Read Tayta Diosninchi Isquirbichishan Ezequiel 18 Bible Online

Ezequiel 18 - Tayta Diosninchi Isquirbichishan bible

Ezequiel 18

¹TAYTA DIOS nimaran:

²«¿Imanirtaj Israelchöga imaypis cay rimayta rimarcaycan: « ‹Papänincuna pochgoj übasta micuptin wamrancunapana quirun shimpan› nir?

³«Ichanga noga TAYTA DIOS në: Israelchöga imaypis mananami yapayga chay rimayta rimanganachu.

⁴Pipis juchata ruraj cajllami wañongaga. Chaynöga canga llapan cawajcuna nogallapa captinmi. Papänincunapis wamrancunapis nogallapami.

⁵«Alli runaga alli cajllatami ruran.

⁶Manami puytush lömacunaman witipanchu ïdulucunata adurananpaj micuyta rurachishanmanpis. Manami yäracunchu mana dios caycaptin Israelcuna ‹diosnë› nishancunaman. Manami jucpa warminwan cacunchu. Manami quilla gueshyanwan caycaj warmiwan cacunchu.

⁷Manami pitapis ñacachinchu. Manami charicurcunchu jagancuna rindata churashantapis. Manami pitapis suwapanchu. Manami ‹mana canchu› ninchu muchupacajcunatapis. Manami ‹mana canchu› ninchu röpaynajcunatapis.

⁸Manami aypalla wawantawan cutichinanpächu guellaytapis ristan. Manami pitapis mana allitaga ruranchu. Manami pitapis chapanchu mana allita rurashanpitaga.

⁹Chaypa ruquenga laynëcuna nishantami wiyacun. Mandamintöcunacho niycashantapis llapantami cumlin. «Chayno ruraj runami rasunpa alli runaga. Chayno rurashanpita chay runaga cawangami. Noga TAYTA DIOSMI chayno në.

¹⁰«Ichanga chay runapa wamran capas canman mana allita ruraj, wañuchicoj, imatapis

¹¹papänin mana rurashancunata ruraj: «Capaschari puytush lömacunacho ïdulucunata adurananpaj micuyta rurachishancho micöshinman. Capaschari runapa warminwan cacunman.

¹²Capaschari wacchacunatawan pobricunata ñacachinman. Capaschari waquin cajcunata suwapanman. Capaschari pipis jagan car rinda churashantapis duyñu-tucurcunman. Capaschari mana dios caycaptin Israelcuna ‹diosnë› nishanman yäracunman. Capaschari noga fiyupa melanäcushäta ruranman.

¹³Capaschari aypalla wawantawan cutichinanpaj guellaytapis ristanman. «¿Chayno caj runaga cawangachuraj? ¡Manami! Chayno melanaypajcunata rurashanpitaga wañongami. Chayno wañunanpäga quiquinmi juchayoj canga.

¹⁴«Chayno mana alli runapa wamran capaschari canman. Papänin juchata rurashancunata capas musyanman. Chayno musyaycarpis capaschari papänin rurashannöga mana ruranmannachu:

¹⁵«Capaschari ïdulucunata rispitananpaj puytush lömacunacho micuyta rurachishanman mana witipanmanchu. Capaschari mana dios caycaptin Israelcuna ‹diosnë› nishanman mana yäracunmanchu. Capaschari juc runapa warminwan mana cacunmanchu.

¹⁶Capaschari pitapis mana ñacachinmanchu. Capaschari imata mañacuptinpis rindataga mana charinmanchu. Capaschari pitapis mana suwapanmanchu. Capaschari micuyniynajcunata garanman. Capaschari röpaynaj caycajtana röpata goycunman.

¹⁷Capaschari pobricunata yanapanman. Capaschari guellayta ristaycurpis achcataga wawanta mana cobranmanchu. Capaschari laynëcuna nishanta ruranman. Capaschari mandamintöcunacho niycashanta llapanta cumlinman. «Chaura chay runaga manami wañongachu papäninpa juchanpita. Chay runaga cawangami.

¹⁸Papäninmi ichanga pitapis ñacachej cashanpita, suwacushanpita, marca-masincunacho mana allita rurashanpita, quiquinpa juchanpita wañonga.

¹⁹«Gamcuna capas ninquiman: ‹¿Imanirtaj wamranpis mana ñacanchu papänin juchata rurashanpitaga?› nir. Chay wamranga mana ñacangachu rasun cajta, alli cajta rurasha cashpanmi, laynë nishanno cumlishanpitami. Chaypitami rasunpa cawanga.

²⁰Pipis juchata ruraj cajllami wañonga. Ni wamranpis manami wañongachu papänin juchata rurashanpitaga. Ni papäninpis manami wañongachu wamran juchata rurashanpitaga. Allita ruraj cäga rurashanpita allitami chasquenga. Mana allita ruraj cajnami mana allita rurashanpita castigasha canga.

²¹«Capas mana allita ruraj runa jucha ruraycunallacho caycashanta cachaycun. Nircur laynëtana cumlir, alli cajta rurashpanga cawangami. Manami wañongachu.

²²Chaura mana alli rurashancunataga manami yarparäshänachu. Alli cajta rurashanpitami payga cawanga.

²³Nogaga manami munächu mana allita ruraj wañunantapis. Chaypa ruquenga munä allitana rurananta, chaynöpana cawananta. Noga TAYTA DIOSMI chayno në.

²⁴«Alli runa, allita ruraycashanta cachaycur capaschari mana allitana ruranman. Mana alli runacuna rurashanno melanaypätana ruraptenga ¿gamcuna yarpanquichu chay runa sïguir cawaycänanta? Nogaga manami yarpashäpänachu allita rurashanta. Chay runaga wañonga juchanpitami, aunishanta mana cumlishanpitami.

²⁵«Gamcunaga ninqui ‹Diosga mana allitami ruraycan› nir. Ichanga Israelcuna sumaj wiyamay. ¿Noga mana allita ruraycashätachu yarpanqui? Chaypa ruquenga ¿manachuraj gamcuna mana allitaga ruraycanqui?

²⁶Alli runa, alli ruraycashanta cachaycur mana allitana rurashpanga quiquinpa juchanpitami wañonga.

²⁷Mana allita ruraj runa, mana allita ruraycashanta cachaycur allitana, rasun cajllatana rurarga salbacur cawangami.

²⁸Sumaj tantiyacurir mana allita rurashancunata cachaycushpan allitana rurashpanga cawangami. Manami wañongachu.

²⁹«Israelcunaga capas nenga ‹Tayta Diosga mana allitami ruraycan› nir. Nogaga ¿mana allitachuraj ruraycä? Chaypa ruquenga gam Israelcunami mana allitaga rurarcaycanqui.

³⁰Chaypitami gam Israelcunataga imano rurashayquipitapis cada-ünuyquita jusgashayqui. Noga TAYTA DIOSMI chayno në. Mana allita ruraycashayquipitaga juclla arpinticuy mana alliman mana chayanayquipaj.

³¹Jucha ruraycunataga cachaycäriyna. Alli shonguwanna y mushoj yarpaywanna allita ruray. Israelcuna ¿imanirtaj wañunquiman?

³²Nogaga manami munächu pipis wañunanta. Mana allita ruraycashayquipita arpinticuy cawanayquipaj. Noga TAYTA DIOSMI chayno në.