Read Tayta Diosninchi Isquirbichishan Lamentaciones 3 Bible Online

Lamentaciones 3 - Tayta Diosninchi Isquirbichishan bible

Lamentaciones 3

¹Nogaga fiyupami ñacashcä. Tayta Dios rabyacurcur castigamaptinmi ñacashcä.

²Paymi yanauyaycajman pushamaran. Achqui mana cashancho purichir ñacachimaran.

³Yaparir-yaparirmi imay örapis nogataga castigaycäman.

⁴Garätapis aychätapis pasaypanami auquisyächisha. Tullöcunatapis pasaypami paquir-ushasha.

⁵Intëröpa curralta rurajnömi fiyupa ñacachimashpan llaquicaycächiman.

⁶Wañojcuna pamparaycashan chacaychöno cawanäpämi cachaycamasha.

⁷Maypapis mana llojshinäpämi curralman wichgarcamasha. Fiyupa lasaj cadinacunawanmi watarcamasha.

⁸Yanapämänanpaj mañacur gaparaycaptëpis ruwacushätaga manami wiyamashachu.

⁹Puricunätaga rumicunawanmi pergacurcusha. Caminötaga juc-läpana jitarisha.

¹⁰Nogapäga Tayta Dios casha pacaraycaj ucumaryanömi; pintipaycamänanpaj caycaj liyunnömi.

¹¹Allipa aywaycajtami pantacächimasha. Tariparcur rachiramasha. Fiyupa mancharishatami cachaycamasha.

¹²Lëchanta sumaj chutarcurmi nogataga lëchanwan chayachimänanpaj apuntamasha.

¹³Tayta Dios jitamushan lëchacunaga cuerpöman fiyupa ruricamami jaticasha.

¹⁴Llapanmi marca-masëcunapis nogataga asipäman. Imay örapis nogapaj parlar asircaycanmi.

¹⁵Tayta Diosga fiyupa llaquicuyllamanmi churamasha. Ashgaj berbënatami upuchimashapis.

¹⁶Guechga rumiwanmi quirötapis jorgusha. Uchpachömi gochpachimasha.

¹⁷Nogapäga manami cannachu alli goyayga. Cushisha goyay cashantapis gongaycushcänami.

¹⁸Chayno cashpämi nishcä: «Alli goyayta manami yarpänachu. TAYTA DIOSMANPIS imapänataj yäracushaj» nir.

¹⁹Yarpämi llaquicushäta, ñacashäta, japallä goyashätapis.

²⁰Chaycuna imano päsamashantapis yarpachacömi. Chauraga alli shacyaycashäpitapis guellanacäcönami.

²¹Ichanga imaypis shongöcho yarpaycäshämi. Y chay yarpaycashämanga yäracuycäshämi:

²²TAYTA DIOS cuyacoj cashanga manami imaypis ushacanchu. Cuyapäcoj cayninpis manami ushacanchu.

²³Alli caynenga waran-waranmi mushojyaycan. Aunishantaga imaypis cumlinmi.

²⁴Shongullächöga në: «Nogapäga TAYTA DIOSLLAMI llapanpitapis mas alli. Chaymi payllaman yäracö.»

²⁵TAYTA DIOSGA fiyupa allimi payman yäracojcunapäga llapan shongunpa payman yäracuyta ashejcunapäga.

²⁶TAYTA DIOS salbamänanchïpäga upällalla shuyaraymi mas alli.

²⁷Runapäga mas alli caycan mösu cashanpita-pacha ñacaycunata awantaymi.

²⁸Tayta Dios ñacachishan öra runaga upällalla japallan cacunman.

²⁹Wiyacushpan pampaman uysuräcunman. Chayno ruraptenga capaschari allimanpis churanman.

³⁰Pipis magaptenga cäranta witichipanman. Imata gayapaptinpis upällalla chasquicunman.

³¹Tayta Diosga pitapis manami para-simriga gongaycunchu.

³²Ñacachishpanpis cuyapanmi. Chaynöga ruran fiyupa cuyacoj cashpanmi.

³³Rasunpaga pay manami munanchu runacunata ñacachiyta, ni nanächiytapis.

³⁴Tayta Diosga manami munanchu prësu caycaj jäpacunata ñacachinanta.

³⁵Tayta Diosga manami munanchu pï runatapis manacajman churananta.

³⁶Tayta Diosga manami munanchu dimanducho juchayoj cajpa faburnin pipis cananta.

³⁷Tayta Dios mana camacächiptenga imapis manami cay pachacho canmanchu.

³⁸Allipis mana allipis chayamun janajcho caycaj Tayta Dios «chayno cachun» niptinmi.

³⁹Juchasapa cashanpita castigasha caycarga runa ¿imapitataj quijacunman?

⁴⁰Imano goyaycashanchïtapis sumaj yarpachacushun. TAYTA DIOS munashannöna cawashun.

⁴¹Syëlucho caycaj Tayta Diostaga llapan shongunchïwan, maquinchïta chojpacur mañacushun.

⁴²Nogacunaga gam nishayquita mana rurarmi juchata rurashcä. Chaymi gamga mana perdunamashcanquichu.

⁴³Fiyupa rabyashpayquimi gaticachämashcanqui. Intëröpa chapacaycamashcanqui. Mana cuyapaypami nogapa castacunataga wañuchishcanqui.

⁴⁴Nogacuna ruwacur mañacamushäta mana wiyanayquipämi pucutayman yagacuycurayqui.

⁴⁵Llapan runacunapa ñaupanchömi nogacunataga ganratano ricamashcanqui.

⁴⁶Llapan chiquimajcunapis nogacunapa contrallämi rimarcaycan.

⁴⁷Nogacunaga goyashcäpis mancharishallami. Mana allicunallami chayamashapis.

⁴⁸Cuyashä siudäta illgaycächejta ricaptë weguëpis mayunörämi aywaycan.

⁴⁹Mana chawaypami wagaycä. Cushicuyta manami tarishächu

⁵⁰syëlucho caycaj TAYTA DIOS manaraj yanapämashancamaga.

⁵¹Siudänëcho tiyaj jipashcuna ñacajta ricaptëmi shongöcamaraj nanäman.

⁵²Achäquita mana ashipaycaptillämi chiquimajcunaga äbita charejnöpis prësu charimasha.

⁵³Cawaycajtami pösuman cacharpamasha. Nircur uchcupa shimintana jatun läjawan chaparcamusha.

⁵⁴Chaura yacuga ushajpämi ultacarcamaran. Chaymi yarparä «wañushänachari» nir.

⁵⁵TAYTA DIOS, pösupa rurincho caycashpämi gamta mañacamurä.

⁵⁶Mañacamushäta gamga wiyamashcanquimi.

⁵⁷Gayacamushäta wiyamashpayquimi yanapämarayqui. Nircur «ama manchacuychu» nimarayqui.

⁵⁸Tayta Dios, gammi ima mana allipitapis chapämashcanqui. Wañunäpitapis gammi salbamashcanqui.

⁵⁹Gamga ricaycanquimi imano mana alli ruramashantapis. Gampaj alli cashanno arriglaycamay.

⁶⁰Gamga ricaycanquimi imata rurayta munaycämashantapis, nogapa conträ imano rurananpaj yarpaycashantapis.

⁶¹TAYTA DIOS, masqui wiyaycuy conträ imano rimarcaycashantapis, imata ruramänanpaj yarpaycashantapis.

⁶²Chiquimajcunaga nogapa contrallämi imay örapis rimarcaycan.

⁶³Masqui sumaj ricay. Ima rurashancunachöpis nogapäga shimincayllarämi riman.

⁶⁴TAYTA DIOS, paycunataga rurashanmanno castigaycuy.

⁶⁵Paycuna mana tantiyananpaj camacaycachiy. Nircorga paycunata castigaycuy.

⁶⁶TAYTA DIOS fiyupa rabyasha gaticachaycuy. Cay pachapita paycuna illgänanpaj camacaycachiy ari.