj. Cay nasyuncho tiyaj runacunataga nogami castigashaj. Noga TAYTA DIOSMI chayno në.

¹³«Rucupis wamrapis yarparcaycan mana allita ruraypa imatapis tariyllatami. Profëtacunapis cüracunapis engañacojllami.

¹⁴Paycunaga acrashä runacunapa dañäduntapis janan janallanmi jampin. Chayno rurarcorga ‹Alli goyay caycan, alli goyay caycan› nin. Rasunpaga mana alli goyayllami caycan.

¹⁵¿Fiyupa melanäcushä cajta rurashanpita quiquincunaga pengacushachuraj? Manami ni imanillarpis pengacushachu. Manami musyannachu imano pengacuna cashantapis. Chayno cashanpitami castigaptëraj mayanga. Chayrämi mana alliman chayangaga.» TAYTA DIOSMI chayno nisha.

¹⁶TAYTA DIOSGA acrashan runacunata nin: «Tincoj nänicunacho ichiray. Nircur tapucuy unay alli caj nänipa aywanayquipaj. Chay alli caj nänipa ayway chaycho jamayta tarinayquipaj. Ichanga paycuna nin: ‹Manami chaypa aywayllaga canchu› nir.

¹⁷Ricchacojcunata churarcur nogaga runacunata willashcä: ‹Ricchacojcuna trompëtata tucamushanta wiyaj-wiyajlla carcaycay› nir. Ichanga runacuna nisha: ‹Manami wiyayta munäcunachu› nir.

¹⁸Chaypita cananga llapan nasyuncuna wiyay. Musyay acrashä runacuna imano cananpaj cajtapis.

¹⁹Mundu intëru sumaj wiyay. Cay runacunamanga fiyupa mana allitami apamushaj. Chayga canga mana allita yarpashanpitami. Paycunaga willapashäcunata manami wiyacushachu. Laynëcunatapis manami cäsushachu.

²⁰Juc-lä nasyuncho caj alli asyaj jachacunatapis, Sabäpita insinsutapis ¿imapätaj apapämanqui? Nogaga melanäcömi uywacunata pishtar rupachishayquitapis. Ofrendacunata apamushayquitapis manami munächu.

²¹Chayno cashanpitami cay runacunapäga camacächishaj mana alliman chayananpaj. Chaynöpami wañur ushacanga taytanpis wamranpis bisïnunpis rejsinacushanpis.» TAYTA DIOSMI chayno nisha.

²²TAYTA DIOSMI cayno nin: «Fiyupa caru norte cajpitami munayniyoj nasyun runacuna shamunanpaj camaricurcaycan.

²³Chay runacunaga lëchanwan sablinwan camaricushallanami carcaycan. Chay runacunaga fiyumi. Manami pitapis cuyapanchu. Pillyapaj gayarparpis lamar yacu gaparajnörämi gaparpan. Llapanpis cawallun muntashallami aywarcaycämun. Jerusalén runacunawan pillyananpaj camaricushanami carcaycan.» Judá runacunaga nircaycan:

²⁴«Willapatami mayashcanchi. Chayta wiyaycurmi manchariyllawan callpaynajnöna ricacushcanchi. Cananmi ichanga nanaycho caycaj warminöraj llaquicunchi, nanächicunchi.

²⁵Jircapaga ama llojshiynachu. Nänicunapapis ama puriychu. Contranchïcunaga wañuchicunanwanmi caycan. Intërupami pasaypa manchariypaj caycan.

²⁶Marca-masëcuna, fiyupa llaquicushpayqui gachga röpacunata jaticuy. Uchpacho gochpay. Nircur jucnaylla wamrayqui wañusha caycajpäno fiyupa wagay. Ushamänanchïpaj caycäga manapis aycällatanami chayamonga.»

²⁷Tayta Dios nimaran: «Gamtami churä acrashä runacunata ricanayquipaj. Imano goyarcaycashallantapis sumaj ricay.

²⁸Paycunaga llapanpis mana wiyacoj runacunami; willapista, washa rima runacunami. Runsino fyërrunömi carcaycan.

²⁹Jirrërucunapa juyllin sinchipa pücaptin ninaga plömuta chullurachir ganranta raquirinmi. Chay fiyu runacunatami ichanga yanga imanöpapis limyuyächiyta camanchi. Mana alli runacunaga manami imaypis illgangachu.

³⁰Paycunataga jutichapäshun ‹Mana sirbej guellay› nirnachari. Chay runacunataga noga jitarishcänami.»