Read Tayta Diosninchi Isquirbichishan Lamentaciones 5 Bible Online

Lamentaciones 5 - Tayta Diosninchi Isquirbichishan bible

Lamentaciones 5

¹TAYTA DIOS, yarpäriy ari imano päsamashancunatapis. Masqui ricay imano disigrasya chayamashantapis.

²Erensyäcunapis juc-lä nasyun runacunapa munaynillanchönami caycan. Wasëcunapis jäpa runacunapa munayninchönami.

³Taytaynaj wacchanönami ricacushcäcuna. Mamäcunapis biyüdanönami ricacusha.

⁴Cananga quiquëcunapa yacöcunatapis rantiycämi. Quiquëcunapa yantäcunapäpis pägarcaycämi.

⁵Gaticacharcaycämanmi. Guepäta guepätami gatimar aywarcaycämun. Uticasha caycashpäcunapis jamaytaga manami tarëchu.

⁶Micunäcunapäpis maquëta chojpacur mañacöcuna Egipto runacunata, Asiria runacunata.

⁷Papänëcunami juchataga ruraran. Paycunaga mananami cannachu. Paycunapa juchanpitaga nogacunami castïguta chasquiycä.

⁸Cananga uywaycunapa maquinchömi caycäcuna. Paycunapa munayninpita jorgamänanpaj manami pipis canchu.

⁹Micuytapis tarëcuna wañuy caway ashir-rämi. Micuytaga chayachimö chunyajcho caycaj asaltanticuna caycashanpa päsamur-rämi.

¹⁰Cuerpöpis jurnunörämi rupariycan. Yargaywan caycällarnami rupaycä.

¹¹Sionchöpis, Judächo caj siudäcunachöpis, warmicunata, wamra jipashcunatapis charipacusha.

¹²Mandajnëcunataga maquipitami warcurcusha. Auquincunatapis manami rispitashanachu.

¹³Mas callpayoj caj runacunatami churasha mulinucho agaj rumita tangananpaj. Mösucunatanami yantata ashtachisha apaytapis mana puydishancama.

¹⁴Siudäman yaycuna puncucho auquincunapis manami cannachu. Mösucuna jipashcuna manami cantannachu.

¹⁵Manami cushicuytapis tarënachu. Cushicur gachwanäpa ruquin llaquicuyllamanmi chayashcäcuna.

¹⁶Corönäpis shicwacushami. Imapäraj yuriräcunapis. Nogacunaga juchatami rurashcä.

¹⁷Chaypitami cananga shongu nanaywan gueshyaycäcuna. Chaypitami ñawëcunapis chacacäcusha.

¹⁸Sión lömapis cananga caycan gotuy-gotuy juchushallami. Chaychöga atojcunallanami cutir ticrar puricunpis.

¹⁹Gammi ichanga TAYTA DIOS imaycamapis mandaycanquipaj. Syëlucho caycaj jamanayquipitami para-simri mandaycanquipaj.

²⁰¿Imanirtäshi para-simriga gongaycamänayqui caran? ¿Imanirtäshi unaycamaga cachaycamänayqui caran?

²¹TAYTA DIOS camacaycachiy yapay gamman cutimunäcunapaj. Chauraga gammannami cutimur yäracamushaj. Tayta Dios, camacaycachiy ari unay goyashäcunanöna yapay goyänäpaj.

²²Ichanga, gam Tayta nogacunata ricamaytapis manami munanquichu. Nogacunapäga fiyupami rabyacurcushcanqui.